ءورىسى مالعا, قويناۋى جانعا تولىپ, بەرەكەسى ارتقان كۇركەلى ەلىندە, الاش ارداقتىسى جۇمات شانين تۋعان اۋىلدا ءدۇبىرلى توي ءوتتى. بۇل كۇنى ەلدى مەكەندە جاستار ورتالىعى مەن اسحانا, ويىن الاڭدارى اشىلىپ, اۋىلدىقتار قۋانىشقا بولەندى.
بيىل جۇمات شانين اۋىلىنىڭ قۇرىلعانىنا 60 جىل تولىپ وتىر. كەڭەس وكىمەتى جىلدارى مۇندا اۋىل شارۋاشىلىعى قۋاتتى دامىپ, اۋماقتا مال باسى ەسەلەپ ارتىپ, ەگىن ءوسىرۋ, جەم-ءشوپ دايىنداۋدا زور جەتىستىكتەرگە قول جەتكىزدى. مۇنىڭ بارلىعى سول كەزدەگى ەڭبەكشىل اعا بۋىننىڭ تاباندىلىعىنىڭ ارقاسىندا كەلگەن ەدى.
تاۋەلسىزدىكتەن كەيىن وزگە قازاق اۋىلدارى سياقتى توقىراۋدى وتكەرگەن مەكەن بۇگىندە الاش ارداقتىسىنىڭ ەسىمىنە ساي ءتۇتىنىن تۇزەتۋگە بەت بۇرعان. «اۋىل – ەل بەسىگى» باعدارلاماسى اياسىندا اۋىلعا اپاراتىن ۇلكەن جولعا اسفالت توسەلىپ, ورتالىقتاندىرىلعان اۋىزسۋ قۇبىرىن تارتۋ باستالدى. جەرگىلىكتى اقساقال راتبەك اشۋەۆ اتاپ وتكەندەي, اۋىل جاستارىنىڭ ۇيىمشىلدىعى ارقاسىندا كەلەلى ىستەر اتقارىلۋدا. جالپى, ۇلت دەنساۋلىعىنىڭ مىقتى بولۋى سالاماتتى ءومىر سالتىنا, سپورتقا بايلانىستى ەكەنى بەلگىلى. مەملەكەت باسشىسى قاسىم-جومارت توقاەۆ جىل سايىنعى جولداۋلارىندا بالالار مەن جاستاردىڭ دەنساۋلىعىن جاقسارتۋ ءۇشىن دامىعان جانە قولجەتىمدى سپورت ينفراقۇرىلىمىنىڭ بولۋى ماڭىزدى ەكەنىنە ۇنەمى توقتالادى. اسىرەسە, اۋىلدىق جەرلەردە سپورتتى دامىتۋعا كوڭىل ءبولۋدىڭ ماڭىزى زور.
«مەملەكەتتىڭ كومەگىن كۇتىپ وتىرماي-اق, وزدەرىنىڭ كۇش-جىگەرىمەن, ادال ەڭبەگىمەن جەرگىلىكتى جاستاردى سپورتقا, سالاماتتى ءومىر سالتىنا باۋلىپ جۇرگەن ازاماتتارعا قاراپ ريزا بولامىز. مىنە سونىڭ ءبىر جارقىن ۇلگىسى – بۇگىنگى مەرەكەدە اشىلىپ وتىرعان جاستار ورتالىعى مەن فۋتبول جانە باسكەتبول الاڭدارى. ورتالىق اۋىل جاستارىنىڭ سپورتپەن, سالاماتتى ءومىر سالتىمەن تۇراقتى شۇعىلدانۋىنا مۇمكىندىك بەرەدى. وسى يگى ءىستىڭ باسى-قاسىندا بولعان جانداردىڭ بارلىعىنىڭ اتىن اتاپ, ءتۇسىن تۇستەۋدىڭ قاجەتى شامالى. ەل ونسىز دا بۇل ازاماتتارىمىزدىڭ ەڭبەگىن جاقسى ءبىلىپ وتىر» دەپ ريزاشىلىعىن جەتكىزدى راتبەك اقساقال. جاڭا اشىلعان جاستار ورتالىعىندا كەلەشەكتە كۇرەس تۇرلەرى, ۇستەل تەننيسى جانە سپورتتىڭ وزگە دە تۇرلەرى ۇيرەتىلىپ, اۋىلداعى جاس ازاماتتاردىڭ بوس ۋاقىتىن ءتيىمدى پايدالانۋعا, ولاردىڭ بويىن تەرىس ادەتتەردەن اۋلاق سالۋعا جول اشادى. عيمارات جەرگىلىكتى تۇرعىندار مەن سىرتتاعى قامقورشىلاردىڭ جيناعان قاراجاتىنا بوي كوتەرگەن.
بۇل كۇنى حالىقتى يماندىلىققا ۇيىتىپ وتىرعان اۋىلدىق مەشىت جانىنان جاڭا اسحانا جۇمىسىن باستادى. اۋىل يمامى رۇستەم ءابدي اسحانا اۋىل تۇرعىندارىنىڭ ءتۇرلى اس-جابدىعىن وتكىزۋگە مۇمكىندىك بەرەدى دەيدى. زامانعا ساي جيھازبەن, اسپازدىق جابدىقتارمەن قامتىلعان عيمارات باياناۋىلعا تانىمال مەتسەناتتىڭ قارجىسىنا تۇرعىزىلدى.
شىلدەنىڭ شىلىڭگىر ىستىعىنا قاراماستان, الىستان ات تەرلەتىپ جەتكەن تويشىل قاۋىمدى اۋىل جۇرتى ۇكىلەپ كۇتىپ الدى. اۋىل بالالارى بۇل كۇنى شاعىن فۋتبول مەن اسىق اتۋ سايىستارىنا قاتىسىپ ءماز-مەيرام بولسا, جاستار مەن ەرەسەكتەر ارقان تارتىس, كىر تاسىن كوتەرۋ, قازاق كۇرەسى, قاشىقتىققا جۇگىرۋ باسەكەلەرىندە باق سىنادى. جەرگىلىكتى ونەرپازدار مەن سىرتتان كەلگەن ونەر يەلەرى ۇيىمداستىرعان مادەني شارالار دا ەل كوڭىلىنەن شىقتى. اۋىلدىڭ تويى بايگەسىز وتكەن بە, ىرگەدەگى «بايگەتوبەدە» كەشكىسىن تۇياعى جەر تارپىعان تۇلپارلاردىڭ ونەرىنە ءتانتى بولدىق.
جۇمات شانين ەلدى مەكەنى – ۇلىلاردىڭ ءىزى مەن ءسوزى قالعان كيەلى ولكە. اتاقتى ءانشى جارىلعاپبەردى جۇماباي ۇلى, قازاقتان شىققان تۇڭعىش كاسىبي رەجيسسەر جۇمات شانين, ەسىمى قازاققا عانا ەمەس, وداققا تانىمال ونەر يەلەرى قالي بايجانوۆ, اقىش شانين, اتىعاي شانين, الاش قايراتكەرلەرى سالەمحات كۇلەنوۆ پەن احمەتوللا بارلىباەۆ, اتاقتى كەنتانۋشى, «تاستىڭ ءتىلىن تۇسىنگەن قازاق» قوسىم پىشەنباەۆ وسى مەكەندە دۇنيەگە كەلگەن. بىزدەر قۇت-بەرەكەسى مەن ىنتىماعى ۇيىعان اۋىل ازاماتتارىنىڭ بىرلىكشىل تىرلىگىنە ريزا بولىپ قايتتىق.