سەنات توراعاسى ماۋلەن اشىمباەۆ قازاقستاننىڭ ەڭبەك ەرى اكىم ءتارازيدىڭ 90 جاسقا تولۋىمەن قۇتتىقتاۋىن Facebook جانە Instagram الەۋمەتتىك جەلىلەرىندەگى پاراقشاسىندا جاريالادى, دەپ حابارلايدى Egemen.kz.
جوعارعى پالاتا جەتەكشىسى ۇلت رۋحانياتىنىڭ ابىز اقساقالىنا اماندىق پەن باق-بەرەكە تىلەپ, مەرەيتوي اياسىندا ۇيىمداستىرىلعان «تولعاۋى 90 تارازي» اتتى ءىس-شارادا پرەزيدەنت قاسىم-جومارت توقاەۆتىڭ قۇتتىقتاۋ حاتىن وقىپ بەردى.
«قازاقتا ادەبيەتسۇيەر قاۋىمنىڭ جۇرەك تورىنەن ەركىن ورىن الىپ, قالىڭ وقىرماننىڭ ىقىلاسىنا بولەنگەن قالامگەرلەر از ەمەس. سولاردىڭ ءبىرى دە بىرەگەيى بيىل تورقالى توقسان جاسقا تولىپ وتىرعان كورنەكتى جازۋشى, قازاقستاننىڭ ەڭبەك ەرى اكىم تارازي ەكەنى انىق.
مەملەكەت باسشىسى اتاپ وتكەندەي, اكىم تارازي قوعامعا سىني كوزقاراسپەن قاراپ, زامانداستارىنىڭ كەسكىن-كەلبەتىن شىنايى سۋرەتتەپ, بارشا ادامزاتتى تولعاندىرعان ماسەلەلەرگە جۇرت نازارىن اۋدارا بىلگەن جازۋشى.
شىن مانىندە, اكىم اعانىڭ ءار تۋىندىسى – ادەبيەتىمىزدىڭ التىن قورىنا قوسىلعان قىمبات قازىنا. بۇل رەتتە «جازا», «شەر», «قيانات», «تاسجارعان» سياقتى رومانداردى ەرەكشە اتاپ وتكەن ءجون. مۇستافا شوقايدىڭ ءومىر جولىنا ارنالعان ىرگەلى تۋىندى دا ءبىرتۋار تۇلعانىڭ ۇلت تاريحىنداعى ورنىن جاڭا قىرىنان تانۋعا جول اشتى. سونداي-اق اكىم ءتارازيدىڭ بىرەگەي پەسالارى قازاق تەاترىن جاڭا بەلەسكە شىعارۋعا ۇلكەن ۇلەس قوسقانىن ايتا كەتكەن ابزال.
جازۋشىنىڭ قاي شىعارماسىن الىپ قاراساق تا ۇلتتىق رۋحقا تابان تىرەيتىنىن اڭعارامىز. ەلدىك مۇددەنى كوزدەيتىن مۇنداي تۋىندىلار ەشقاشان ەسكىرمەيدى جانە قاي كەزەڭدە دە وقىرمانىن جوعالتپايدى», دەپ جازعان م.اشىمباەۆ قازاق ادەبيەتىنىڭ قارا نارىنا زور دەنساۋلىق تىلەپ, حالىقتىڭ ىقىلاسىنا كەنەلە بەرۋىنە تىلەۋلەستىگىن ءبىلدىردى.