ەلوردا اۋرۋحاناسىندا جاڭا يننوۆاتسيالىق بولىمشە اشىلدى

ايتا كەتسەك, مۇنداي جوبا استانا قالاسىندا العاش رەت جۇزەگە اسىرىلىپ وتىر.

«مۇنداعى باستى ماقسات – پرەپاراتتاردى پاتسيەنتتەرگە جەتكىزۋدى ورتالىقتاندىرىپ, جۇيەنى تسيفرلاندىرۋ. ناۋقاسقا بەرىلەتىن ءدارى-دارمەك مولشەرى دە اۆتوماتتى تۇردە قاداعالانىپ وتىرادى. ءبولىمنىڭ بىرەگەي تۇسى دا وسى – ءدارى-دارمەكتى ىسىراپ قىلماي, ارتىق شىعىننىڭ الدىن الۋ. سونداي-اق قاتە ءدارى-دارمەك تاعايىنداۋ قاۋپى اجەپتاۋىر ازايادى. الدىن الا ەسەپتەۋلەر بويىنشا جوبا جىلىنا 400 ملن تەڭگەگە دەيىن بيۋدجەت قاراجاتىن ۇنەمدەۋگە مۇمكىندىك بەرەدى», دەيدى ەلوردالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ.

گوسپيتالدىق فارماتسيا بولىمشەسىنىڭ جوباسى الەمدىك تاجىريبەدە كەڭ قولدانىستا ءارى حالىقارالىق تالاپتاردىڭ ءبىرى بولىپ سانالادى. قازىر قالا بويىنشا 9 اۋرۋحانا بولسا, الداعى ۋاقىتتا كوپبەيىندى اۋرۋحانالاردىڭ بارلىعىندا اتالمىش جۇيەنى ەنگىزۋ جوسپاردا تۇر.

«جوبانىڭ نەگىزگى مىندەتى – دارىگەرلەردىڭ تاعايىنداۋى بويىنشا مەديتسينالىق پرەپاراتتاردى ۋاقىتىلى جانە ساپالى دايىنداۋ, ولاردى مەديتسينالىق ۇيىمنىڭ كلينيكالىق جانە پارا-كلينيكالىق بولىمشەلەرىنە جەتكىزۋ. دارىلىك پرەپاراتتار كلينيكالىق فارماكولوگپەن ءار ناۋقاسقا ونىڭ جاسى, سالماعى, قارسى كورسەتكىشتەرى, تاۋلىكتىك دوزاسى جانە وزگە دە ولشەمدەر بويىنشا تاعايىندالادى. بۇل جوبانى ىسكە اسىرۋ كەزىندە ءبىزدىڭ كلينيكادا بۇعان دەيىن جۇزەگە اسىرىلعان اكگيۋن اقپاراتتىق جۇيەسىنىڭ دايىندىعى ماڭىزدى ءرول اتقاردى», دەپ اتاپ ءوتتى №2 كقا باس دارىگەرى نۇربول تۇرسىنباەۆ.

اۋرۋحانا باسشىسى مەكەمەنىڭ ەكى بىردەي عيماراتىن بىرىكتىرىپ, وعان قوسا قابىلداۋ بولىمشەسىنىڭ حابىنا اينالاتىن جاڭا جوبانى تانىستىردى. ءدال وسى تۇستا بالالارعا ارنالعان جاڭا تراۆماتولوگيالىق پۋنكت اشۋ جوسپارعا ەنگىزىلگەن.

سونداي-اق پاتسيەنتتەرگە ءبىر قادام جاقىندىق – ولاردى قولداۋ قىزمەتى, ەلەكتروندىق كەزەكتى ەنگىزۋ, پاتسيەنتتەردى جوسپارلى گوسپيتاليزاتسيالاۋ الگوريتمى بويىنشا جۇمىس ىستەيتىن فرونت-وفيس اشىلدى. جاقىن ارادا بارلىق نيەت بىلدىرۋشىلەرگە ونلاين رەجيمدە بوس توسەك-ورىن سانىن كورە الاتىن مۇمكىندىك تۋادى, بۇل قىزمەت اۋرۋحانا سايتىندا دا قولجەتىمدى بولماق.