مارافون مارەسىنە جەتتى

ەڭ سوڭعى مەجەدە جۇيرىكتەرىنە قام­شى باسىپ, العا وزىپ شىققان جەتىسۋ وبلىسىنىڭ كومانداسى جەڭىمپاز اتانىپ, باس جۇلدە – 18 ملن تەڭگە كولەمىندە قار­جىلاي سىيلىقپەن ماراپاتتالادى. ال ەكىنشى ورىن يەلەنگەن اقتوبە وبلىسىنىڭ كومانداسى – 16 ملن تەڭگە, ءۇشىنشى ورىن يەگەرى الماتى قالاسىنىڭ كومانداسى – 9 ملن تەڭگەنى قانجىعاسىنا بايلادى. تورەشىلەردىڭ شەشىمىمەن, مارەگە ءتورتىنشى بولىپ جەتكەن اباي وبلىسىنىڭ كومانداسىنا 5 ملن تەڭگە بەرىلەتىن بولدى.

ون ءتورتىنشى كۇننىڭ قورىتىندىسى بو­يىن­شا, جەتىسۋ وبلىسى – 93 ساعات 47 مينۋت 43 سەكۋند, اقتوبە وبلىسى – 95 ساع­ات 06 مينۋت 37 سەكۋند, الماتى قالاسى – 104 سا­عات 23 مينۋت 57 سەكۋند, اباي وبلىسى – 112 ساعات 12 مينۋت 46 سەكۋندتا مارەگە جەتتى.

سونىمەن قاتار بۇل جولعى جورىقتا ماڭعىستاۋ وبلىسىنىڭ 21 جاستاعى شاباندوزى ماع­جان ابدول ۇلى «شا­عى­رايتورى» دەگەن اتىن گيننەستىڭ رەكورد­تار كىتابىنا ەنگىزۋى مۇمكىن. ول 1 300 شاقى­رىمنىڭ سوڭعى 50 شاقىرىمىن باعىن­دىرۋعا تاڭعى ساعات 07:10-دا اتتانىپ, تۇركىستانداعى مارە سىزىعىن 08 ساعات 44 مينۋت 09 سەكۋندتا ءبىرىنشى بولىپ كەستى. استانادان تۇركىستانعا دەيىنگى 1 300 شاقىرىمدى باستان-اياق ءبىر عانا اتپەن ەڭسەرۋدى ماقسات ەتكەن «رەكورد» كومان­داسىنىڭ قۇرامى استانا قالاسى, ماڭعىستاۋ مەن جەتىسۋ وبلىستارىنىڭ شاباندوزدارىنان قۇرالعان.

«مارەگە جەتىسۋ شاباندوزى ەكىنشى بولىپ كەلسە, ارتىنشا استانا شاباندوزى جەتىپ, «رەكورد» كومانداسى دىت­تەگەن ماقساتىن ورىندادى. 1 300 شاقى­رىمدى 1 اتپەن باعىندىرعان ازاماتتار 1-ورىن ءۇشىن – 2,5 ملن تەڭگە, 2-ورىنعا – 2 ملن تەڭگە, 3-ورىنعا – 1,5 ملن تەڭگە كولەمىندە سىياقى الدى. «رەكورد» كو­مانداسىنىڭ ناتيجەسىنە توقتالساق, ماڭ­عىستاۋ وبلىسىنىڭ جىلقىسى 1 300 شا­قىرىمدى 98 ساعات 44 مينۋت 47 سەكۋندتا باعىندىردى. ال جەتىسۋ وبلىسىنىڭ تۇل­پارى 100 ساعات 04 مينۋت 34 سەكۋندتا ەڭسەردى. ءۇشىنشى, استانالىق سايگ ۇلىكتىڭ ۋا­قىتى 104 ساعات 28 مينۋت 11 سەكۋندتى قۇ­رايدى», دەيدى ۇيىمداستىرۋشىلار.

ولاردىڭ ايتۋىنشا, كومانداسى جارىستان شىعىپ قالسا دا, جورىقتى ءوز ەركىمەن جالعاستىرىپ, 1 300 شاقىرىمدى جەكە دارا باعىندىرعان 10 شاباندوزدىڭ ارقايسىسىنا تورەشىلەردىڭ شەشىمىمەن 1 ملن تەڭگە كولەمىندەگى قارجىلاي سىيلىق بەرىلدى.

بۇل عانا ەمەس, ەكى اپتالىق الامانعا قاتىسىپ, اتتىلى شاباندوزدارمەن بىرگە 1 300 شاقىرىمدى باعىندىرعان بەينەۋ اۋدا­نىنىڭ تۋماسى, قازاقستاننىڭ قۇر­مەتتى قۇرىلىسشىسى, ەلگە بەلگىلى ۆەلوشاباندوز راببيم بوراشوۆقا دا تورەشىلەر «ەڭ ۇزدىك جانكۇيەر» نوميناتسياسىن بەل­گىلەپ, 1 ملن تەڭگە كولەمىندە قار­­جىلاي سىيلىق تاعايىندادى. ايتا كەتۋ كەرەك, ماڭ­عىستاۋدىڭ «كوكمويناق» كو­مان­داسىنا جانكۇيەر ۆەلوشاباندوز بۇعان دەيىنگى ما­رافون-بايگەگە قاتىسىپ, تۇركىستانعا دەيىنگى 1 200 شاقىرىمدى باعىندىرعان ەدى.

جالپى, 5-19 قىركۇيەك ارالىعىندا ما­رافونشىلار ەلوردادان تۇركىستان قالاسىنا دەيىن 1 300 شاقىرىمنان اسا قا­­شىق­تىقتى باسىپ ءوتتى. مارافون 14 ساتىعا بولىنگەن. ەلىمىزدىڭ 19 وڭىرىنەن ما­را­فونعا 1 كوماندادان قاتىستى. مارا­فونعا قاتى­سۋشىلارعا ۇلى دالا رۋحىن سە­زىنۋگە جانە كيەلى جەرلەرىمىز – جو­شى حان, الاشا حان كەسە­نەلەرى, تۇركى رۋحا­نيا­تىنىڭ بەسىگى تۇركىستان قالاسى سياق­تى تا­ريحي ورىندارعا زيارات جاساۋعا مۇم­كىن­دىك تۋدى.

ماراپاتتاۋ ءراسىمى «تۇركىستان-ارەنا» ستاديونىندا ءوتتى. « ۇلى دالا جورىعى» رەس­پۋبليكالىق مارافون-بايگەسىنىڭ باس سەرىكتەسى – «Sport Qory» تۋريزم يندۋس­تريا­سى مەن سپورتتى قولداۋ قورى.