دەننىڭ ساۋلىعىنان اسقان بايلىق جوق. ءبىرىنشى بايلىقتىڭ قادىرىن ءبىلىپ, بۇقارالىق سپورتتى سەرىك ەتەتىندەر كوبەيىپ كەلەدى. اتىراۋ وبلىستىق دەنە شىنىقتىرۋ, سپورت جانە تۋريزم باسقارماسىنىڭ باسشىسى داستانبەك قوسپانوۆتىڭ ايتۋىنشا, قازىر 227 مىڭنان اسا تۇرعىن سپورتپەن تۇراقتى شۇعىلدانادى. بۇل كورسەتكىش وتكەن جىلمەن سالىستىرعاندا 1,3%-عا وسكەن.
«وبلىستا 2025 جىلعا دەيىن بۇقارالىق سپورتپەن تۇراقتى اينالىسۋشىلار سانىن 50%-عا ارتتىرۋ جوسپارلانىپ وتىر. قازىر كاسىبي ماقساتتا اشىلعان 9 سپورت كلۋبى جۇمىس ىستەيدى. مۇندا جاتتىعۋشىلار قاتارى 4 276-عا جەتتى. ۇلتتىق سپورت, باسكەتبول, ۆولەيبول, سۋ سپورتى كلۋبتارى جەكەشەلەندىرىلدى. ال حوككەي مەن فۋتبول, بوكس كلۋبتارى سەنىمگەرلىكپەن باسقارۋعا بەرىلدى», دەيدى داستانبەك قوسپانوۆ.
ونىڭ مالىمەتىنە سۇيەنسەك, جىل باسىنان بەرى بۇقارالىق سپورتتى دامىتۋ ماقساتىندا 800-دەن اسا سپورتتىق ءىس-شارا ۇيىمداستىرىلعان. وعان 150 مىڭنان استام ادام قاتىسىپتى. اۋىلداردا 560 ءىس-شارا ءوتىپ, 110 مىڭنان اسا تۇرعىن قامتىلعان. وبلىستا 1000 ادامعا شاققاندا تۇرعىنداردى سپورت ينفراقۇرىلىمىمەن قامتۋ دەڭگەيى 38,2%-دى قۇراپ وتىر. ەندى 2027 جىلعا دەيىن 26 سپورت كەشەنى سالىنىپ, بۇل كورسەتكىشتى 40%-دان اسىرۋ جوسپارلانعان.
قازىر اتىراۋ وبلىسىندا 1 217 سپورت نىسانى بار. بيىل يساتاي اۋدانىنىڭ تۇششىقۇدىق اۋىلىندا سپورت كەشەنى پايدالانۋعا بەرىلگەن. بۇعان قوسا, 8 سپورت نىسانىنىڭ قۇرىلىسى سالىنىپ جاتىر. ال 4 نىساندى قايتا جاڭعىرتۋ قولعا الىنعان. تاعى ەكى سپورت نىسانىن سالۋ كوزدەلگەن. ونىڭ ءبىرى – دارىندى بالالارعا ارنالعان سپورت مەكتەپ-ينتەرناتى. ەكىنشىسى – جاڭاتالاپ اۋىلىندا بوي كوتەرەتىن سپورت كەشەنى.
جاقىندا اتىراۋدا دارىندى بالالارعا ارنالعان سپورت مەكتەپ-ينتەرناتى اشىلدى. مەكتەپ-ينتەرناتتىڭ ديرەكتورى قايرات دوسقاليەۆتىڭ ايتۋىنشا, ءبىلىم ورداسىنا 150 بالا قابىلدانادى. بۇل وقۋ ورنىندا وقۋشىلار ەركىن كۇرەس, بوكس, دزيۋدو, تاەكۆوندو سەكىلدى وليمپيادالىق سپورت تۇرلەرى بويىنشا جاتتىعادى.
جاۋقازىن جاستاردى وليمپيادالىق سپورت تۇرلەرىنە باۋليتىن مەكتەپ-ينتەرناتتىڭ ازىرگە جەكە عيماراتى جوق. الايدا سپورتتىق باعىتتاعى ءبىلىم ورداسىنان ءتالىم العىسى كەلەتىن وقۋشى كوپ. سونداي ماقساتپەن قۇجات تاپسىرعاننىڭ ءبىرى – بەكزات مۇستاعاليەۆ. ماحامبەت اۋدانىندا تۇراتىن جاس ورەن 6 جىلدان بەرى دزيۋدونى سەرىك ەتكەن.
ء«بىز بۇل مەكتەپ-ينتەرناتتىڭ اشىلۋىن اسىعا كۇتتىك. ءوزىم تاڭداعان سپورت تۇرىنەن شەبەرلىك شىڭداپ, وليمپيادا چەمپيونى بولۋعا ۇمتىلامىن. ويتكەنى مۇندا بىلىكتىلىك ارتتىرۋ ءۇشىن مول مۇمكىندىك بار», دەيدى بەكزات مۇستاعاليەۆ.
بالالارىنىڭ سپورتپەن اينالىسقانىن قالايتىن اتا-انالاردىڭ قاتارىندا ماحامبەت اۋدانىنىڭ سارايشىق اۋىلىندا تۇراتىن قادىربەك شايماردانوۆ تا بار. ونىڭ دا نەمەرەسى دزيۋدونى جاقسى كورەدى. سول سەبەپتەن, جاڭا وقۋ ورداسىندا ءبىلىم العىسى كەلەدى.
«اۋىل بالالارى اتىراۋ قالاسىنداعى دزيۋدو كلۋبىنا كەلىپ, جاتتىعىپ ءجۇر ەدى. قالاعا قاتىناۋ ءۇشىن بالالار ۋاقىت جوعالتادى. ونىڭ ۇستىنە جولدا ءجۇرۋ شارشاتادى. ەندى جاڭا مەكتەپ-ينتەرنات اشىلعانىن ەستىپ, نەمەرەمدى ەرتىپ اكەلدىم. قازىر ولاردى وليمپيا ويىندارىنا دايىنداۋعا مۇمكىندىك جاسالىپ وتىر», دەيدى ق.شايماردانوۆ.
ەركىن كۇرەستەن الەم چەمپيونى تالعات سىربازدىڭ پىكىرىنشە, سپورتقا دەن قويعان ءار بالا قيىندىققا ءتوزىمدى بولعانى ءجون. ويتكەنى بۇل سالا توزىمدىلىكتى, ەڭبەكقورلىقتى قاجەت ەتەدى.
«وليمپيادا, الەم چەمپيوندارىنىڭ دەنى اۋىلدان شىعادى. مەن دە اۋىلدا ءوستىم. اۋىلدا جاتتىعىپ ءجۇرىپ, الەم چەمپيونى بولدىم. ەندى اۋىل بالالارىنىڭ وليمپيادالىق سپورت تۇرلەرىنە دايىندايتىن مەكتەپ-ينتەرناتتا شىڭدالاتىنىنا قۋانىپ تۇرمىن. بۇل – جاسوسپىرىمدەرگە بەرىلگەن ۇلكەن مۇمكىندىك. جاس سپورتشىلاردىڭ شەبەرلىگىن شىڭداپ, چەمپيون اتانۋى ءۇشىن شىدامدى ءارى ەڭبەكقور بولعانىن قالار ەدىم», دەيدى تالعات سىرباز.
اتىراۋ وبلىسى