پارلامەنت سەناتىنىڭ توراعاسى ماۋلەن اشىمباەۆ ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي Facebook پاراقشاسىندا جازبا جاريالادى, دەپ حابارلايدى Egemen.kz.
«بۇگىن – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى. بۇل – تاريحتان تاعىلىم الاتىن جانە بابالار رۋحىنا تاعزىم ەتەتىن ماڭىزدى داتا. شىن مانىندە, حالقىمىزدىڭ باسىنان وتكەن قاسىرەتتى كەزەڭدەردى ۇلت جادىنان وشىرمەۋ ايرىقشا مانگە يە. سول ارقىلى تاريحي سانامىزدى جاڭعىرتىپ, ۇلتتىق بىرەگەيلىگىمىزدى نىعايتامىز. بۇل كۇن تاۋەلسىزدىكتىڭ قادىرىن ءتۇسىنۋ ءۇشىن دە اسا قاجەت.
سوندىقتان مەملەكەت باسشىسى قاسىم-جومارت كەمەل ۇلى توقاەۆ وسى ماسەلەگە ۇنەمى باسا ءمان بەرىپ كەلەدى. پرەزيدەنتىمىزدىڭ تاپسىرماسى بويىنشا ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا قۇرىلعانى بەلگىلى. جۇيەلى جۇمىستىڭ ارقاسىندا بۇرىن قۇپيا بولىپ كەلگەن كوپتەگەن ارحيۆ ماتەريالىنا قولجەتىمدىلىك قامتاماسىز ەتىلدى. بۇل رەتتە سەناتتىڭ قولداۋىمەن جارىق كورگەن الاپات اشارشىلىققا قاتىستى جەتى تومدىق قۇجاتتار جيناعىن دا اتاپ وتكەن ءجون», دەپ جازدى م.اشىمباەۆ.
بۇدان سوڭ ول وتكەن اپتادا وسى اتاۋلى كۇنگە وراي «قارلاگ» مۋزەيىنە ارنايى بارىپ, جازىقسىز جالا جابىلعانداردىڭ رۋحىنا تاعزىم ەتكەنىن جازعان.
«ۇلت ءۇشىن ءومىرىن قۇربان ەتكەن ارىستارىمىزدىڭ ەسىمدەرىن ۇلىقتاۋ, قاتە ساياساتتىڭ سالدارىنان وپات بولعانداردىڭ سوڭىنان دۇعا باعىشتاۋ – بارشامىزدىڭ پەرزەنتتىك جانە ازاماتتىق بورىشىمىز. سول سەبەپتى بۇگىنگى بۋىن مەن كەلەر ۇرپاق ءۇشىن بۇل كۇننىڭ ءمانى تەرەڭ, ماڭىزى زور بولىپ قالا بەرەرى ءسوزسىز. ەندى ەشقاشان قازاق دالاسىندا مۇنداي قاسىرەت بولماسىن! ءاردايىم ەلىمىز امان, جۇرتىمىز تىنىش بولسىن!», دەلىنگەن جازبادا.