مەملەكەت باسشىسى قاسىم-جومارت توقاەۆ قازاقستان حالقىنا كەزەكتى جولداۋىن جاريالادى. «ادىلەتتى قازاقستاننىڭ ەكونوميكالىق باعدارى» اتتى ماڭىزدى قۇجاتتا وسىعان دەيىن ىسكە اسقان جۇمىستار قورىتىندىلانىپ, الداعى جاڭا ماقسات-مىندەتتەر سارالاندى.
بۇل جولداۋ ەلدىڭ الەۋمەتتىك-ەكونوميكالىق دامۋىنىڭ بارلىق باعىتى بارىنشا قامتىلعان, حالقىمىز ءۇشىن وتە ماڭىزدى جانە ءار ازاماتتىڭ كوكەيىندە جۇرگەن ماسەلەلەردى ناقتى شەشۋگە ارنالعان قۇجات بولدى. باستى ماقساتى – وتانداستارىمىزدىڭ ءال-اۋقاتىن جاقسارتۋ, ءومىر ءسۇرۋ ساپاسىن ارتتىرۋ جانە باسەكەگە توتەپ بەرە الاتىن ەل بولۋ.
جولداۋدا ەكونوميكا مەن ءوندىرىستىڭ نەگىزگى قوزعاۋشى كۇشتەرىنىڭ ءبىرى اۋىل شارۋاشىلىعىنا اسا ءمان بەرىلگەن. ەلىمىزدىڭ اگرارلى مەملەكەت رەتىندە الەۋەتى زور ەكەنى ۇنەمى ايتىلىپ كەلەدى. بۇل سالانىڭ پروبلەمالارى مەن ونى شەشۋدىڭ ءتۇرلى تەتىكتەرى تۇزىلگەن مەملەكەتتىك باعدارلامالار دا جەتىپ ارتىلادى. اگروونەركاسىپ كەشەنىن دامىتۋ جوبالارىن جەدەل قولعا الىپ, وسى سالاداعى شاعىن جانە ورتا بيزنەس نىساندارىن قولداۋ شارالارىن ارتتىرۋ جونىندەگى مەملەكەت باسشىسىنىڭ ناقتى تاپسىرمالارىن بىزدەر, وسى سالامەن تۇراقتى شۇعىلدانىپ كەلە جاتقان كاسىپ يەلەرى اسا ىقىلاسپەن قابىل الدىق.
كەيىنگى جىلدارى الماتى وبلىسىنىڭ بالقاش اۋدانىندا مەملەكەت باسشىسىنىڭ الداعى جىلدارداعى جولداۋلارىندا ايشىقتالعان باعىت-باعدارلار ۇدەسىنەن شىعا وتىرىپ, بەرىلگەن تاپسىرمالاردى ورىنداۋ ماقساتىندا بىرقاتار جۇمىس اتقارىلدى. وتكەن جىلى «بيزنەستىڭ جول كارتاسى 2025» باعدارلاماسى بويىنشا جوسپارلانعان بەس جوبانىڭ ەكەۋى جۇزەگە اسىرىلدى.
الىس اۋىلدارعا قاتىنايتىن جولداردىڭ ساپاسى سىن كوتەرە بەرمەيدى. وسى جىلى جولداردى ورتاشا جوندەۋگە: بەرەكە اۋىلىنا – 33,5 ملن تەڭگە, جەلتوراڭعى اۋىلىنا – 27,8 ملن تەڭگە, قۇيعان اۋىلىنا 67,8 ملن تەڭگە قارجى قاراستىرىلعان ەدى, جۇمىستارى تامىز ايىندا اياقتالدى. ەندى كوكتال اۋىلىنا 49,6 ملن تەڭگە ءبولىنىپ وتىر.
باقاناس اۋىلىنداعى 5 قاباتتى, 20 پاتەرلى, جالپى اۋدانى 4,7 مىڭ شارشى مەتر تۇرعىن ءۇي قۇرىلىسى اياقتالىپ, پايدالانۋعا بەرىلدى.
قاروي اۋىلىنداعى ۇلگىلى ورتا مەكتەبىن كۇردەلى جوندەۋدەن وتكىزۋگە 489 753 مىڭ تەڭگە قارجى ءبولىنىپ, جۇمىستار وتكەن جىلدىڭ جەلتوقسان ايىندا تياناقتالدى.
