جاڭاوزەن-كەندىرلى تاسجولىندا جول اپاتى بولىپ, 10 ادام قازا تاپتى. ونىڭ 5-ەۋى كامەلەتكە تولماعان بالالار ەدى, دەپ حابارلايدى Egemen.kz پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
«16 ماۋسىم كۇنى كەشكى توعىز جارىمدار شاماسىندا جاڭاوزەن-كەندىرلى تاسجولىندا ءىرى جول-كولىك وقيعاسى بولىپ, 10 ادام قازا تاپتى. ونىڭ 5-ەۋى كامەلەتكە تولماعاندار. قازا بولعانداردىڭ تۋىستارى مەن جاقىندارىنا كوڭىل ايتا وتىرىپ, ەسكەرتەمىز! جول-كولىك وقيعاسىنىڭ نەگىزگى سەبەبى – كولىكتىڭ قارسى باعىتقا شىعىپ كەتۋى. سونىمەن قاتار جىل باسىنان بەرى جولداردا جانۋارلاردىڭ قاتىسۋىمەن 3 جول-كولىك وقيعاسى بولىپ, 2 ادام قازا تاپتى, 2 ادام زارداپ شەكتى», دەدى ماڭعىستاۋ وبلىسى پد باسشىسى.
ونىڭ ايتۋىنشا, جىل باسىنان بەرى وبلىستا 164 جول-كولىك وقيعاسى تىركەلگەن. 32 ادام قازا تاۋىپ, 185-ءى جاراقات العان.
«Toyota كولىگىندە 8 ادام بولعان. ەگەر بارلىق ەرەجە ساقتالىپ, جۇرگىزۋشى مەن جولاۋشىلار قاۋىپسىزدىك بەلدىگىن تاعىپ, بالالار ورىندىقتارىن پايدالانسا, سونداي-اق كولىكتە تەك 4 ادام عانا بولسا, اپات بولعان جاعدايدا ادام ءومىرى مەن دەنساۋلىعىنا قاتتى قاۋىپ تونبەس ەدى.
ال, Duster كولىگىنىڭ جۇرگىزۋشىسىنە قاۋىپسىزدىك بەلدىگىن تاقپاعانى ءۇشىن ءبىر اي بۇرىن ەسكەرتۋ جاسالىپ, ايىپپۇل سالىنعان.
وسىعان وراي, جول قاۋىپسىزدىگى ەرەجەلەرىن ساقتاپ, ءوز ومىرلەرىڭىز بەن بالالارىڭىزدىڭ ومىرىنە جاۋاپكەرشىلىكپەن قاراۋلارىڭىزدى سۇرايمىن», دەدى وبلىس تۇرعىندارىنا پوليتسيا گەنەرال-مايورى ايان دۇيسەمباەۆ.