بۇل تۋرالى پرەزيدەنت قاسىم-جومارت توقاەۆتىڭ قاتىسۋىمەن ءوتىپ جاتقان استانانىڭ 25 جىلدىق مەرەيتويىنا ارنالعان باۋىرلاس قالالار فورۋمىندا ايتىلدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«ورنىقتى دامۋ سالاسىنداعى بۇۇ ماقساتتارىنىڭ ءبىرى قالانى دامىتۋعا ارنالعان. بۇل كەزدەيسوق ەمەس. قازاقستاندا ءبىز وسى باعىتقا ەرەكشە نازار اۋدارامىز. الەمنىڭ جىلدام دامىپ كەلە جاتقان استانالارىنىڭ قاتارىنا كىرەتىن ەلوردامىز باسقا قالالاردىڭ دامۋىنا ۇلگى بولادى. وتكەن شيرەك عاسىردا ەلىمىزدىڭ باس قالاسىنىڭ اۋماعى 3 ەسە ۇلعايىپ, حالقىنىڭ سانى 4 ەسە ءوستى.ساراپشىلاردىڭ بولجامى بويىنشا ەلوردا تۇرعىندارىنىڭ سانى 2030 جىلعا قاراي 2 ميلليونعا جەتەدى. ەل استاناسى مارتەبەسىنە يە بولعان ساتتەن بەرى قالانىڭ ەكونوميكالىق الەۋەتى 100 ەسەدەن استام ارتتى. قازىر قالا ەكونوميكاسى ەلدەگى جالپى ىشكى ءونىمنىڭ 10 پايىزدان استامىن قۇرايدى», دەدى مەملەكەت باسشىسى.
سونىمەن قاتار مەملەكەت باسشىسى ۇلكەن كورسەتكىشتەر قالانىڭ ۇيلەسىمدى دامۋىمەن ۇنەمى سايكەس كەلە بەرمەيتىنىن ەسكەردى. پرەزيدەنتتىڭ ويىنشا مەگاپوليستەردىڭ تابىستى بولۋىنىڭ باستى كورسەتكىشى ونىڭ تۇرعىندارىنىڭ تۇرمىس ساپاسىمەن ولشەنۋگە ءتيىس. سوندىقتان ەلوردانى دامىتۋ جانە اباتتاندىرۋ كەزىندە قاسىم-جومارت توقاەۆ «ادام قالا ءۇشىن ەمەس, قالا ادام ءۇشىن» قاعيداتىن باسشىلىققا الاتىندىعىن ايتتى.«ادامعا باعدارلانعان مۇنداي ۇستانىم مۇلدە باسقا ستراتەگيالىق ماقساتتى كوزدەيدى. قالا اكىمدىگى, ەڭ الدىمەن, تۇرعىنداردىڭ مۇددەسى مەن قاجەتىن باسشىلىققا الادى. استانانىڭ بارشا تۇرعىنى مەن قوناقتارى ءۇشىن قالادا بارىنشا قولايلى ورتا قالىپتاستىرۋ – اسا ماڭىزدى ماسەلە. ءبىز بارىنە تەڭ مۇمكىندىك بەرىلەتىن قوعام قۇرۋ جولىن تاڭدادىق جانە وسى باعىتتا دامىپ كەلەمىز. سوندىقتان ءوزارا جاۋاپكەرشىلىك پەن ازاماتتىق ىنتىماقتاستىققا نەگىزدەلگەن ينكليۋزيۆتى دامۋعا ايرىقشا ءمان بەرەمىز», دەدى پرەزيدەنت.