وتكەن عاسىر بەينەسى ءبىزدىڭ سانامىزدا مامىراجاي اۋاسىمەن, ىزگى سامالىمەن مۇنارتادى. قايىرىلماس ۋاقىتتىڭ كەرىمسال اسەرلەرى, قيلى وقيعالارى, ۇياڭ ساتتەرى ادەبيەت, مادەنيەت ارقىلى سانامىزدا جاتتالدى.
ءشامشى اندەرى... ول اندەردە اق ماڭدايلى ارۋدىڭ كۇلكىسى, ادامداردىڭ يگى جانى, ىنتىزار جۇرەگى, قيماستىقتان كوز توستاعانىنا جاس تولعان عاشىق تۇرپاتى بارداي. ءاربىر ءان وزەگى ءبىر-ءبىرىن كورمەسە ساعىناتىن, كورسە قۇشاقتاسا كەتەتىن مەيىربان ادامداردىڭ كوڭىلىنەن قۇرالعانداي. گۋمانيزم مارشى, جان ەرلىگى, تازالىق سازى مەنمۇندالايدى.
القيسسا, «اق بانتيك» ءانىنىڭ تاريحىنا توقتالماقپىز. وسىناۋ ادامنىڭ ءمولدىر شاعىنىڭ ەسكەرتكىشىندەي تۇمسا ءان ساناداعى ەستەلىكتەردى وياتادى. ەستى تىڭدارماننىڭ ار-وجدانىن ءتىرىلتىپ, تاۋ بۇلاعىنداي تازا شاعىنا ساپار شەكتىرەدى.
«بالاۋسا قىز ەدىڭ ءبىر كەزدە,
شاشىڭا اق بانتيك بايلاعان.
وزگەرىپ كەتىپسىڭ بۇل كۇندە,
كوركىڭە كوز تاستاپ ويلانام».
بالالىق اۋەنىنە ەلتىمەيتىن ادام جوق. ەندەشە, ءان ومىرشەڭدىگى دە ماڭگىلىك تاقىرىپتى وزەك ەتە بىلۋىندە. حوش, سول كەزدەگى جىگىت اعاسى ءشامشى قالداياقوۆ پەن بوزبالا مۇحتار شاحانوۆتىڭ دوسى قاراجان ءابلازىموۆ كوپتەن اڭساعان عاشىعى پاتيما تورەحانوۆامەن شاڭىراق قۇرادى. پاتيما 11-سىنىپتى ەندى عانا بىتىرگەن ەركە, ءمولدىر, اشاڭ ءجۇزدى ارۋ ەكەن. مەكتەپ بىتىرگەنىنە 12 كۇن عانا بولعان بالاۋسا قىز اق بانتيگىن اق ورامالعا ايىرباستاپ, ۇلكەن ومىرگە قادام باسادى. كيەلى تۇركىستان قالاسىنداعى قارا شاڭىراقتا وتكەن دۋماندى تويعا ءشامشى مەن مۇحتار قۇتتى قوناق بولادى. قوس دارىن ءبىر اپتا بۇرىن تويعا ارناپ ءان جازۋعا كىرىسكەن-ءتىن. دوستارى قاراجاننىڭ جۇبايى جاڭادان مەكتەپ بىتىرگەن بالاڭ ارۋ ەكەنىن ەستىپ, اقىن مەن سازگەر «اق بانتيك» ءانىن دۇنيەگە اكەلەدى. اقىرى ءان جولداستارىنىڭ ۇيلەنۋ تويىنا تارتۋ ەتىلىپ, تۇڭعىش رەت قالىڭ كوپشىلىك الدىندا ورىندالادى. پاتيما اپانىڭ ايتۋىنشا, ءاۋ باستا, ءاننىڭ ءسوزى وزگەشە بولىپ, كەيىن وزگەرتىلگەن ەكەن.
