بيىل 31 قاڭتاردان باستاپ التى اي مەرزىمگە قازاقستان اۋماعىنان اۆتوموبيل كولىگىمەن بەنزيندى, ديزەل وتىنىن جانە مۇناي ونىمدەرىنىڭ جەكەلەگەن تۇرلەرىن اكەتۋگە تىيىم سالىندى, دەپ حابارلايدى Egemen.kz.
بۇل تىيىم «قازاقستان اۋماعىنان مۇناي ونىمدەرىن اكەتۋدىڭ كەيبىر ماسەلەلەرى تۋرالى» ەنەرگەتيكا ءمينيسترىنىڭ 2023 جىلعى 20 قاڭتارداعى №21, پرەمەر-ءمينيستردىڭ ورىنباسارى - قارجى ءمينيسترىنىڭ 2023 جىلعى 20 قاڭتارداعى №49, ىشكى ىستەر ءمينيسترىنىڭ 2023 جىلعى 20 قاڭتارداعى № 31 جانە قر ۇقك توراعاسىنىڭ 2023 جىلعى 20 قاڭتارداعى № 40 بىرلەسكەن بۇيرىعىنا سايكەس ەنگىزىلدى.
بۇدان باسقا, «ەۋرازيالىق ەكونوميكالىق وداقتىڭ كەدەندىك اۋماعىنىڭ شەگىنەن تىس جەرلەرگە قازاقستان رەسپۋبليكاسىنان ەكسپورتتاۋعا تىيىم سالىنعان نەمەسە شەكتەلگەن مۇناي ونىمدەرىنىڭ تىزبەسىن بەكىتۋ تۋرالى» ەنەرگەتيكا ءمينيسترىنىڭ 2023 جىلعى 24 ناۋرىزداعى №118 بۇيرىعىنا سايكەس, 2023 جىلعى 8 ساۋىردەن باستاپ 2024 جىلعى 31 جەلتوقسانعا دەيىنگى مەرزىمگە كورسەتىلگەن بۇيرىققا قوسىمشاعا سايكەس مۇناي ونىمدەرىنىڭ جەكەلەگەن تۇرلەرىن قازاقستان اۋماعىنان ەاەو كەدەندىك اۋماعىنان تىسقارى جەرلەرگە اكەتۋگە تىيىم سالىندى.
وسىعان بايلانىستى قازاقستان رەسپۋبليكاسىنىڭ مەملەكەتتىك كىرىستەر ورگاندارى بەلگىلەنگەن تىيىم سالۋلاردىڭ ساقتالۋىن باقىلاۋدى جۇزەگە اسىرادى, مۇناي ونىمدەرىن زاڭسىز اكەتۋ فاكتىلەرىن انىقتاۋ جانە جولىن كەسۋ جونىندە ءتيىستى شارالار قابىلدايدى.
ماسەلەن, 2023 جىلدىڭ 5 ايىندا ەاەو كەدەندىك شەكاراسىنداعى اۆتوموبيل وتكىزۋ پۋنكتىندە (تۇركىستان وبلىسى) وزبەكستان رەسپۋبليكاسىنا جالپى كولەمى 42 665 ليتر مۇناي ونىمدەرىن زاڭسىز اكەتۋدىڭ 128 فاكتىسىنىڭ جولى كەسىلدى, ەسەپتەلگەن ايىپپۇل سوماسى 4,6 ملن تەڭگەنى قۇرادى.
ەلىمىزدىڭ رەسەي فەدەراتسياسىمەن مەملەكەتتىك شەكاراسىندا ورنالاسقان اۆتوموبيل وتكىزۋ پۋنكتتەرىندە مۇناي ونىمدەرىن زاڭسىز اكەتۋدىڭ 427 فاكتىسى انىقتالدى, جالپى كولەمى 32 354 ليتر, ەسەپتەلگەن ايىپپۇل سوماسى 11,5 ملن تەڭگەنى قۇرادى.
وسىلايشا, قازاقستان رەسپۋبليكاسىنىڭ مەملەكەتتىك كىرىستەر ورگاندارى قۇزىرەتى شەڭبەرىندە تاسىمالداۋشىلاردىڭ قازاقستان رەسپۋبليكاسىنىڭ قولدانىستاعى زاڭناماسىندا بەلگىلەنگەن تىيىم سالۋلار مەن شەكتەۋلەردىڭ ساقتالۋىنا تۇراقتى نەگىزدە ءتيىمدى باقىلاۋدى جۇزەگە اسىرادى.
بۇدان باسقا, مەملەكەتتىك كىرىستەر كوميتەتى «استانا-1» ەلەكتروندىق دەكلاراتسيالاۋدىڭ اقپاراتتىق جۇيەسىندە اكەتۋگە تىيىم سالىنعان مۇناي ونىمدەرىن كەدەندىك دەكلاراتسيالاۋعا جول بەرمەۋ جونىندە شارالار قابىلدادى.