تاجىكستان رەسپۋبليكاسى ءىىم ىشكى اسكەرلەرىنىڭ قولباسشىسى گەنەرال-مايور سۋحروب راۋفزادا باستاعان دەلەگاتسيا اسكەري ىنتىماقتاستىق ماسەلەلەرىن تالقىلاۋ ءۇشىن قازاقستان استاناسىنا ارنايى كەلدى, دەپ جازادى Egemen.kz ۇلتتىق ۇلاننىڭ ءباسپاسوز قىزمەتىنە سىلتەمە جاساپ.
دوستىق سيپاتتاعى كەزدەسۋ قۇرمەت قاراۋىل روتاسىنىڭ قاتىسۋىمەن ءوتتى. اسكەري وركەستردىڭ ورىنداۋىندا ەكى ەلدىڭ مەملەكەتتىك ءانۇرانى ورىندالدى.
قازاقستان رەسپۋبليكاسى ىشكى ىستەر ءمينيسترىنىڭ ورىنباسارى – قازاقستان رەسپۋبليكاسى ۇلتتىق ۇلانىنىڭ باس قولباسشىسى گەنەرال-لەيتەنانت ەركىن بوتاقانوۆ قۇرمەتتى قوناقتاردى جىلى قارسى الىپ, قازاقستان قۇقىقتىق ءتارتىپ اسكەرلەرىنىڭ جاۋىنگەرلىك قىزمەتىمەن جانە اتقاراتىن مىندەتتەرىمەن تانىستىردى.
تاراپتار قازاقستان رەسپۋبليكاسىنىڭ ۇلتتىق ۇلانى مەن تاجىكستان رەسپۋبليكاسى ىشكى اسكەرلەرىنىڭ قۇقىق قورعاۋ جانە ءبىلىم بەرۋ سالالارىنداعى ىنتىماقتى دامىتۋ جولدارىن تالقىلادى. سونداي-اق ۆەدومستۆولار اراسىنداعى مەموراندۋمعا قول قويۋ جاعدايلارىن ناقتىلادى.
«مارتەبەلى قوناقتارىمىزعا اكادەميامىزدىڭ جاس وفيتسەرلەرىنىڭ وقۋ بىتىرۋىنە وراي قازاقستانعا كەلگەندەرى ءۇشىن العىس ايتقىم كەلەدى. بيىل تاجىكستان رەسپۋبليكاسىنان كەلگەن 10 كۋرسانت لەيتەنانت شەنىن يەلەنىپ, وقۋىن اياقتايدى. جالپى, قازاقستان رەسپۋبليكاسى ۇلتتىق ۇلان اكادەمياسىنىڭ تۇلەكتەرى سۇرانىسقا يە ەكەنىن اتاپ وتەمىن. مىسالى, بيىل بەس لەيتەنانت مەملەكەتتىك كۇزەت قىزمەتى باستىعىنىڭ قاراماعىنا ءوتتى, ۇشەۋى – قر توتەنشە جاعدايلار ءمينيسترىنىڭ قاراماعىنا جانە بەلگىلى ءبىر تالاپتاردان وتكەن 13 جاس وفيتسەر قازاقستاننىڭ ىشكى ىستەر ورگاندارىنىڭ ارنايى ماقساتتاعى بولىمشەلەرىنە جىبەرىلدى», دەپ اتاپ ءوتتى ۇلتتىق ۇلاننىڭ باس قولباسشىسى گەنەرال-لەيتەنانت ەركىن بوتاقانوۆ.
كەزدەسۋ بارىسىندا گەنەرال-مايور سۋحروب راۋفزادا دەلەگاتسيا مۇشەلەرىن تانىستىرىپ, جىلى شىرايدا قابىلداعانى ءۇشىن العىسىن ءبىلدىردى. سونىمەن قاتار قازاقستان ۇلتتىق ۇلانىنىڭ باس قولباسشىلىعىن تاجىكستان رەسپۋبليكاسىنا رەسمي تۇردە شاقىردى.
«باس قولباسشى – گەنەرال-لەيتەنانت ەركىن سوۆەتبەك ۇلى بوتاقانوۆ باستاعان ۇلتتىق ۇلان باسشىلىعىنا قازاقستانعا جۇمىس ساپارىمەن كەلۋگە مۇمكىندىك جاساعانى ءۇشىن العىسىمدى بىلدىرەمىن. مەملەكەتارالىق كەلىسىمدەرگە سايكەس ءبىزدىڭ كۋرسانتتار قازاقستان رەسپۋبليكاسى ۇلتتىق ۇلان اكادەمياسىندا وقيدى جانە 2013 جىلدان باستاپ جىل سايىن تاجىكستان رەسپۋبليكاسى ءىىم ىشكى اسكەرلەرىنىڭ قاتارىن تولىقتىرادى. روتالىق قۇرامنىڭ كومانديرلىك بۋىنى تولىعىمەن دەرلىك پەتروپاۆل اسكەري جوعارى وقۋ ورنىنىڭ تۇلەكتەرىنەن قۇرالعانىن اتاپ وتەمىن. ولاردىڭ اراسىندا پولك كومانديرلەرىنىڭ ورىنباسارلارى لاۋازىمدارىندا قىزمەت اتقاراتىندار دا بار», دەدى گەنەرال-مايور سۋحروب راۋفزادا.
وسىدان كەيىن قۇرمەتتى قوناقتارعا اسكەرلەردى باسقارۋ ورتالىعىنىڭ جۇمىسى كورسەتىلدى. سودان سوڭ قوناقتار ءداستۇر بويىنشا باس قولباسشىلىقتىڭ اللەياسىنا اعاش وتىرعىزدى.
بۇدان كەيىن دەلەگاتسيانىڭ جۇمىس ساپارى 5573 اسكەري بولىمىندە جالعاستى. وندا مەيماندار ەلوردالىق جەدەل بريگادانىڭ جاۋىنگەرلىك قىزمەتىمەن جانە «ۇركەر» تۇرعىن الابىنداعى اسكەري قالاشىقتىڭ ينفراقۇرىلىمىمەن تانىستى.
ايتا كەتەيىك, تاجىكستاننان كەلگەن دەلەگاتسيا 17 ماۋسىم كۇنى پەتروپاۆل قالاسىنىڭ باس الاڭىندا وتەتىن قر ۇلتتىق ۇلانى اكادەمياسىنىڭ جاس وفيتسەرلەرىنە ديپلوم تابىستاۋ ءىس-شاراسىنا قاتىسادى.