سىردىڭ بويىنداعى قۋاڭشىلىق وسىدان ەكى جىل بۇرىن مالدى اعايىننىڭ مازاسىن كەتىرگەنىن ەشكىم ۇمىتا قويعان جوق. تەڭىزدى وڭىردەگى شارۋالاردىڭ ءبىرازى كورشىلەس اقتوبە وبلىسىنىڭ ىرگەلەس اۋداندارىنا مالىن ايداپ, قوس تىگىپ مالدى امان الىپ قالۋدىڭ بار امالىن جاسادى. بۇل تۋرالى «Egemen Qazaqstan» گازەتىنىڭ ءتىلشىسى مۇرات جەتپىسبايدىڭ ماقالاسىنان تولىق وقي الاسىزدار.
سول جىلى قىسقا تۇسەتىن مالعا 770 مىڭ توننا ءشوپ, 8 مىڭ توننا سۇرلەم جانە 213 مىڭ توننا قۇراماجەم قاجەت ەكەندىگى انىقتالىپ, ءبىراز بولىگى وبلىستىڭ وزگە اۋداندارىنان ازىرلەندى. ايماقتا مال ازىعىن دايىنداۋ ءۇشىن 114 بريگادا قۇرىلىپ, 1000-نان استام ادام جانە 170-تەن استام تەحنيكا جۇمىلدىرىلعان ەدى.
ءتىپتى توتەنشە جاعداي جاريالانىپ وبلىستىڭ رەزەرۆ قورىنان 250 ملن تەڭگە ءبولىندى. ۇكىمەت رەزەرۆىنەن تاۋار وندىرۋشىلەردىڭ جەمشوپ ساتىپ الۋ شىعىندارىن ءىشىنارا سۋبسيديالاۋعا 1,7 ملرد تەڭگە قارجى قارالدى.
قۋاڭشىلىقتان ساباق العان شارۋالار بىلتىر مالازىقتىق داقىلداردى 4,9 مىڭ گەكتارعا ارتىق ەگiپ, ونىڭ جالپى كولەمى 71,3 مىڭ گەكتارعا جەتتى. بۇدان بولەك, كانال تازالاۋ, ۇڭعىمالاردى قالپىنا كەلتىرۋ جانە بۇرعىلاۋ, قاشىرتقى سۋلاردى قايتا پايدالانۋ سەكىلدى تىرلىكتەر جەمىسىن بەردى. ەرتە كوكتەمدە كولدەر جۇيەسىن تولتىرۋ ارقىلى 75,9 مىڭ گەكتار شابىندىق جەر سۋلاندىرىلدى. وسىدان دا 2021 جىلى 1200-1500 تەڭگەگە جەتكەن جوڭىشقا باعاسى بىلتىر 700-750 تەڭگەگە ءتۇستى.
جاڭاقورعان اۋدانىندا بيىل قىسقا تۇسەتىن مال باسى ناقتىلانىپ 183 مىڭ توننا ءشوپ, 36 مىڭ توننا جەم, 37 مىڭ توننا سابان دايىنداۋ جوسپارى بەكىتىلگەن. قازىر شارۋاشىلىقتاردا جوڭىشقانىڭ ءبىرىنشى ورىمى ءبىتىپ, 40 مىڭ توننا ءشوپ دايىندالىپتى. ءبىر بۋماسى 500-600 تەڭگەدەن ساتىلىپ جاتىر. جالپى, وبلىستاعى جوڭىشقالىق القاپتىڭ كوپ بولىگى وسى اۋداننىڭ اۋماعىندا ەكەن.
ارال اۋدانىنداعى ءتورت ت ۇلىك سانى قازىر 254 560 باسقا جەتتى. بىلتىر اۋدان بويىنشا 180 591 توننا مال ازىعى دايىندالعان, قازىر سونىڭ 59 672 تونناسى قالىپ تۇر. الداعى قىسقا 181 000 توننا جەمشوپ قاجەت.