2023 جىلدىڭ 13 شىلدەسىندە Samruk-KazynaConstruction باسقارما توراعاسى ماۋلەن ايمانبەتوۆ قاراعاندىعا جانە وعان ىرگەلەس اۋىلدارعا ىسساپارمەن بارىپ, «جايلى مەكتەپ» ۇلتتىق جوباسى اياسىندا جاڭا مەكتەپتەردى سالاتىن مەردىگەر كومپانيالاردىڭ وكىلدەرىمەن جۇزدەستى, دەپ حابارلايدى Egemen.kz.
كەزدەسۋلەر قۇرىلىس الاڭدارىندا ءوتتى. تالقىلاۋ بارىسىندا ماۋلەن ايمانبەتوۆ مەرزىمدەردى كەشىكتىرگەن كومپانيالارعا قانداي جاۋاپكەرشىلىك قاراستىرىلعانىن تاعى ءبىر ەسكە سالدى.
«اپتا سايىن اتقارۋشىلىق تەحنيكالىق ەسەپتەردى ۋاقىتىلى تاپسىرىپ وتىرىڭىزدار. كەم دەگەندە ەكى رەت مەرزىمدەردى بۇزىپ, جۇمىستاردى كەشىكتىرگەن جاعدايدا شارتتى بۇزامىز. ال جوبانى كونكۋرستا ەكىنشى ورىن العان كومپانياعا بەرەمىز. مەن سىزدەردى ەسكەرتەمىن: باقىلاۋ قاتاڭ بولادى! ءبىز ساپاعا باسىمدىق بەرەمىز», دەدى ايمانبەتوۆ.
ەگەر مەردىگەر قۇرىلىس جۇمىستارىن ورىنداۋ مەرزىمىن بەكىتىلگەن كەستەدەن كەم دەگەندە ەكى رەت 7 كۇننەن ارتىق ۋاقىتقا كەشىكتىرسە, كەلىسىمشارت بىرجاقتى تارتىپپەن بۇزىلادى. ال مەكتەپتىڭ قۇرىلىسى كونكۋرستا ەكىنشى ورىن العان كومپانياعا بەرىلەدى. ول تالاپتارعا ساي كەلمەگەن جاعدايدا, جاڭا مەردىگەر ءبىر كوزدەن ساتىپ الۋ ارقىلى انىقتالادى. بارلىق جايلى مەكتەپتەردى ۋاقىتىلى سالىپ, تاپسىرۋ ءۇشىن وسىنداي قاتاڭ شارالار قابىلدانىپ جاتىر.
قاراعاندىداعى كەڭدالا شاعىن اۋدانىندا 2000 ورىندىق جايلى مەكتەپ سالۋ جوسپارىن تالقىلاۋ كەزىندە ماۋلەن ايمانبەتوۆ مەكتەپ كەڭىستىگىن وڭتايلاندىرۋعا قاتىستى ءوز ۇسىنىستارىن ايتتى. ىرگەلەس اۋماقتا تريبۋنالارى بار كوپ فۋنكتسيونالدى ستاديون ورناتىلادى دەپ جوسپارلانعان. كۇن جىلى كەزدە وقۋشىلار فۋتبول, ال قىستا حوككەي ويناي الادى. توراعا ازىلدەپ, جايلى مەكتەپتەر قاراعاندىلىق «سارىارقا» حوككەي كلۋبى ءۇشىن سپورتشىلاردى دايارلاۋعا ىقپال ەتەتىنىن ەرەكشە اتاپ ءوتتى.
«مەكتەپ اۋماعىنىڭ ءار شارشى مەترىن بارىنشا ءتيىمدى پايدالانۋ كەرەك. ەۋروپالىق مەكتەپتەردە بوس ورىن جوق. ماسەلەن, نەگە اۋماقتا اينالمالى جۇگىرۋ جولاعىن جاساماسقا؟ ول ءۇشىن ارنايى ورىن قاراستىرۋدى ۇسىنامىن. قىستا شاڭعى تەبۋگە, ال جازدا جۇگىرۋگە بولادى. ءوزىم دە مەكتەپتە وقىعاندا جۇگىرۋمەن اينالىستىم, ءنورماتيۆتىڭ ءبىرىنشى رازريادىن العانمىن. بۇرىن ءاردايىم مەكتەپ اينالاسىندا جۇگىرەتىنبىز», دەدى ايمانبەتوۆ.
«جايلى مەكتەپ» ۇلتتىق جوباسى اياسىندا قاراعاندى وبلىسىندا 18 ءبىلىم بەرۋ نىسانى سالىنادى. 10 جايلى مەكتەپتىڭ قۇرىلىسى بيىل باستالادى. بۇل مەكتەپتەر 2024 جىلدىڭ سوڭىنا دەيىن پايدالانۋعا بەرىلەدى. ۇلتتىق جوبانىڭ ارقاسىندا وبلىس بويىنشا 12,5 مىڭ قوسىمشا وقۋشى ورنى قۇرىلادى. ولاردىڭ 7 مىڭنان استامى 2024 جىلدىڭ سوڭىنا دەيىن اشىلادى.
پايدالانۋعا بەرىلگەننەن كەيىن بارلىق جايلى مەكتەپتەر جەرگىلىكتى اتقارۋشى ورگانداردىڭ بالانسىنا وتەدى. وسىلايشا, جاڭا ءبىلىم بەرۋ نىساندارى مەملەكەت مەنشىگىندە بولادى, ياعني وقىتۋ تەگىن جۇرگىزىلەدى دەگەن ءسوز.
«جايلى مەكتەپ» پيلوتتىق ۇلتتىق جوباسى ەل پرەزيدەنتىنىڭ تىكەلەي تاپسىرماسى بويىنشا جۇزەگە اسىرىلىپ جاتىر. جوبا اپاتتى مەكتەپتەردى جويۋعا, ءۇش اۋىسىمدى وقىتۋ جانە وقۋشى ورىندارىنىڭ تاپشىلىعى ماسەلەلەرىن شەشۋگە باعىتتالعان. ۇلتتىق جوبا اياسىندا 2025 جىلدىڭ سوڭىنا دەيىن ەل بويىنشا 369 زاماناۋي مەكتەپ سالىنادى. بۇل 740 مىڭ جاڭا وقۋشى ورنىن قۇرۋعا مۇمكىندىك بەرەدى.