اتىراۋدا اسكەري باعىتتاعى مەكتەپ اشىلدى

كەلەشەكتە ماماندىعىن اسكەري قىزمەتپەن بايلانىس­تىرعىسى كەلەتىن بالالارعا اسكەري باعىتتاعى «سارمات» ماماندان­دىرىلعان مەكتەپ-ليتسەي-ينتەرناتى زور مۇمكىندىك اشادى.

«مەكتەپ-ليتسەيگە قابىلداۋ بويىنشا كونكۋرستىق ىرىكتەۋ 1-2 شىلدە كۇندەرى اياقتالدى.  500-گە جۋىق اتىراۋلىق وقۋشى ەكى كەزەڭنەن تۇراتىن ەمتيحاننىڭ ءبىرىنشى كۇنى قازاق ءتىلى مەن ماتەماتيكادان تەستىلەۋگە قاتىسىپ, ەكىنشى كۇنى دەنەشىنىقتىرۋ قابىلەتتەرىن باعالاۋ بويىنشا سىنعا ءتۇستى», دەدى مەكتەپ ديرەكتورى ەرلان دايراباي ۇلى.

2023-2024 وقۋ جىلىندا 7-8-9-سىنىپقا بارلىعى 120 وقۋشى قابىل­داناتىنى بەلگىلى بولىپ وتىر.  ءار سىنىپتا 20 بالادان ءبىلىم الادى, ياعني, ەكى 7-سىنىپ, ەكى 8-سىنىپ جانە ەكى 9-سىنىپ بولادى.

«2025 جىلعا قاراي مەكتەپتەگى بالا سانىن 300-گە دەيىن جەتكىزۋ جوسپارلانىپ وتىر. اتا-انالاردىڭ, وقۋشىلاردىڭ جەدەل اقپارات الۋى ءۇشىن sarmat.edu.kz رەسمي سايتىن جانە Facebook پەن Instagram الەۋمەتتىك جەلىلەرىندە ارنايى پاراقشالارىمىزدى ىسكە قوستىق», دەپ ناقتىلادى ەرلان دايرا­باي ۇلى.

اتىراۋ قالاسىنا قاراستى جاڭاتالاپ وكرۋ­گىندەگى 300 ورىنعا ەسەپتەلگەن اتالمىش مەكتەپتىڭ وبلىس اۋدان­دارىنان كەلگەن بالالارعا ارنالعان جاتاقحاناسى دا بار. 

وقۋشىلارعا 6 مەزگىل تاماقتانۋ, توسەك ورنى, اسكەري كيىم ۇلگىلەرى, وقۋ-قۇرالدارى, سپورتتىق جابدىقتار تەگىن قاراستىرىلعان. اسكەري باعىتتاعى مۇنداي مەكتەپ ازىرگە ەلىمىزدىڭ ساناۋلى عانا ايماقتارىندا بار.