شومىلۋ ماۋسىمى اياقتالدى

توتەنشە جاعدايلار مينيسترلىگىنىڭ حابارلاۋىنشا, جاز مەزگىلىندە قۇتقارۋشىلار سۋعا باتقان 136 ادامدى, ونىڭ ىشىندە 51 بالانىڭ ءومىرىن اراشالاپ قالدى. بۇل مينيسترلىكتىڭ ماماندارى جاز باستالماس بۇرىن جانە ماۋسىم كەزىندە دە پروفيلاكتيكالىق جۇمىستار جۇرگىزىپ, ازاماتتارعا سۋداعى قاۋىپسىزدىك ەرەجەلەرىن ساقتاۋدى ءتۇسىندىردى.

بىراق بارلىق جەردە جۇرگىزىلگەن جۇمىستارعا قاراماستان, جازدىڭ ءۇش ايىندا 177 ادام, ونىڭ ىشىندە 53 كامەلەتكە تولماعاندار سۋعا باتىپ كەتتى. سالىستىرمالى تۇردە ايتساق, وتكەن جىلعى شومىلۋ ماۋسىمىندا 184 ادام سۋعا باتىپ كەتتى, سونىڭ ىشىندە 62-ءسى كامەلەتكە تولماعان ەدى.

بيىل سۋعا باتقانداردىڭ 98 پايىزى جابدىقتالماعان جاعاجايلاردا شومىلعان. سۋداعى ءولىمنىڭ نەگىزگى سەبەپتەرى – ءوز كۇشىن اسىرا باعالاۋ, ماس كۇيىندە سۋعا ءتۇسۋ, جۇزە الماۋ. ال بالالاردىڭ سۋعا باتۋىنىڭ باس­تى سەبەبى – ولاردى ەرەسەكتەردىڭ قاراۋسىز قالدىرۋى.

جالپى, رەسپۋبليكا بويىنشا سۋدا جاپپاي دەمالۋعا رۇقسات ەتىلگەن 612 ورىن بار. 4 285 ورىن سۋعا تۇسۋگە قاۋىپتى دەپ تانىلىپ, سۋعا تۇسۋگە تىيىم سالىنعان ورىندار تىزىمىنە ەنگىزىلگەن. تىيىم سالىنعان جانە رۇقسات ەتىلگەن شومىلۋ ايماقتارى تۋرالى دەرەكتەر 2GIS پلاتفورماسىندا ورنالاستىرىلعان.