مىنە, وسى جانە باسقا, تۇرعىنداردىڭ قالىپتى, جايلى ءومىر سۇرۋىنە باعىتتالعان جۇمىستاردىڭ بارلىعى – مەملەكەت باسشىسىنىڭ بۇرناعى جولداۋلارىندا, سونداي-اق «Amanat» پارتياسىنىڭ سايلاۋالدى باعدارلاماسىندا ايشىقتالعان ماقسات-مىندەتتەر. الدا اتقارىلاتىن جۇمىستار تىزبەسى دە اسا قوماقتى. اتاپ ايتقاندا, كۇرىش قاۋىزىن كەشەندى كادەگە جاراتۋ زاۋىتىن سالىپ, پايدالانۋعا بەرۋ, قامىستى تەرەڭ وڭدەۋ زاۋىتىن اشۋ, تاۋارلى-ءسۇت فەرماسى, جىلىجاي قۇرىلىستارىن جوسپارلاۋ, ەلدى مەكەندەردىڭ ىشكى كوشە جولدارىن ورتاشا جوندەۋدەن وتكىزۋ, سۋ قۇبىرى جەلىلەرىن, ماگيسترالدىق گاز قۇبىرىن سالۋ, الەۋمەتتىك ينفراقۇرىلىم نىساندارىنا: مەديتسينالىق مەكەمەلەر, بالاباقشا, مەكتەپتەرگە, سپورت الاڭدارىنا جوندەۋ جۇرگىزۋ, دەمالىس ورىندارىن, ساۋدا نۇكتەلەرىن, قوعامدىق تاماقتاندىرۋ نىساندارىن, قىزمەت كورسەتۋ كاسىپورىندارىن زاماناۋي تالاپتارعا ساي جاڭعىرتۋ, جابدىقتاۋ, تاعىسىن تاعىلار.
اگروونەركاسىپ كەشەنى قىزمەتكەرلەرى ءۇشىن وندىرىسكە قاجەتتى تەحنيكالاردىڭ, قۇرال-جابدىقتاردىڭ ءمان-ماڭىزى ەرەكشە. قازىر كوپشىلىك قىزمەتكەرلەر, شارۋالار قول كۇشى ەمەس, وزىق تەحنولوگيا جەتىستىكتەرىنە ءجيى جۇگىنەدى. وسى تۇرعىدا قولدا بار تەحنيكانىڭ ازىپ-توزعانىن پرەزيدەنت ەرەكشە اتاپ ءوتتى.
بۇل دا ءبىزدىڭ اۋداندا وتكىر ماسەلە بولىپ قالىپ وتىر. دەگەنمەن ىسكە اسىپ جاتقان جۇمىستار دا جوق ەمەس. ايتالىق, اۋىل تۇرعىندارىنىڭ تابىسىن ارتتىرۋ جانە ازىق-ت ۇلىك قاۋىپسىزدىگىن قامتاماسىز ەتۋ بويىنشا جىل سايىن كەمىندە 10 اۋىل شارۋاشىلىعى تەحنيكاسىن ساتىپ الۋ جوسپارلانعان. وتكەن جىلى 153 ملن 494 مىڭ 176 تەڭگەگە 10 جاڭا اۋىل شارۋاشىلىعى تەحنيكاسى ساتىپ الىندى. بۇل جوسپار بيىل دا ورىندالۋعا ءتيىس.
جولداۋدا ەڭبەك ادامىن لايىقتى باعالاۋ, مارتەبەسىن ارتتىرۋ جايىندا دا جاقسى ايتىلدى. وسى تۇرعىدا جەر-جەرلەردە كاسىبي مامانداردىڭ تاپشىلىعىن العا تارتا كەلىپ, اگروعىلىمدى دامىتۋ ماسەلەسىن كۇن تارتىبىنە قويدى. اگرارلىق عىلىمنىڭ ويداعىداي دامىماۋى, تۇپتەپ كەلگەندە, اۋىل شارۋاشىلىعى ءوندىرىسىنىڭ توقىراۋىنا, الەمدىك وزىق ۇلگىلەردەن كەيىندەپ قالۋىنا سەبەپ بولادى.
