پرەزيدەنت اكىمشىلىگىنىڭ باسشىسى سولتۇستىك قازاقستان وبلىسىنىڭ جاڭا اكىمىن تانىستىردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«مەملەكەت باسشىسىنىڭ تاپسىرماسى بويىنشا پرەزيدەنت اكىمشىلىگىنىڭ باسشىسى ولجاس بەكتەنوۆ سولتۇستىك قازاقستان وبلىسىنىڭ بارلىق دەڭگەيدەگى ءماسليحات دەپۋتاتتارىنىڭ جينالىسىنا قاتىستى. ولجاس بەكتەنوۆ دەپۋتاتتارعا سولتۇستىك قازاقستان وبلىسىنىڭ اكىمى لاۋازىمىنا ءساتجان ايتەن ۇلى ابلاليەۆ پەن عاۋەز تورسان ۇلى نۇرمۇحامبەتوۆتىڭ كانديداتۋرالارىن ۇسىنۋ تۋرالى قازاقستان رەسپۋبليكاسى پرەزيدەنتىنىڭ حاتىن وقىپ بەردى. اشىق داۋىس بەرۋدىڭ ناتيجەسىندە 56 دەپۋتات ءساتجان ابلاليەۆكە, ال 118 دەپۋتات عاۋەز نۇرمۇحامبەتوۆكە داۋىس بەردى. جينالىسقا بارلىعى 174 دەپۋتات قاتىستى. داۋىس بەرۋ قورىتىندىسى بويىنشا پرەزيدەنت جارلىعىمەن عاۋەز تورسان ۇلى نۇرمۇحامبەتوۆ سولتۇستىك قازاقستان وبلىسىنىڭ اكىمى بولىپ تاعايىندالدى. ءوڭىر اكتيۆىنە جاڭا اكىمدى تانىستىرعان ولجاس بەكتەنوۆ عاۋەز نۇرمۇحامبەتوۆتىڭ ورتالىق جانە جەرگىلىكتى مەملەكەتتىك ورگانداردا جاۋاپتى قىزمەتتەر اتقارعانىن جانە مول تاجىريبەسى بار ەكەنىن اتاپ ءوتتى. پرەزيدەنت اكىمشىلىگىنىڭ باسشىسى ءوڭىردى دامىتۋعا قوسقان ۇلەسى ءۇشىن بۇرىنعى وبلىس اكىمى ايداربەك ساپاروۆقا العىس ايتتى جانە ونىڭ باسشىلىعىمەن ايماقتاعى اگروونەركاسىپ كەشەنىنىڭ دامۋ قارقىنى ارتقانىنىن, جاڭا كاسىپورىندار اشۋ, ينۆەستيتسيا تارتۋ, تۋريزم سالاسىن ىلگەرىلەتۋ باعىتىندا اۋقىمدى جۇمىستار اتقارىلعانىن جەتكىزدى. سونىمەن قاتار مەملەكەت باسشىسىنىڭ بيىلعى 1 قىركۇيەكتەگى حالىققا جولداۋىندا ايتىلعان تاپسىرمالارىنا ەرەكشە نازار اۋدارىلدى. وبلىستىڭ جاڭا باسشىلىعىنا ءوڭىر ەكونوميكاسىن ودان ءارى دامىتۋ, تۇرعىنداردى ساپالى اۋىزسۋمەن جانە قاجەتتى الەۋمەتتىك ينفراقۇرىلىممەن قامتاماسىز ەتۋ, مەديتسينانى دامىتۋ, سونداي-اق ەكىنشى جەو-نى جوندەۋ جۇمىستارىنا قاتىستى بىرقاتار مىندەت جۇكتەدى», دەلىنگەن حابارلامادا.
ولجاس بەكتەنوۆ سولتۇستىك قازاقستان وبلىسىنىڭ جاڭا اكىمىنە جاۋاپكەرشىلىك جۇكتەلگەنىن, ء وڭىردى وركەندەتۋگە, دامىتۋعا ءوز ۇلەسىن قوسادى, وبلىس تۇرعىندارى مەن مەملەكەت باسشىسىنىڭ جوعارى سەنىمىن اقتايدى دەپ ۇمىتتەنەتىنىن جەتكىزدى.