اقمولا وڭىرلىك گارنيزونىنىڭ 68665 اسكەري بولىمىندە بەلگىلەنگەن اسكەري قىزمەت مەرزىمىن اياقتاعان جۇزدەن استام ساربازدى شىعارىپ سالۋ ءراسىمى ءوتتى.
اسكەردە ولار گراناتا لاقتىرۋ, پۋلەمەتپەن اتۋ, مەرگەندىك جانە زەڭبىرەكشى سىندى اسكەري-ەسەپكە الىناتىن ماماندىقتاردى مەڭگەردى.
– ءبىر جىل ىشىندە سەندەر قارۋ-جاراق پەن اسكەري تەحنيكانىڭ زاماناۋي ۇلگىلەرىن زەردەلەدىڭدەر. شىنىعىپ شىمىر بولدىڭدار, پسيحيكالىق تۇرعىدان نىعايدىڭدار. اسكەر مەكتەبىنەن العان ىلىمدەرىڭ الدا ازاماتتىق سالادا دا قاجەتتەرىڭە جارارىنا سەنىمىم مول, – دەپ اتاپ ءوتتى بريگادا كومانديرى, پودپولكوۆنيك اباي الىبەكوۆ.
ءبىلىم بەرۋ سالاسىنداعى جەڭىلدىكتەر مەن اسكەردە ەڭبەك نارىعىندا سۇرانىسقا يە جۇمىسشى ماماندىعىن مەڭگەرۋ مۇمكىندىگىنىڭ بولۋى ارقاسىندا جاستار اراسىندا اسكەرگە بارۋعا قىزىعۋشىلار قاتارى ارتىپ وتىر.
– اسكەرگە كەلگەنىمە وكىنبەيمىن. اسىرەسە, بەيىمدەلۋ كەزىندە قولداۋ كورسەتكەن جانە بىزگە بەرگەن بىلىمدەرى ءۇشىن كومانديرلەرگە ريزاشىلىعىم شەكسىز. اسكەر ارقىلى بولاشاققا سەنىمىم ارتىپ, جاڭا پەرسپەكتيۆالارعا جولىم اشىلدى دەپ ۇمىتتەنەمىن, – دەپ ويىمەن ءبولىستى الماتى وبلىسىنان كەلگەن شابۋىلداۋ باتالونىنىڭ مەرگەنى, قاتارداعى جاۋىنگەر ايبەك تاشكينباي.
باسشىلىق اسكەري قىزمەتشىلەرگە ادال قىزمەتى ءۇشىن العىس ايتىپ, گراموتالار مەن ەستەلىك سىيلىقتار تابىس ەتتى. ەرەكشە كوزگە تۇسكەن ساربازداردىڭ اتا-انالارىنا العىس حاتتار جولداندى.
كوپتەگەن جاس ۇلتتىق بىرىڭعاي تەستىلەۋدەن وتپەي-اق ەلىمىزدىڭ جوعارى وقۋ ورىندارىنا ءتۇسۋ قۇقىعىن پايدالانۋعا نيەتتى ەكەنىن ايتا كەتكەن ءجون. ال اسكەري قىزمەتتىڭ قىر-سىرىن ءبىلىپ, ىرعاعىنا ۇيرەنگەندەر اسكەردە قالىپ, كەلىسىمشارت بويىنشا اسكەري قىزمەتتى جالعاستىرۋدى ءجون كورىپ وتىر.