«شاكەڭ دە, مۇحاڭ دا قارەكەڭنىڭ جاس كۇنىندەگى جولداسى بولدى. ءبىز ۇيلەنبەي تۇرىپ تا مۇحاڭ ەكەۋى ءبىر قولدىڭ ساعاسىنداي اۋىزبىرلىكتە كومسومول كوميتەتىندە قاتار ەڭبەك ەتكەن. مەنى ول كىسىلەر تويدا ءبىر-اق رەت كوردى. ال ءاندى سۋرەتىمە قاراپ وتىرىپ جازىپتى. تويدىڭ الدىندا قارەكەڭنىڭ ءبىر توپ جورا-جولداسى سول «پازيك»-كە ءمىنىپ, ۋلاپ-شۋلاپ وسى ءاندى شىرقاپ كەلگەنى كۇنى كەشەگىدەي ەسىمدە. ال تويدا بارلىعى قوسىلىپ شىرقادى. بالتاگۇل دەگەن قايىنسىڭلىم «باياننىڭ سۇيەمەلدەۋىندە العاش رەت مەن شىرقاعانمىن» دەپ ايتادى. ول كەزدە تىم جاسپىن, انگە اسا ءمان بەرمەپپىن. بۇل ءان سولاي ەل اراسىنا تاراپ كەتتى. ءوزىم ماقتانعاندى جانىم سۇيمەيدى. ءبىر مەن ەمەس, بارلىق اق بانتيكتى قىزدارعا ارنالعان عوي. ەل ءىشى بولعان سوڭ ءتۇرلى اڭگىمە ەستيمىز. ءان جارىققا شىققان بويدا ءوزىن كەيىپكەر ەتىپ, ءاننىڭ دۇنيەگە كەلۋىنە سەبەپكەر رەتىندە كورسەتكەن بازبىرەۋلەر ونىڭ شىعۋ تاريحىن بۇرمالاعان دا كەزدەر بولدى. ء«شامشى ءبىزدىڭ ۇيگە ءجيى كەلەتىن. مەن ول كەزدە اق بانتيكتى كىشكەنتاي قىز ەدىم», «اق بانتيك تاعىپ جۇرگەن مىنا ماعان ءشامشى ءان جولداعان» سەكىلدى جالعان سوزدەر جەلمەن بىرگە ەلگە كەڭىنەن تارالىپ, ءان تاريحى ەسكەرۋسىز قالدى. ارنالماعان نارسەنى قالاي ارنالدى دەپ ايتاتىنىن تۇسىنبەدىم. ءوزىم ەشكىمگە ماقتانىپ ايتقان ەمەسپىن», دەيدى پاتيما تورەحانوۆا.
ءيا, بۇگىندە ءۇش ۇل مەن ەكى قىزدان ون ەكى نەمەرە ءسۇيىپ وتىرعان ونەگەلى اجەنىڭ ىشكە بۇككەن سىرى مول. سول تۇستا نەبارى جيىرمانىڭ بەسەۋىنە جاڭا ىلىككەن مۇحتار شاحانوۆتىڭ سەزىم پەرنەسىن قوزعاعان تۇمسا سۋرەت بۇگىنگە جەتتى. تالاي جۇرەككە گۇل ەككەن ابزال شىعارمانىڭ تۋىنا سەبەپكەر بولعان سۋرەت ەدى ول.
«جىلداردىڭ ەركىنە باعىندىڭ,
جىلدارعا قول سوزدىڭ, جان قۇربىم.
بەلگىسىن بالالىق شاعىڭنىڭ,
ايتشى, سەن قاي جەردە
قالدىردىڭ؟»
اركىم بالالىق ءومىردىڭ اسقاق جالاۋىن ءار تۇسقا قالدىرار, ويلى ادام ءومىر بويى سول جالاۋعا قاراپ بوي تۇزەپ وتەر. «العاش رەت جۇرەگىڭدە بۇرشىك اتىپ, تامىر جايعان قاسيەتتى دە پاراساتتى ىزگىلىككە سەن» دەگەن دانالىق ءسوز تەگىن ايتىلماسا كەرەك. «اق بانتيك» ءانى – ادامدى پاك شاعىنىڭ وزەنىنە شومىلدىرار قايتالانباس تۋىندى ەكەنى تالاسسىز اقيقات.