جىل باسىنان بەرى رەسپۋبليكالىق بيۋدجەتتەن 1 ترلن 374,1 ملرد تەڭگە قارجى زەينەتاقى تولەۋگە ءبولىندى, ونىڭ ىشىندە بازالىق زەينەتاقى تولەۋگە – 421,9 ملرد تەڭگە, ىنتىماقتى زەينەتاقى تولەۋگە – 952,2 ملرد تەڭگە ءبولىندى, دەپ حابارلايدى Egemen.kz.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, 2023 جىلعى 1 ماۋسىمداعى جاعداي بويىنشا زەينەتكەرلەر سانى – 2 ملن 299 مىڭ ادامدى قۇرادى.
2023 جىلعى 1 ماۋسىمداعى جاعداي بويىنشا جيىنتىق زەينەتاقىنىڭ ورتاشا مولشەرى 120 743 تەڭگەنى قۇراسا, ونىڭ ىشىندە ىنتىماقتى زەينەتاقى مولشەرى – 82 881 تەڭگە, بازالىق زەينەتاقى – 37 862 تەڭگە.
«2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى زەينەتاقى جۇيەسىندەگى ءوتىلىن ەسكەرە وتىرىپ, ءار الۋشىعا جەكە تاعايىندالاتىنىن ەسكە سالامىز. بۇل رەتتە 1998 جىلعى 1 قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى, سونداي-اق مىندەتتى زەينەتاقى جارنالارى تولەنگەن كەزەڭدەر زەينەتاقى جۇيەسىندەگى ەڭبەك وتىلىنە قوسىلادى.
ەگەر ازاماتتىڭ زەينەتاقى جۇيەسىندەگى ءوتىلى 10 جىل نەمەسە ودان از بولسا, سونداي-اق مۇلدە جوق بولسا, بازالىق زەينەتاقى ەڭ تومەنگى كۇنكورىس دەڭگەيىنىڭ 60%-نا تەڭ بولسا, سودان كەيىن 10 جىلدان اسقان ءار جىل ءۇشىن ونىڭ مولشەرى 2 %-عا ارتادى. ال ەگەر ءسىزدىڭ ءوتىلىڭىز 20 جىل بولسا, بازالىق زەينەتاقى تومەنگى كۇنكورىس دەڭگەيىنىڭ 80 %-ىن قۇرايدى. ەڭبەك ءوتىلى 30 جىل نەمەسە ودان كوپ بولسا, كۇنكورىس دەڭگەيىنىڭ ەڭ جوعارعى مولشەرىندە ياعني 100% بەلگىلەنەدى», دەپ ءتۇسىندىردى مينيسترلىكتىڭ ءباسپاسوز قىزمەتى.
ەگەر ءبىر اي ىشىندە مىندەتتى زەينەتاقى جارنالارى بىرىڭعاي جيناقتاۋشى زەينەتاقى قورىنا بىرنەشە رەت اۋدارىلسا, جيناقتاۋشى جۇيەگە قاتىسۋ مەرزىمى ءبىر ايدى قۇرايدى.
وسىلايشا مىندەتتى زەينەتاقى جارنالارى نەعۇرلىم تۇراقتى جانە تولىق كولەمدە اۋدارىلاتىن بولسا, زەينەت جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.
ءوز كەزەگىندە ازاماتتىڭ جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە (كەم دەگەندە 6 اي قاجەت) جانە زەينەتكەرلىككە دەيىنگى كەزەڭدەگى ورتاشا ايلىق تابىسىنا بايلانىستى بولادى.