فۋتبولدان قازاقستان ۇلتتىق قۇراماسى ەۋرو – 2024 ىرىكتەۋ تۋرى اياسىنداعى كەزەكتى ماتچىن وتكىزىپ, «استانا ارەنا» ستاديونىندا فينليانديا قۇراماسىنا 0:1 ەسەبىمەن ەسە جىبەردى. ويىننىڭ 78-مينۋتىندا وليۆەر انتمان ەنشىسىنە گول جازدى. جەڭىلىسكە قاتىستى ۇلتتىق قۇرامانىڭ باس باپكەرى ماگومەد اديەۆ ءوزىنىڭ پىكىرىن ءبىلدىردى, دەپ حابارلايدى Egemen.kz.
«امال قانشا, ۇتىلدىق, ولاردىڭ مىقتىلىعىن مويىنداۋ كەرەك, بىراق بىزگە تەڭ ناتيجەمەن تارقاسۋعا دا مۇمكىندىك بار ەدى. گول سوعاتىن وراي ولاردا دا, ءبىزدىڭ جىگىتتەردە دە بولدى. ماتچتىڭ 2-تايمى دا تەڭ ناتيجەمەن اياقتالار دەپ ويلاعام, بىراق قارسىلاستار گول سوعىپ كەتتى. الاڭنىڭ ورتاسىندا دا باسىمدىقتى ءوز قولىمىزعا الۋعا ۇمتىلدىق, تاكتيكالىق جوسپار بويىنشا جەڭىسكە جەتۋگە بارىمىزدى سالدىق. بۇل جەڭىلىستەن كەيىن كەلەسى ماتچقا باسقا جوسپار تۇزەمىز, وزگەرىستەر بولادى. قارسىلاستىڭ ءبارى تەگەۋرىندى, كەز كەلگەن قۇراما ۇپاي جوعالتادى, جەڭىستى مەرەكەلەۋمەن قاتار جەڭىلىستى دە كوتەرە ءبىلۋ كەرەك. راس, ءبىزدى قولداۋعا قارا ورمان جانكۇيەر كەلدى, ستاديوننىڭ اۋراسى ءتىپتى بولەك بولعانىن جان جۇيەمىزبەن سەزىندىك. وسىنداي قولداۋ مەن قۇرمەتتىڭ وتەۋىنە جەڭىس سىيلاۋعا تىرىستىق. جەڭىلىستى قابىلداۋ جانكۇيەرگە دە قيىن, اۋىر سوعادى, باس باپكەر ءۇشىن دە جۇرەككە از سالماق ەمەس», دەدى ماگومەد اديەۆ.
ۇلتتىق قۇراما ەۋروپا چەمپيوناتىنا ىرىكتەۋدىڭ كەلەسى تۋرىن 10 قىركۇيەك كۇنى «استانا ارەنا» ستاديونىندا سولتۇستىك يرلانديا قۇراماسىنا قارسى وتكىزەدى.