28 مامىردا الماتى قالاسىندا Coca-Cola Içecek Kazakhstan كومپانياسى مەن ورتالىق ازيانىڭ ەۋرازيا قورىنىڭ سەرىكتەستىگى اياسىندا جۇزەگە اسىرىلعان Tañdauym ستيپەنديالىق باعدارلاماسىنىڭ العاشقى تسيكلى سالتاناتتى تۇردە قورىتىندىلاندى. التى اي بويى تەحنيكالىق, ينجەنەرلىك جانە وندىرىستىك ماماندىقتاردا ءبىلىم الىپ جاتقان 30 ستۋدەنت قىزعا مەنتورلىق قولداۋ كورسەتىلدى, دەپ حابارلايدى Egemen.kz.
Tañdauym باعدارلاماسى 2025 جىلى تەحنيكالىق جانە وندىرىستىك باعىتتاردى تاڭدايتىن قىزداردى قولداۋ ماقساتىندا ىسكە قوسىلدى. باعدارلامانىڭ ماقساتى – ولاردىڭ كاسىبي ورتاعا قولجەتىمدىلىگىن كەڭەيتۋ, رولدىك مودەلدەرمەن تانىسۋىنا جانە يندۋستريانى تاجىريبە ارقىلى تەرەڭىرەك تۇسىنۋىنە مۇمكىندىك بەرۋ.
باعدارلاماعا الماتى قالاسىنداعى 7 جوعارى وقۋ ورنىنان 172 ءوتىنىم كەلىپ ءتۇستى. ىرىكتەۋ ناتيجەسىندە 3-4 كۋرس ستۋدەنتتەرى اراسىنان 30 ستۋدەنت قىز ستيپەنديات اتاندى.
باعدارلاما بىرنەشە قولداۋ باعىتتارىن بىرىكتىردى. ءار قاتىسۋشى CCI Kazakhstan زاۋىتتارىنىڭ قازىرگى قىزمەتكەرلەرى قاتارىنان جەكە مەنتورعا يە بولدى – جوباعا جالپى 16 مەنتور قاتىستى. باعدارلاما بارىسىندا كەلىسسوز جۇرگىزۋ, كونفليكتتەردى باسقارۋ, سترەسس-مەنەدجمەنت, اسسەرتيۆتى مىنەز-ق ۇلىق جانە كوپشىلىك الدىندا سويلەۋ داعدىلارىنا ارنالعان soft skills بويىنشا 5 ترەنينگ وتكىزىلدى.
باعدارلاماداعى جەكە باعىتتاردىڭ ءبىرى – كوميۋنيتي-كەزدەسۋلەر مەن مانساپتىق ءىس-شارالار بولدى. قاتىسۋشىلار ءۇشىن 7 تاقىرىپتىق كەزدەسۋ ۇيىمداستىرىلدى, ونىڭ ىشىندە «وندىرىستەگى ايەل كوشباسشىلار: مانساپتى باستاۋ مەن كاسىبي ءوسۋ ءۇشىن نە ماڭىزدى؟» اتتى پانەلدىك پىكىرتالاس, Women in Business فورۋمىنا قاتىسۋ, سونداي-اق وندىرىستىك سالاداعى قازىرگى ماماندارمەن كەزدەسۋلەر ءوتتى.
«باعدارلاماعا قاتىسقاننان كەيىن ماماندىقتاعى «جالعىزدىق» سەزىمى مۇلدە جوعالدى. Tañdauym قاۋىمداستىعى – بۇل تاجىريبە, قورقىنىشتارىمىز بەن جەتىستىكتەرىمىزدى ەركىن بولىسەتىن قاۋىپسىز ورتا», دەدى باعدارلاما قاتىسۋشىسى جانسايا مولداحمەتوۆا.
باعدارلامانىڭ پراكتيكالىق بولىگى CCI Kazakhstan جانە Astana Motors زاۋىتتارىنا جاسالعان ساپارلاردى قامتىدى. بۇل ستۋدەنت قىزدارعا ناقتى وندىرىستىك ۇدەرىستەرمەن تانىسۋعا مۇمكىندىك بەردى. سونىمەن قاتار, 28 قاتىسۋشى ءوز قالاۋى بويىنشا تاڭدالعان كۋرستارعا – اعىلشىن ءتىلى مەن IELTS-كە دايىندىقتان باستاپ AutoCAD, Excel, HACCP جانە جاساندى ينتەللەكت بويىنشا كۋرستارعا ءبىلىم گرانتتارىن يەلەندى.
باعدارلاما قورىتىندىسى بويىنشا ءبىر قاتىسۋشى CCI Kazakhstan كومپانياسىندا تاجىريبەدەن ءوتۋ مۇمكىندىگىنە يە بولدى, ال تاعى ءتورت ستۋدەنت قىز كومپانيانىڭ امباسسادورلارى اتاندى.
«مەنىڭ ءوز-وزىمە دەگەن سەنىمىم ارتتى. تەحنيكالىق ماماندىقتار تەك ەر ادامدارعا ارنالعان دەگەن ستەرەوتيپتى جەڭدىم. سونىمەن قاتار, مەنى تۇسىنەتىن جانە مەنى مامان رەتىندە كورەتىن قولداۋشى ورتا مەن مەنتور تاپتىم», دەپ ءبولىستى باعدارلاما قاتىسۋشىسى گۇلناز شايحى.
