استانادا بيىل 1 900 ورىنعا ارنالعان 5 ستۋدەنتتەر جاتاقحاناسىنىڭ قۇرىلىسى اياقتالىپ, پايدالانۋعا بەرىلمەك. ال 2025 جىلعا قاراي جەكە ينۆەستورلار مەن جوعارى وقۋ ورىندارىنىڭ مەنشىكتى قاراجاتى ەسەبىنەن 11 مىڭعا جۋىق ورىندى قامتيتىن جاتاقحانالار سالىپ, تاپسىرۋ جوسپاردا بار.
استانادا قالا اكىمى جەڭىس قاسىمبەك پەن عىلىم جانە جوعارى ءبىلىم ءمينيسترى ساياسات نۇربەكتىڭ قاتىسۋىمەن ستۋدەنتتتەر جاتاقحانالارىن سالۋ بويىنشا جوبالىق كەڭسە اشىلدى. فرونت-ءوفيستىڭ نەگىزگى مىندەتى – جاتاقحانالار سالۋ جونىندەگى مەملەكەتتىك باعدارلامانى ىسكە اسىرۋ ءۇشىن قولايلى جاعدايلار جاساۋ جانە ستۋدەنتتەردى تۇرعىن ۇيمەن قامتاماسىز ەتۋ, سول سياقتى جوو-لار مەن الەۋەتتى ينۆەستورلارعا زاڭگەرلىك, كونسۋلتاتسيالىق جانە ساراپتامالىق قولداۋ كورسەتۋ.
«ەلورداعا وقۋعا كەلەتىن ستۋدەنتتەر سانى جىل سايىن ارتىپ كەلەدى. قالادا 15 جوعارى وقۋ ورنى بار, وندا 67 مىڭعا جۋىق ستۋدەنت وقيدى. ولاردىڭ ءبىر بولىگى بۇل قالادان ەمەس. جاۋاپتى مينيسترلىكپەن بىرلەسىپ ينفراقۇرىلىمدى قۇرۋ بويىنشا جۇمىس جۇرگىزەمىز. جاتاقحانالاردا كەزەڭ-كەزەڭىمەن ورىن دايىندايمىز. بۇل جۇمىس ينۆەستورلاردى دا, جوعارى وقۋ ورىندارىن دا جۇمىلدىرا وتىرىپ جۇرگىزىلەدى. ءبىز ءوز تاراپىمىزدان جەر ۋچاسكەلەرى مەن اكىمشىلىك ماسەلەلەر بويىنشا كومەك كورسەتەمىز», دەدى استانا اكىمى ج.قاسىمبەك.
بيىل «قارجى ورتالىعى» اق عىلىم جانە جوعارى ءبىلىم مينيسترلىگى ازىرلەگەن جاڭا تەتىك بويىنشا سۋبسيديالاۋعا جانە باسقا دا ماسەلەلەردە كومەك كورسەتەدى. بۇل تەتىك جاڭا جاتاقحانالار سالۋ كەزىندە ءاربىر توسەك-ورىن ءۇشىن سۋبسيديالاۋدى كوزدەيدى.
ينۆەستورلار, عىلىم جانە جوعارى ءبىلىم مينيسترلىگى, استانا اكىمدىگى, «قارجى ورتالىعى» اق جانە بىرقاتار جوو اراسىندا ستۋدەنتتىك جاتاقحانالار سالۋ بويىنشا ارى قاراي دا جەمىستى ىنتىماقتاستىق ورناتۋ تۋرالى مەموراندۋمدار جاسالدى.