پاۆلودار وبلىسىندا بيزنەس-باستامالاردى ىسكە اسىرۋ ءۇشىن 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا شەڭبەرىندە بيىل 463 گرانت جانە مەملەكەت باسشىسىنىڭ تاپسىرماسىن ىسكە اسىرۋ اياسىندا جاستارعا 157 ميكروكرەديت بەرۋ كوزدەلگەن. بۇگىنگى تاڭدا 263 گرانت پەن 136 ميكروكرەديت بەرىلدى. مەملەكەتتىك قولداۋ الۋشىلار ءوز ىستەرىن ءساتتى ىسكە اسىرىپ جاتىر, دەپ حابارلايدى Egemen.kz ەڭبەك جانە الەۋمەتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
گرانتتاردىڭ كوپشىلىگى, ياعني 47,9%-ى نەمەسە 126 گرانت مال شارۋاشىلىعىنا, 36,9%-ى نەمەسە 97 گرانت تەحنولوگيالىق جابدىقتاردى ساتىپ الۋعا بەرىلدى.
بيىل 11 قىركۇيەكتە باستالاتىن ءۇشىنشى لەكتە وبلىس بويىنشا 200 گرانت بەرۋ جوسپارلانعان. جالپى رەسپۋبليكا بويىنشا 3 780 گرانت بەرىلەدى.
بۇدان باسقا وسى جىلدىڭ باسىنان باستاپ جاستاردىڭ كاسىپكەرلىك باستامالارىنا جىلدىق 2,5%-بەن ميكروكرەديت بەرۋ تۇرىندە جاردەمدەسۋ شاراسى كوزدەلگەن. پاۆلودار وبلىسىندا جاستار ءۇشىن 157 ميكروكرەديت بەرۋ جوسپارلانعان, بۇل ماقساتقا رەسپۋبليكالىق بيۋدجەتتەن 785 ملن تەڭگە ءبولىندى. قازىرگى ۋاقىتتا جالپى سوماسى 530,4 ملن تەڭگەگە 136 ميكروكرەديت بەرىلدى.
جاس كاسىپكەرلەرگە ميكروكرەديتتەر ۇزدىك بيزنەس-جوبالاردى ىرىكتەۋ جونىندەگى كونكۋرستىق كوميسسيانىڭ شەشىمى نەگىزىندە «اگرارلىق كرەديتتىك كورپوراتسيا» اق اتىنان سەنىم بىلدىرىلگەن اگەنت ارقىلى بەرىلەدى.
400 اەك كولەمىندە گرانت الۋشىلاردىڭ ءبىرى ەكىباستۇز قالاسىنىڭ تۇرعىنى سۆەتلانا لەيس. ول مەملەكەتتىك قولداۋدىڭ بۇل شاراسى تۋرالى الەۋمەتتىك جەلىلەردەن ءبىلىپ, قاتىسۋعا شەشىم قابىلداعان.
«اقپان ايىندا قالالىق جۇمىسپەن قامتۋ ورتالىعىنا حابارلاسىپ, بارلىق قاجەتتى اقپاراتتى الدىم. ناتيجەسىندە كاسىپكەرلىك نەگىزدەرى بويىنشا وقىپ, سەرتيفيكات الدىم», دەدى س.لەيس.