ەلىمىزدە العاش رەت ساقتاندىرۋ فورۋمى وتكىزىلدى. فورۋم «ساقتاندىرۋ تولەمدەرىنە كەپىلدىك بەرۋ قورى» اق-نىڭ 20 جىلدىعىنا ارنالعان. فورۋمعا 11 ساقتاندىرۋ تولەمدەرىنە كەپىلدىك بەرۋدىڭ حالىقارالىق جۇيەسىنىڭ (كانادا, گەرمانيا, يسپانيا, مالايزيا, تايۆان, يندونەزيا, كەنيا, سينگاپۋر, ارمەنيا, رۋمىنيا, ەستونيا) وكىلدەرى, حالىقارالىق ساراپشىلار جانە ساقتاندىرۋ نارىعىنىڭ وكىلدەرى قاتىستى.
قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا فورۋم كەپىلدىك بەرۋ جانە تۇتاستاي العاندا ساقتاندىرۋدى دامىتۋ ماسەلەلەرى بويىنشا تاجىريبە الماسۋعا بىرەگەي مۇمكىندىك بەرگەنىن اتاپ ءوتتى. «مۇنداي حالىقارالىق دەڭگەيدەگى ءىس-شارانى وتكىزۋ ساقتاندىرۋ ارقىلى قورعاۋ جانە ساقتاندىرۋ بيزنەسىنە دەگەن سەنىمدىلىكتى ارتتىرۋ ماسەلەلەرىنىڭ وزەكتىلىگىن كورسەتەدى», دەپ اتاپ ءوتتى اگەنتتىك توراعاسى.
قارجى رەتتەۋشىسىنىڭ باسشىسى فورۋم قاتىسۋشىلارىمەن وتاندىق ساقتاندىرۋ نارىعىنىڭ كەيبىر جەتىستىكتەرىمەن ءبولىستى.
«2022 جىلى ساقتاندىرۋ نارىعىن دامىتۋ ماسەلەلەرى جونىندەگى زاڭ قابىلداندى. وندا سەكتور ءۇشىن ماڭىزدى جاڭالىقتار كوزدەلگەن. جاڭا الەۋمەتتىك تۇرعىدان باعدارلانعان ونىمدەر ەنگىزىلدى, ساقتاندىرۋ سالاسىن ودان ءارى تسيفرلاندىرۋ ءۇشىن قۇقىقتىق بازا قۇرىلدى. سونداي-اق ساقتاندىرۋ قىزمەتتەرىن تۇتىنۋشىلاردىڭ قۇقىقتارىن قورعاۋ جۇيەسى جانە كوپ دارەجەدە ساقتاندىرۋ تولەمدەرىنە كەپىلدىك بەرۋ جۇيەسى رەفورمالاندى», دەدى م.ابىلقاسىموۆا.
ساقتاندىرۋ نارىعىن دامىتۋ ماسەلەلەرى جونىندەگى زاڭمەن قورعا قارجى ۇيىمى مارتەبەسى بەرىلدى جانە ونىڭ ماجبۇرلەپ تاراتىلاتىن ساقتاندىرۋ ۇيىمدارى كليەنتتەرىنىڭ قۇقىقتارىن قورعاۋدى قامتاماسىز ەتۋدەگى ءرولى تۇجىرىمدامالىق تۇردە قايتا قارالدى.
زاڭمەن قور كەپىلدىكتەرى ساقتاندىرۋدىڭ 10 سىنىبىنا, ونىڭ ىشىندە بارلىق مىندەتتى ساقتاندىرۋ سىنىبىنا (8), مەملەكەتتىك ءبىلىم بەرۋ جيناقتاۋ جۇيەسى شەڭبەرىندە ءومىردى ساقتاندىرۋعا جانە زەينەتاقى اننۋيتەتتىك ساقتاندىرۋعا قولدانىلادى.
تولىق كەپىلدىك بەرۋ جۇيەسىنە كوشۋ تەتىگى قۇرىلدى. بۇل قوردىڭ ۋاكىلەتتى ورگانى ساقتاندىرۋ ۇيىمىن ليتسەنزياسىنان ايىرعان ساتتەن باستاپ كەپىلدىك تولەمدەرىن جۇزەگە اسىرۋىن كوزدەيدى. تاراتىلاتىن ساقتاندىرۋ ۇيىمىنىڭ ساقتاندىرۋدىڭ كەپىلدىك بەرىلگەن سىنىپتارى بويىنشا ساقتاندىرۋ پورتفەلى قوردىڭ كەپىلدىك بەرۋ رەزەرۆتەرى ەسەبىنەن جاڭا ساقتاندىرۋشىعا بەرىلەدى.
«جيناقتالعان كەپىلدەندىرۋ رەزەرۆتەرىن ەسەپتەگەندە, قوردىڭ كەپىلدىك بەرىلگەن تولەمدەر بويىنشا تابىستى تاجىريبەسى اگەنتتىككە ەڭ ۇزدىك حالىقارالىق تاجىريبەنى ەسكەرە وتىرىپ, قازاقستاننىڭ كەپىلدىك بەرۋ جۇيەسىن جەتىلدىرۋگە مۇمكىندىك بەردى», دەدى م.ابىلقاسىموۆا.
اگەنتتىك توراعاسى مۇنداي ماڭىزدى ءىس-شارانى وتكىزۋ بولاشاقتا حالىقارالىق بايلانىستاردى نىعايتۋعا مۇمكىندىك بەرەتىن جانە قازاقستاننىڭ ساقتاندىرۋ نارىعىن دامىتۋدىڭ جاڭا باعىتىن بەرەتىن جىل سايىنعى جاقسى داستۇرگە اينالۋى مۇمكىن ەكەنىن اتاپ ءوتتى.