قانشا دەگەنمەن اۋىل شارۋاشىلىعى سالاسى مەملەكەت تاراپىنان قولداۋ كورمەي وتىر دەپ ايتا المايمىز. جوعارىدا ايتقانىمىزداي, كوپتەگەن باعدارلاما, جوبا بار. شارۋاشىلىق جەلىلەرىن, ناۋقاندىق جۇمىستاردى سۋبسيديالاۋ دا بارىنشا جولعا قويىلعان. ۇكىمەت سۋبسيديا ءبولۋ شاراسى مەملەكەت تاراپىنان جالعاسا بەرەتىنىنە سەندىرىپ وتىر.
اگروسەكتوردى دامىتۋعا قاتىستى اتقارىلۋعا ءتيىس مىندەتتەردى مەملەكەت باسشىسى تاعى دا ايقىنداپ بەردى. ۇلكەن ءارى باستى ميسسيا – ىشكى نارىقتى قامتاماسىز ەتىپ قانا قويماي, ەۋرازياداعى باستى اگرارلىق ورتالىققا اينالۋ, وڭدەلگەن ءونىم ۇلەسىن 70 پايىزعا جەتكىزۋ. ول ءۇشىن تاۋاردى شيكىزات كۇيىندە ساتا بەرمەي, ەت, ءسۇت, استىق ونىمدەرىن تەرەڭ وڭدەۋ باعىتىن دامىتۋ كەرەك. ونى وتكىزەتىن نارىق تا ۇلكەن. الپاۋىت قىتاي, رەسەي ەلدەرىن ايتپاعاندا, تۋىستاس, باۋىرلاس قىرعىزستان, وزبەكستان, تاجىكستان ەلدەرى دە ءبىزدىڭ اۋىل شارۋاشىلىعى ونىمدەرىن كوپتەپ الۋعا قىزىعۋشىلىق تانىتىپ وتىر.
جوعارىدا اتالعان ماڭىزدى مىندەتتەرمەن قوسا جولداۋدا ەڭبەك نارىعى, كاسىپكەرلىكتى قولداۋ, سۋ تاپشىلىعى ماسەلەسىن شەشۋ, سالىق ساياساتىن جەتىلدىرۋ سىندى, اۋىل شارۋاشىلىعى سالاسى قىزمەتكەرلەرى ءۇشىن اسا قاجەت ماسەلەلەر ايشىقتالدى. جولداۋدىڭ ءون بويىنان ەلىمىزدىڭ بولاشاعىنا دەگەن جاڭا كوزقاراس, سونى باعىت, مول مۇمكىندىكتەر تىزبەگى ايقىن اڭعارىلادى. ءبىر سوزبەن, پرەزيدەنت جولداۋىندا الەمدەگى ءتۇرلى شيەلەنىستەر, داعدارىستار جاعدايىنداعى ەلدىڭ الەۋمەتتىك-ەكونوميكالىق دامۋ باعىتى ناقتى كورىنىس تاپقان. ەلىمىزدىڭ ءاربىر تۇرعىنى وسىنداي سىندارلى ساتتە جاسالعان جولداۋدىڭ ءمان-ماڭىزىن تەرەڭ ۇعىنىپ, ونداعى تاپسىرمالاردىڭ رەتتىلىكپەن جۇزەگە اسۋىنا جۇمىلا ۇلەس قوسۋعا ءتيىس. مەملەكەت باسشىسىنىڭ باستاماسىمەن قولعا الىنعالى وتىرعان ءاربىر جۇمىسقا بەلسەنە كىرىسىپ, ادىلەتتى قازاقستاندى جاڭعىرتا وتىرىپ, جاڭارتۋ جولىندا بىرلىگىمىزدى كورسەتۋ, قاجىر-قايراتىمىزدى تانىتۋ بارشامىزعا ورتاق بورىش دەپ بىلەمىن.
ەربولات قۇسايىنوۆ,
الماتى وبلىستىق ءماسليحاتىنىڭ دەپۋتاتى,
«Amanat» پارتياسىنىڭ مۇشەسى