پرەمەر-مينيستر ءاليحان سمايىلوۆ ەلىمىزگە رەسمي ساپارمەن كەلگەن يتاليا مينيسترلەر كەڭەسى توراعاسىنىڭ ورىنباسارى – سىرتقى ىستەر جانە حالىقارالىق ىنتىماقتاستىق ءمينيسترى انتونيو تايانيمەن كەزدەستى, دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
يتاليا قازاقستاننىڭ الەم بويىنشا ءىرى ءۇش ساۋدا سەرىكتەسىنىڭ ءبىرى سانالادى. ءارى ەۋروپالىق وداق ەلدەرى اراسىندا ءبىرىنشى ورىندا تۇر. بىلتىر ەكى ەلدىڭ تاۋار اينالىمى 55%-عا جۋىق ارتىپ, شامامەن $15 ملرد-قا جەتتى. يتاليا ەۋروپالىق وداق ەلدەردىڭ اراسىندا قازاقستان ەكونوميكاسىنىڭ وركەندەۋى ءۇشىن ارىپتەستىك ورناتقان ءىرى ينۆەستورلاردىڭ بەستىگىنە كىرەدى. سوڭعى 17 جىلدا جالپى تارتىلعان ينۆەستيتسيالار كولەمى $7,3 ملرد-قا جەتتى. بىلتىرعى جىلدىڭ قورىتىندىسى بويىنشا شامامەن 2,5 ەسە ءوسىپ, $300 ملن-عا جۋىقتادى.
«دەگەنمەن تاۋار اينالىمىن ودان ءارى ارتتىرۋعا الەۋەتىمىز جەتكىلىكتى. ءبىز يتالياعا جالپى قۇنى $900 ملن-نان اساتىن قازاقستاندىق 110 تاۋار ءونىمىنىڭ ەكسپورتىن ارتتىرۋعا دايىنبىز», دەدى ءاليحان سمايىلوۆ.
انتونيو تاياني يتاليا قازاقستانمەن جان-جاقتى, اسىرەسە ساۋدا, ەنەرگەتيكا جانە ونەركاسىپ بويىنشا ىنتىماقتاستىقتى نىعايتۋعا قاشاندا قۇمبىل ەكەنىن جەتكىزدى. ء«بىز يتاليادا بىرلەسكەن كاسىپورىنداردى, جاڭا قازاقستاندىق كومپانيالاردى اشۋعا دايىنبىز. سونداي-اق كاسىپورىندارىمىز اراسىنداعى ىنتىماقتاستىقتى ودان ءارى نىعايتۋعا ىقپال ەتەتىن ىسكەرلىك كەڭەس قۇرۋعا نيەتتىمىز», دەدى ول.
ا.تاياني الماتىدا جاڭا يتالياندىق مادەنيەت ينستيتۋتىن اشۋدىڭ ماڭىزى زور ەكەنىن, ەكى ەل اراسىندا ستۋدەنتتەر الماسۋدى ارتتىرۋعا مۇمكىندىك بەرەتىنىن ايتتى.