وقۋ-اعارتۋ ءمينيسترى قازاقستاندىقتاردى ءبىلىم كۇنىمەن قۇتتىقتادى

«قۇرمەتتى ارىپتەستەر! قادىرلى ۇستازدار, وقۋشىلار, اتا-انالار! سىزدەردى بۇگىنگى ءبىلىم كۇنىمەن جانە جاڭا وقۋ جىلىنىڭ باستالۋىمەن قۇتتىقتايمىن! ءبىلىمنىڭ جاڭا كوكجيەگىن يگەرۋگە, تىڭ ىزدەنىستەر مەن جاھاندىق ماقساتتارعا ۇمتىلعان ءۇش ميلليوننان استام جاس ورەننىڭ الدىندا جاڭا مۇمكىندىكتەر اشىلماق», دەلىنگەن ءمينيستردىڭ قۇتتىقتاۋىندا.

ۆەدومستۆو باسشىسىنىڭ ايتۋىنشا, بيىل 130 مىڭنان استام وقۋشى سۋ جاڭا مەكتەپتەردە وقۋدى باستايدى. اۋىلدىق جەرلەردەگى ءبىلىم دەڭگەيىن دامىتۋعا دا ەرەكشە كوڭىل ءبولىنىپ كەلەدى. ماسەلەن, بيىل 1 مىڭ اۋىل مەكتەبى قايتا جاڭعىرتىلىپ, پاندىك كابينەتتەر اشىلادى, كىتاپحانالار مەن اسحانالارى, جيھازدارى جاڭارتىلادى. ايتا كەتسەك, بيىل العاش رەت اۋىل مەكتەپتەرى اراسىندا رەسپۋبليكالىق وليمپيادا ۇيىمداستىرىلادى. عاني بەيسەمباەۆ اتاپ وتكەندەي, مۇنىڭ ءبارى وتاندىق ءبىلىم ساپاسىن ارتتىرۋ, بالالار ءۇشىن قاۋىپسىز جانە قولايلى جاعداي جاساۋ ماقساتىندا قولعا الىندى.

«اينالايىن, بالدىرعاندار, ءبىرىنشى سىنىپ وقۋشىلارى! بۇگىن سىزدەردىڭ ومىرلەرىڭىزدەگى ەڭ قىزىقتى ءارى ماڭىزدى كۇن. العاشقى قوڭىراۋدىڭ سىلدىرىمەن تاڭعاجايىپ ءبىلىم الەمىنە ساياحاتتى باستايسىزدار. بيىل 366 مىڭ ءبۇلدىرشىن مەكتەپ تابىلدىرىعىن اتتاپ, ءبىرىنشى سىنىپقا بارادى. ال, 11 سىنىپتاعى 188 مىڭ وقۋشى ءۇشىن بۇل التىن ۇيانىڭ قابىرعاسىنداعى سوڭعى جىل.

بۇگىنگى كۇننىڭ اتا-انالار ءۇشىن دە ماڭىزى ەرەكشە. پەرزەنتىن مەكتەپكە دايىنداپ, قوبالجيتىن ءسات. اركىم ءوزىنىڭ وقۋشى بولعان كەزدەرىن ساعىنىشپەن ەسكە الاتىن كۇن. بيىل العاش رەت كوللەدج ستۋدەنتى اتانعان 190 مىڭ جاس ءۇشىن بۇل - ۇلكەن ومىرگە العاشقى قادام جاسايتىن شەشۋشى كۇن. 

ءبىزدىڭ مۇعالىمدەر ءۇشىن بۇل كۇن سۇيىكتى جۇمىسىنا ورالاتىن, شاكىرتتەرىمەن قاۋىشاتىن كۇن. وسى ايدان باستاپ مەكتەپكە دەيىنگى ءبىلىم بەرۋ ۇيىمدارىنداعى 100 مىڭعا جۋىق پەداگوگتىڭ جالاقىسى 30% - عا, ال كوللەدج ستۋدەنتتەرىنىڭ ستيپەندياسى 50%-عا وسەدى.

قادىرلى ارىپتەستەر!

جاڭا وقۋ جىلى ارقايسىڭىز ءۇشىن قىزىقتى ءارى پايدالى بولسىن! سىزدەردىڭ بارلىق باستامالارىڭىزعا ساتتىلىك, وتباسىلارىڭىزعا اماندىق, دەندەرىڭىزگە ساۋلىق تىلەيمىن! بىلىم كۇنى قۇتتى بولسىن!», دەپ تىلەگىن جەتكىزدى مينيستر.