سەناتتا «ەكونوميكانىڭ ناقتى سەكتورىنا نەسيە بەرۋدى كەڭەيتۋ جونىندەگى شارالار» تاقىرىبىندا دوڭگەلەك ۇستەل ءوتتى.
وتىرىسقا ۇلتتىق ەكونوميكا ءبىرىنشى ۆيتسە-ءمينيسترى تيمۋر جاقسىلىقوۆ, قارجى نارىعىن رەتتەۋ جانە دامىتۋ اگەنتتىگى توراعاسىنىڭ ءبىرىنشى ورىنباسارى نۇرلان ءابدىراحمانوۆ, اۋىل شارۋاشىلىعى ۆيتسە-ءمينيسترى رۇستەم قۇرمانوۆ, يندۋستريا جانە ينفراقۇرىلىمدىق دامۋ ۆيتسە-ءمينيسترى الماز ىدىرىسوۆ جانە ەكىنشى دەڭگەيدەگى بانكتەردىڭ, مەملەكەتتىك جانە كۆازيمەملەكەتتىك ورگانداردىڭ وكىلدەرى قاتىستى.
جيىن بارىسىندا پارلامەنتشىلەرگە مەملەكەت باسشىسىنىڭ ەكونوميكانىڭ ناقتى سەكتورىنا نەسيە بەرۋ بولىگىندەگى تاپسىرمالارىن ورىنداۋدىڭ ارالىق ناتيجەلەرى تۋرالى باياندالدى.
دوڭگەلەك ۇستەلدى جۇرگىزگەن قارجى جانە بيۋدجەت كوميتەتىنىڭ توراعاسى, سەناتور سۇلتانبەك ماكەجانوۆ سوڭعى ەكى جىلدا الەمدىك ەكونوميكا پاندەميا مەن اۋقىمدى ساياسي كاتاكليزمدەرگە بايلانىستى داعدارىستى باستان كەشىرگەنىن, ونىڭ قۇرامداس بولىگى رەتىندە ءبىزدىڭ ەل ەكونوميكاسى دا ايتارلىقتاي قيىندىقتارعا تاپ بولعانىن ايتتى. سوندىقتان داعدارىستى ەڭسەرۋ جانە ەكونوميكانىڭ ودان ءارى دامۋىن ىنتالاندىرۋ ءۇشىن ءتيىستى شارالار قابىلداۋ قاجەتتىلىگى تۋىنداپ وتىر. «وسىنداي شارالاردىڭ ءبىرى – وتاندىق ەكونوميكاعا نەسيە بەرۋدى كەڭەيتۋ», دەدى ول.
– نەسيەلەۋ – دامۋدىڭ ماڭىزدى فۋنكتسيالارىنىڭ ءبىرى. نارىقتىق ەكونوميكا جاعدايىندا نەسيەلەر ەكونوميكانىڭ قاجەتتى اينالىم قاراجاتتارىنا دەگەن قاجەتتىلىكتەرىن قاناعاتتاندىرا وتىرىپ, ونىڭ ۇزدىكسىز جۇمىسىن قامتاماسىز ەتەدى. ەلىمىز ءۇشىن شيكىزاتتىق ەكونوميكاعا, تۇپكىلىكتى تاۋارلار مەن كورسەتىلەتىن قىزمەتتەردىڭ وتاندىق ءوندىرىسى سالاسىنا نەسيە بەرۋ ەرەكشە ماڭىزدى. وسى ماقساتتا مەملەكەت باسشىسى 2023 جىلعى 10 ناۋرىزداعى «ەكونوميكانىڭ ناقتى سەكتورىنا كرەديت بەرۋدى كەڭەيتۋ جانە حالىقتىڭ شامادان تىس كرەديت الۋىن ازايتۋ جونىندەگى شارالار تۋرالى» جارلىعىندا وتاندىق كاسىپكەرلىك سۋبەكتىلەرى مەن ەلىمىزدىڭ حالقىن قولداۋعا باعىتتالعان بىرقاتار تاپسىرما بەردى, – دەدى سەناتور.
دوڭگەلەك ۇستەل باسىندا ۇلتتىق ەكونوميكا ۆيتسە-ءمينيسترى تيمۋر جاقسىلىقوۆ, قارجى نارىعىن رەتتەۋ جانە دامىتۋ اگەنتتىگى توراعاسىنىڭ ءبىرىنشى ورىنباسارى نۇرلان ءابدىراحمانوۆ, اۋىل شارۋاشىلىعى ۆيتسە-ءمينيسترى رۇستەم قۇرمانوۆ ءسوز الىپ, ءوز ۆەدومستۆولارى تاراپىنان مەملەكەت باسشىسىنىڭ ەكونوميكانىڭ ناقتى سەكتورىنا نەسيە بەرۋدى كەڭەيتۋ جونىندەگى تاپسىرمالارىن ىسكە اسىرۋ بويىنشا اتقارىلىپ جاتقان جۇمىستارىن باياندادى. ولار اتالعان تاپسىرمالاردىڭ ورىندالۋى بويىنشا جانە كۇن تارتىبىندەگى پروبلەمالار تۋرالى ايتىپ, ولاردى شەشۋ بويىنشا ۇسىنىستارىن جەتكىزدى.
«بۇگىنگى دوڭگەلەك ۇستەلدە جەمىستى جۇمىس اتقارىپ, ازىرلەنگەن ۇسىنىمدار وتاندىق ەكونوميكانىڭ دامۋىنا ىقپال ەتەدى. قارجى جانە بيۋدجەت كوميتەتى دەپۋتاتتارىنىڭ تاراپىنان اتالمىش ماسەلە بويىنشا دەپۋتاتتىق ساۋالدار جولداۋ, ءتۇرلى ءىس-شارالار وتكىزۋ جانە زاڭ شىعارۋ بارىسىندا وسى باعىتتاعى جۇمىستار جالعاسىن تابادى», دەدى وتىرىستى قورىتىندىلاعان سۇلتانبەك ماكەجانوۆ.