قازاق-نەمىس ينجينيرينگ ينستيتۋتى اشىلادى

ء«بىز SVEVIND Group كومپانياسىمەن قۇنى 50 ميلليارد دوللار بولاتىن جاسىل سۋتەگىن ءوندىرۋ جونىندە كەلىسىمگە قول قويدىق. قازىر بۇل – الەمدەگى ەڭ ءىرى جوبالاردىڭ ءبىرى. قازاقستاننىڭ وسى سالانى دامىتۋ الەۋەتى الدەقايدا زور. جاسىل سۋتەگى ءوندىرىسى ەكولوگيالىق تازا بولات, اليۋميني جانە باسقا دا مەتالدار وندىرىسىنە جول اشادى. گەرمانيانىڭ جوعارى تەحنولوگيالىق شەشىمدەرىمەن جانە قازاقستاننىڭ رەسۋرستارىمەن ءبىز, شىن مانىندە, الدىمىزعا بيىك ماقساتتار قويا الامىز», دەدى قاسىم-جومارت توقاەۆ.

وسى رەتتە ول گەرمانيا – الەمدەگى جەتەكشى يننوۆاتسيالىق ورتالىقتاردىڭ ءبىرى ەكەنىن اتاپ ءوتتى.

«بۇل ەل تەحنولوگيا مەن عىلىم سالاسىندا وتە جوعارى ستاندارتتاردى ەنگىزۋىمەن تانىمال. ءبىز ەۋرازياداعى وڭىرلىك يننوۆاتسيالىق جانە تسيفرلىق ورتالىق بولۋعا ۇمتىلامىز. اتالعان سالالاردىڭ بەرىك ىرگەتاسىن قالاۋدى باستادىق. قازاقستان تسيفرلىق قىزمەت كورسەتۋ سالاسىندا وڭىرلىك كوشباسشى رەتىندە جوعارى باعالانادى. وسى ماقساتتا ءبىز ءتۇرلى باعىتتارعا, سونىڭ ىشىندە تەحنولوگيالىق جانە تسيفرلىق زەرتتەۋلەرگە جانە ستارتاپتارعا گەرمانيالىق سەرىكتەستەرىمىزدى شاقىرعىمىز كەلەدى», دەدى قازاقستان پرەزيدەنتى.

بۇدان سوڭ, ول ادامي كاپيتال سالاسىنداعى ىنتىماقتاستىق جونىندە ءسوز قوزعادى.

ء«بىلىم بەرۋ, بىلىكتىلىكتى ارتتىرۋ جانە ءبىلىم ترانسفەرتى ماڭىزدى سالا سانالادى. بۇل باعىتتاردى مەڭگەرمەي, باسەكەگە قابىلەتتى بولۋ مۇمكىن ەمەس. وسى رەتتە شتاينمايەر مىرزانىڭ ەرتەڭ اقتاۋ قالاسىنا ساپارى كەزىندە كاسپي مەملەكەتتىك ۋنيۆەرسيتەتى جانىنان قازاق-نەمىس ينجينيرينگ ينستيتۋتىنىڭ اشىلۋىن قۇپتايمىن.

سونىمەن قاتار شىعىس قازاقستان تەحنيكالىق ۋنيۆەرسيتەتىنىڭ جانىنداعى قازاق-نەمىس عىلىم جانە تەحنولوگيالار ينستيتۋتى وسى ماڭىزدى يندۋستريالىق وڭىردەگى ادامي كاپيتال مەن باسەكەگە قابىلەتتىلىكتى ودان ءارى جەتىلدىرۋگە ىقپال ەتەدى. بۇل ينستيتۋتتار وزىق لوگيستيكا, جاسىل سۋتەگى جانە جاڭارتىلاتىن تەحنولوگيالار ءۇشىن اسا قاجەت پايدالى قازبالار ءوندىرۋ سەكىلدى نەگىزگى سالالار بويىنشا ماماندار دايارلايدى», دەدى پرەزيدەنت.

ونىڭ ايتۋىنشا, تۇلەكتەر قازاقستان مەن گەرمانيا ديپلومىن قاتار الادى. بۇل ەكى ەل سەرىكتەستىگىنىڭ تاعى ءبىر ماڭىزدى كەزەڭى بولماق.