ۇلتتىق ەكونوميكا ءمينيسترى الىبەك قۋانتىروۆ سولتۇستىك قازاقستان وبلىسىنا جۇمىس ساپارىمەن بارىپ, پەتروپاۆلدا 480 ورىندىق كوپبەيىندى وبلىستىق اۋرۋحانا قۇرىلىسىنىڭ بارىسىمەن تانىستى. جوبا 2020 جىلى ىسكە اسىرىلا باستادى, بىراق قۇرىلىس ماتەريالدارىنىڭ قىمباتتاۋىنا بايلانىستى ەكى جىلدان كەيىن توقتاتىلعان ەدى, دەپ حابارلايدى Egemen.kz قر ۇەم ءباسپاسوز قىزمەتىنە سىلتەمە جاساپ.
مەملەكەتتىك-جەكەمەنشىك ارىپتەستىك شەڭبەرىندە اۋرۋحانانىڭ جوبالىق قۇنى 144 ملرد تەڭگەنى قۇرادى. دەسە دە, جوبالاۋ-سمەتالىق قۇجاتتامانى ءالى دە تۇزەتۋ قاجەت. جىل سوڭىنا دەيىن مەملەكەتتىك ساراپتاما جۇرگىزۋ جوسپارلانىپ وتىر. بۇگىنگى تاڭدا جۇمىستىڭ جارتىسى ورىندالدى.
سونداي-اق مينيستر قىزىلجار اۋدانىنىڭ چاپاەۆو اۋىلىندا ءىرى قارا وسىرۋمەن جانە ءسۇت وندىرۋمەن اينالىساتىن «قىزىلجار ءسۇت» جشس جۇمىسىمەن دە تانىستى. وتكەن جىلى بۇل فەرماعا 366 ملن تەڭگەگە سۋبسيديا ءبولىندى. فەرما 60 جەرگىلىكتى تۇرعىندى تۇراقتى جۇمىسپەن قامتاماسىز ەتەدى.
ءسۇت-تاۋار كەشەنى 1 410 باس ءىرى قاراعا ەسەپتەلگەن, قۋاتى - جىلىنا 6 مىڭ توننا دايىن ءونىم. ال جوبانىڭ جالپى قۇنى 3,7 ملرد تەڭگەنى قۇرايدى.
سونىمەن قاتار مينيستر اققايىڭ اۋدانى ارالاعاش اۋىلىندا قۋاتتىلىعى جىلىنا 10 مىڭ توننا قۇس ەتىن وندىرەتىن «سولتۇستىك برويلەر» قۇس فابريكاسىن ارالادى. ءوڭىر ءۇشىن ماڭىزدى جوباعا 7,4 ملرد تەڭگە ينۆەستيتسيا قۇيىلدى. ايتا كەتسەك, بۇل كاسىپورىن ەڭ زاماناۋي جابدىقتارمەن جابدىقتالعان جانە تولىقتاي اۆتوماتتاندىرىلعان. بۇل اۋىلدىق وكرۋگتەگى 170-كە جۋىق ادامدى, نەگىزىنەن جەرگىلىكتى تۇرعىنداردى جۇمىسپەن قامتاماسىز ەتەتىن العاشقى ءىرى ينۆەستيتسيالىق جوبا.
جۇمىس ساپارىنىڭ سوڭىندا الىبەك قۋانتىروۆ ارالاعاش اۋىلىنىڭ تۇرعىندارىمەن كەزدەستى. ول مينيسترلىك باعدارلامالارى اياسىندا اۋىلدىق ەلدى مەكەندەرگە قانداي قولداۋ كورسەتىلەتىنىن ايتتى. ونىڭ ايتۋىنشا, ءىرى وندىرىستىك كاسىپورىنداردىڭ اشىلۋى ءوڭىردىڭ دامۋىنا جاڭا سەرپىن بەرمەك.