قورىتىندى ساۋالناما ناتيجەلەرىنە سايكەس, قاتىسۋشىلاردىڭ 100%-ى باعدارلامانى باسقا ستۋدەنت قىزدارعا ۇسىنۋعا دايىن ەكەنىن بىلدىرگەن. 97%-ى ءوز-وزىنە دەگەن سەنىمىنىڭ ارتقانىن اتاپ ءوتتى, سونداي-اق 84%-ى باعدارلامانىڭ مانساپتىق ماقساتتارىن ايقىنداۋعا كومەكتەسكەنىن, ال 87%-ى مەنتورلارمەن ءوزارا جۇمىستى ءتيىمدى دەپ باعالاعان.
«كوميۋنيتي-كەزدەسۋلەردەن جانە مەنتورمەن قارىم-قاتىناستان كەيىن مەن soft skills داعدىلارىنىڭ دا ماڭىزدىلىعى كەم ەمەس, كەي جاعدايلاردا ءتىپتى ماڭىزدىراق ەكەنىن ءتۇسىندىم. ماعان جۇمىس بەرۋشىلەر ءۇشىن نە ماڭىزدى ەكەنى, سۇحبات كەزىندە سۇراقتارعا قالاي جاۋاپ بەرۋ كەرەك جانە ءوزىمدى قالاي دۇرىس تانىستىرۋ قاجەت ەكەنى تۋرالى تۇسىنىك قالىپتاستى», دەدى باعدارلاما قاتىسۋشىسى ايگەرىم دارمەش.
ۇيىمداستىرۋشىلاردىڭ ايتۋىنشا, Tañdauym باعدارلاماسىنىڭ العاشقى تسيكلى تەحنيكالىق ماماندىقتاردا وقيتىن ستۋدەنت قىزداردى جۇيەلى تۇردە قولداۋعا جوعارى سۇرانىس بار ەكەنىن كورسەتتى. باعدارلاما فورماتى كاسىبي دامۋدى, مانساپتىق باعىت-باعداردى جانە قولداۋشى قاۋىمداستىق قالىپتاستىرۋدى بىرىكتىرىپ, قاتىسۋشىلارعا وندىرىستىك جانە ينجەنەرلىك سالالاردا ءوز مانسابىن سەنىمدى تۇردە قۇرۋعا مۇمكىندىك بەردى.
CCI – Anadolu Group قۇرامىنا كىرەتىن حالىقارالىق سۋسىن ءوندىرۋشى تۇرىك كومپانياسى. كومپانيا تۇركيا, پاكىستان, قازاقستان, يراك, وزبەكستان, بانگلادەش, ازەربايجان, قىرعىزستان, يوردانيا, تاجىكستان, تۇركمەنستان جانە سيريادا جۇمىس ىستەيدى. CCI The Coca-Cola Company جانە Monster Energy Beverage Corporation كومپانيالارىنىڭ گازدالعان جانە گازدالماعان سۋسىندارىن ءوندىرىپ, ساتادى. سونداي-اق Anadolu Etap İçecek (Anadolu Etap Penkon Gıda ve İçecek Ürünleri Sanayi ve Ticaret Anonim Şirket) ەنشىلەس كومپانياسى ارقىلى كونتسەنتراتتالعان جەمىس شىرىنىن شىعارادى.
CCI قۇرامىندا 10 000-نان استام قىزمەتكەر جۇمىس ىستەيدى, كومپانيا 12 ەلدە 3 جەمىس وڭدەۋ زاۋىتى مەن 36 قۇيۋ زاۋىتىن باسقارادى, 600 ميلليوننان استام ادامعا ونىمدەرىن ۇسىنادى. گازدالعان سۋسىندارمەن قاتار ونىمدەر پورتفەلىنە شىرىندار, سۋ, سپورتتىق جانە ەنەرگەتيكالىق سۋسىندار, سالقىن شاي مەن كوفە كىرەدى.
CCI اكتسيالارى Borsa Istanbul (BIST) قور بيرجاسىندا «CCOLA.IS» سيمۆولىمەن ساۋدالانادى.
كق «ورتالىق ازيانىڭ ەۋرازيا قورى» (واەق) – قازاقستاندا 20 جىلدان استام جۇمىس ىستەيتىن ۇكىمەتتىك ەمەس ۇيىم. قور وسال توپتاردى قولداۋ, ۇەۇ الەۋەتىن ارتتىرۋ, ءبىلىم بەرۋ جانە جاستاردى قولداۋعا, الەۋمەتتىك كاسىپكەرلىكتى دامىتۋعا باعىتتالعان جوبارلاردى ىسكە اسىرادى.
قور ادامدارعا ەكونوميكالىق تۇراقتىلىققا جەتۋگە جانە ازاماتتىق بەلسەندىلىككە قاتىسۋعا قاجەتتى ءبىلىم, رەسۋرستار مەن قۇرالداردى ۇسىنادى. سونىمەن قاتار, كورپوراتيۆتىك سەكتورمەن بەلسەندى ىنتىماقتاستىق ورناتىپ, ESG باسىمدىقتارىنا سايكەس تۇراقتى جوبالاردى ىسكە اسىرادى جانە بيزنەستى سەنىمدى جەرگىلىكتى سەرىكتەستەرمەن بىرىكتىرەدى.