پاۆلودار قالاسىنىڭ قىلمىستىق ىستەر بويىنشا №2 سوتى «قازپوشتا» اق وبلىستىق فيليالى ديرەكتورىنىڭ ورىنباسارىنا قاتىستى ۇكىم شىعاردى. وعان ءىرى كولەمدە پارا الدى (قك 366-بابى, 2-ءبولىمى) دەگەن ايىپ تاعىلدى.
بيىل قاڭتاردا «قازپوشتا» اق پاۆلودار وبلىستىق فيليالى ديرەكتورىنىڭ ءوندىرىس بويىنشا ورىنباسارى ج. زاڭسىز بايۋ ماقساتىندا مەردىگەر كومپانيا وكىلىنە «قازپوشتا» اق فپب اۆتوكولىك باسقارماسىنىڭ اۋماعىندا اۆتوموبيل بوكسىنىڭ شاتىرىن جوندەۋ جۇمىسىن كەدەرگىسىز قابىلداۋ ءۇشىن اقشالاي سىياقى بەرۋدى ۇسىنعان. سودان كەيىن ج. 2 000 000 تەڭگە پارا الىپ جاتقان جەرىنەن ۇستالدى.
پروكۋرور ج.-نى 4 جىل 6 اي باس بوستاندىعىنان ايىرۋدى سۇرادى. قورعاۋشى جەڭىلدەتەتىن جاعدايلاردى ەسكەرۋدى ءوتىندى. سوتتالۋشى كىناسىن مويىنداعان جوق, اقتاۋدى سۇرادى.
زاڭدا قىلمىستى ايىپپۇل نەمەسە باس بوستاندىعىنان ايىرۋ سىندى جازانىڭ بالاما تۇرلەرىمەن وتەۋ دە قاراستىرىلعان.
كىناسىن جەڭىلدەتەتىن جاعدايلاردى ەسكەرىپ, كىشكەنتاي بالالارى بار ەكەنىن, 3 توپتاعى مۇگەدەكتىگىن, قىلمىستىق قۇقىقبۇزۋشىلىقپەن ءبىرىنشى رەت ايىپتالعانىن ەسكەرە وتىرىپ سوت ج.-نى 3 جىلعا باس بوستاندىعىنان ايىردى.
سونىمەن قاتار سوتتالعان ازامات ءومىر بويى مەملەكەتتىك قىزمەت, سوت, جەرگىلىكتى ءوزىن-ءوزى باسقارۋ مەكەمەلەرى جانە ت.ب. قىزمەت ىستەۋ قۇقىنان ايىرىلدى.
ۇكىم زاڭدى كۇشىنە ەنگەن جوق.