قاراعاندى جۇرتشىلىعى قىس تۇسە قالانى تۇمشالايتىن كوك تۇتىننەن ارىلاتىن شاق كوپ كۇتتىرمەيدى دەپ ۇمىتتەنەدى. بۇگىننىڭ وزىندە ءبىراز كوشەگە گاز كەلىپ تۇر. ەندىگى شارۋا تۇرعىندارعا تىكەلەي بايلانىستى. كوشەسىنە جەتكىزىلگەن گازدى ۇيىنە تارتىپ الۋ عانا قالىپ تۇر. وسى تۇستا جەرگىلىكتى بيلىكتىڭ دە قامسىز قاراپ وتىرماعانىن اتاپ ءوتۋىمىز كەرەك-اق. پايىزسىز نەسيە مەن الەۋمەتتىك كومەك قاراستىرىلىپ وتىر. كەتەتىن شىعىن ەسەبىن سۇراساڭىز, شامامەن ءبىر ءۇيدىڭ 150,2 تەكشە مەتر اۋماعىن جىلىتۋ ءۇشىن 770 مىڭ تەڭگە كولەمىندە قاراجات قاجەت.
جوعارىدا ايتا كەتكەنىمىزدەي, جەر ۇيدەگى جۇرتشىلىققا گاز تارتۋ ءۇشىن پايىزسىز نەسيە بەرىلەدى. ونىمەن قوسا الەۋمەتتىڭ ءالجۋاز توبىنداعى قاۋىمعا ءبىر رەتتىك الەۋمەتتىك كومەك كورسەتىلەدى. قاراعاندى قالاسىنىڭ بيۋدجەتىنەن. قاراعاندى ءتورت كەزەڭ ارقىلى تولىق گازبەن قامتىلادى. بۇل ءتورت كەزەڭدە 16 قوسۋ كەشەنى بار. 2021 جىلدان بەرى ءبىرىنشى جانە ەكىنشى قوسۋ بەكەتى تولىق اياقتالىپتى. ءبىرىنشى بەكەت ارقىلى قاراعاندىنىڭ 66 كوشەسىنە گاز جەتتى. وندا 1 695 ءۇي بار. ەكىنشى بەكەتتە – 55 كوشە. مۇنداعى ءۇي سانى – 2 471. جالپى, بۇگىندە 995 ۇيدە گاز بار.
اتالعان ۇيلەردىڭ 1 397-ءسى ابونەنتتىك تەحنيكالىق شارتتاردى العان. بىلتىردان بەرى ءۇشىنشى بەكەتتە جۇمىس قىزۋ ءجۇرىپ جاتىر. مۇندا 38 كوشە بولسا, گاز الاتىن ءۇي – 2 852 ەكەن.
– ءبىرىنشى پۋنكتتەگى 66 كوشەگە گاز جەتكىزەتىن 55 شاقىرىم, ەكىنشىدە 76 شاقىرىم گاز قۇبىرى توسەلدى. وتكەن جىلدان باستاپ, ءۇشىنشى پۋنكت بويىنشا جۇمىس ءجۇرىپ جاتىر. وندا 38 كوشەدەگى 2 852 ۇيگە گاز بەرەتىن 68 شاقىرىم سالىنادى. قاراعاندى قالاسى اكىمدىگى تاراپىنان تۇرعىنداردىڭ جەكەلەگەن ساناتتارىنا ۇيلەرىن گازداندىرۋعا بىرجولعى الەۋمەتتىك كومەك كورسەتىلەدى. مۇنداي الەۋمەتتىك كومەك جاسى بويىنشا زەينەتكەرلەرگە, مۇمكىندىگى شەكتەۋلى جاندارعا جانە مۇمكىندىگى شەكتەۋلى بالالارى بار, ولاردى تاربيەلەپ وتىرعان وتباسىلارعا, كوپبالالى انالار مەن كوپبالالى وتباسىلارعا, باسقا مەملەكەتتەر اۋماعىندا جاۋىنگەرلىك ارەكەتتەرگە قاتىسقان ارداگەرلەرگە, جەتىم بالالار مەن اتا-اناسىنىڭ قامقورلىعىنسىز قالعان, گازداندىرۋعا جاتاتىن جەكە ۇيلەردە تۇراتىن بالالاردىڭ قامقورشىلارىنا جاسالادى. الەۋمەتتىك كومەكتىڭ مولشەرى گاز جابدىعىن جەتكىزۋگە جانە ورناتۋعا بايلانىستى ناقتى شىعىندارعا سۇيەنىپ, انىقتالادى. بىراق ول 100 اەك-تەن اسپايدى. بۇل – 345 مىڭ تەڭگە, دەيدى قاراعاندى وبلىسىنىڭ ەنەرگەتيكا جانە تۇرعىن-ءۇي كوممۋنالدىق شارۋاشىلىق باسقارماسىنىڭ باسشىسى ەربول ءۋالي ۇلى.
بىلتىر 8 ملن تەڭگەدەن اسا سوماعا 28 وتباسىعا كومەك كورسەتىلسە, بيىل جارتىجىلدىقتا 35 وتباسى العان. وعان 12 ملن تەڭگەدەن اسا قاراجات جۇمسالعان. الەۋمەتتىك كومەك الۋ ءۇشىن قاراعاندى قالاسىنىڭ جۇمىسپەن قامتۋ جانە الەۋمەتتىك باعدارلامالار بولىمىنە ءوتىنىش تاستاۋعا ءتيىس.
قاراعاندى وبلىسىنىڭ تۇرعىن ءۇي قورىن جاڭعىرتۋ ورتالىعى – جەكە تۇرعىن ۇيلەردى گازعا قوسۋ جونىندەگى مەملەكەتتىك باعدارلامانىڭ وپەراتورى بولىپ سانالادى. ورتالىق ديرەكتورى دانيار دۇيسەمباەۆ باعدارلاما ارقىلى بيىل 300 ۇيگە گاز تارتۋ جوسپاردا ەكەنىن ايتادى.
– قاراعاندى وبلىسىنىڭ تۇرعىن ءۇي قورىن جاڭعىرتۋ ورتالىعى – جەكە تۇرعىن ۇيلەردى گازعا قوسۋ جونىندەگى مەملەكەتتىك باعدارلامانىڭ وپەراتورى. باعدارلاما بويىنشا بيىل 300 ءۇيدى قوسۋ جوسپارلانۋدا. ونىڭ 200 ءۇيى – قاراعاندىدا جانە 100 ءۇيى – تەمىرتاۋدا. نەسيەلەۋ – 5 جىلعا دەيىن پايىزسىز. بۇل ارادا الگوريتم – قاراپايىم. تۇرعىن ءۇيدىڭ قۇقىقتىق قۇجاتتارىن جاڭعىرتۋ ورتالىعىنا تاپسىرۋ قاجەت. ءوتىنىش بەرگەننەن كەيىن «قازترانسگازايماق» اق-دان تەحنيكالىق شارتتار الىپ, مەردىگەردى تاڭداپ, ۇشجاقتى شارت جاسالادى, دەيدى د.دۇيسەمباەۆ.
تەحنيكالىق شارتتاردى الۋ ءۇشىن مىنا ءتورت قۇجات قاجەت بولادى: جەكە كۋالىك, كاداسترلىق انىقتاما, تەحنيكالىق تولقۇجات, جەر اكتىسى.
قاسىمحان عالىم,«Egemen Qazaqstan»