بيىل ەكىنشى رەت ۇيىمداستىرىلىپ وتىرعان « ۇلى دالا جورىعى» رەسپۋبليكالىق مارافون-بايگەسىنە ءار وڭىردەن 19 كوماندا قاتىستى. ولار كەشە ەلوردا ىرگەسىندەگى قاراجار اۋىلىنان جورىققا اتتانىپ كەتتى. شاباندوزدار 1 300 شاقىرىم قاشىقتىقتا جارىساتىن مارافون-بايگە 19 قىركۇيەك كۇنى تۇركى الەمىنىڭ رۋحاني استاناسى – تۇركىستان شاھارىندا ءوز مارەسىنە جەتەدى.
جورىققا قاتىسۋشىلاردى شىعارىپ سالۋ شاراسىنا مارافونعا ۇيىتقى بولعان ۇلتتىق سپورتتىڭ جاناشىرلارى – «Amanat» پارتياسىنىڭ اتقارۋشى حاتشىسى داۋلەت كارىبەك, تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى بەكبولات بايجانوۆ, ۇلتتىق سپورت قاۋىمداستىعىنىڭ توراعاسى يسلامبەك سالجانوۆ, «Joryq» ات سپورتى فەدەراتسياسى قامقورشىلىق كەڭەسىنىڭ توراعاسى الىبەك الدەنەي قاتىستى.
ايتۋلى شارادا ۇلتتىق سپورت قاۋىمداستىعىنىڭ توراعاسى يسلامبەك سالجانوۆ مارافون-بايگەنىڭ ماڭىزدىلىعىنا توقتالا كەلە, جوبانى ۇيىمداستىرعان جانە وعان قولداۋ بىلدىرگەن ازاماتتارعا العىسىن ءبىلدىردى.
«كەشە عانا ۇلتتىق سپورت تۇرلەرى بويىنشا VI فەستيۆالدىڭ رەسمي اشىلۋىن وتكىزدىك. ال بۇگىن بارشامىز ەكىنشى رەت ۇيىمداستىرىلىپ وتىرعان « ۇلى دالا جورىعىنىڭ» باستالۋ سالتاناتىنا جينالىپ وتىرمىز. ۇلتتىق سپورت قاۋىمداستىعى 2 جىل قاتارىنان سەرىكتەس بولىپ, « ۇلى دالا جورىعى» جوباسىن قولداپ وتىر. ۇلتتىق سپورتىمىز – اتا-بابالارىمىزدان بىزگە قالعان اسىل مۇراسى جانە اماناتى. ۇلتتىق سپورتتىڭ ارتىندا ۇلتىمىزدىڭ رۋحى مەن نامىسى, تاريحى مەن سالت-ءداستۇرى تۇر. ۇلتتىق سپورتىمىز – ەلىمىزدى بىرىكتىرەتىن نەگىزگى فاكتورلاردىڭ ءبىرى.
مەملەكەت باسشىسى قاسىم-جومارت توقاەۆ ۇلتتىق سپورتتىڭ دامۋى مەن ناسيحاتتالۋىنا ەرەكشە نازار اۋدارىپ وتىر. « ۇلى دالا جورىعى» – الەمدە جوق رەسپۋبليكالىق مارافون-بايگە. بۇگىن وسى بايگەگە ەلىمىزدىڭ بارلىق ايماعىنان 100-دەن اسا شاباندوز قاتىستى. بارلىعىنا ساتتىلىك تىلەيمىن!» دەدى يسلامبەك تولەۋباي ۇلى.
« ۇلى دالا جورىعى» مارافونىنىڭ جالپى جۇلدە قورى – 65 ملن تەڭگە. جەڭىمپاز كومانداعا – 30 ملن تەڭگە, 2-ورىنعا – 20 ملن تەڭگە, ال 3-ورىنعا 15 ملن تەڭگە تابىستالماق. مارافون-بايگەنىڭ ۇيىمداستىرۋشىسى عاني دۇيشەنوۆتىڭ ايتۋىنشا, جورىق بارىسىن 2 حالىقارالىق جانە 2 وتاندىق تورەشى باعالاسا, ال جول بويى اتتاردىڭ جاعدايىن 2 حالىقارالىق جانە 3 ءوز ەلىمىزدىڭ مال دارىگەرى قاداعالايدى.
«جورىق 14 كەزەڭنەن تۇرادى. ءبىرىنشى كەزەڭ – 50 شاقىرىم. ودان كەيىنگى 12 كەزەڭدە 100 شاقىرىمداپ ءجۇرىپ وتىرادى. سوڭعى 14-كەزەڭدە 50 شاقىرىم جولدى باعىندىرىپ, تۇركىستاندا مارەگە جەتەدى. اتىراۋ وبلىسىنان باسقا بارلىق وڭىردەن كوماندالار قاتىسىپ جاتىر, بارلىعى مارافونعا ساقاداي-ساي. كەشە اتتار ۆەتەريناريالىق تەكسەرۋدەن ءوتتى», دەدى ع.دۇيشەنوۆ.
ايتا كەتسەك, « ۇلى دالا جورىعى» مارافون-بايگەسى رەسپۋبليكالىق «Joryq» ات سپورتى فەدەراتسياسىنىڭ, تۋريزم جانە سپورت مينيسترلىگىنىڭ, «امانات» پارتياسىنىڭ جانە ۇلتتىق سپورت تۇرلەرى قاۋىمداستىعىنىڭ قولداۋىمەن ءوتىپ جاتىر.