اقشا اۋدارىمى ارتا ءتۇستى

اقشا اۋدارۋ جۇيەلەرىنىڭ ىشىندە رەسەيلىك «زولوتايا كورونا» كوش باستاپ تۇر, ول ارقىلى بيىل قاڭتار-اقپان ايلارىندا 28,1 ملرد تەڭگە اۋدارىلعان. ولاردان كەيىن Western Union (10,8 ملرد تەڭگە), MoneyGram (6,1 ملرد تەڭگە), «يۋنيستريم» (5,5 ملرد تەڭگە) جانە Contact (2,6 ملرد تەڭگە) تۇر. اقشا اۋدارۋ جۇيەسى ارقىلى ەڭ كوپ اقشا اۋدارىلعان ەلدەردىڭ ىشىندە رەسەي ءبىرىنشى ورىندا: بيىل قاڭتار-اقپان ايلارىندا 21,7 ملرد تەڭگە: 2022 جىلدىڭ قاڭتار-اقپانىنداعى 3,8 ملرد تەڭگەمەن سالىستىرعاندا 5,7 ەسە وسكەن.

ودان كەيىن وزبەكستان: 6,1 ملرد تەڭگە, ءبىر جىلداعى ءوسىم – 1,3%. العاشقى ۇشتىكتى وڭتۇستىك كورەيا تۇيىندەگەن. اتال­عان ەلدەن 5,2 ملرد تەڭگە اۋدارىلعان. ءبىر جىل ىشىندەگى ءوسىم – 14,7%. سودان كەيىن اقش (5,2 ملرد تەڭگەدەن ءسال از), تۇركيا (3 ملرد تەڭگە), قىرعىزستان (2,6 ملرد تەڭگە) جانە گەرمانيا (2,5 ملرد تەڭگە) ورنالاسقان.

Ranking دەرەگى بويىنشا بيىل قاڭتار-اقپان ايلارىندا ااج ارقىلى ەلىمىزگە اۋدارىلعان اقشانىڭ 40,7%-ى رەسەيدەن كەلىپتى. بىلتىرعى كورسەتكىش 12,2% بول­عان. سالىستىرۋ ءۇشىن ايتار بولساق, 2021 جىلدىڭ قاڭتار-اقپان ايلارىندا رف ۇلەسى – 20,2%, 2020 جىلدىڭ سايكەس كەزەڭىندە – 30,9%, ال كوروناداعدارىس الدىنداعى 2019 جىلدىڭ قاڭتار-اقپا­نىن­دا 42,3% بولدى.

اي سايىنعى كورسەتكىشكە قارار بولساق, رەسەيدىڭ ااج ارقىلى قازاقستانعا اۋدارىمدارىنىڭ ۇلەسى 2019 جىلدىڭ ورتاسىنان بەرى 40%-دان تومەن ءتۇستى. 2020 جىلدىڭ تامىز ايىنان باستاپ بۇل كورسەتكىش 30%-دان جوعارىلاعان جوق, ال 2021 جىلدىڭ قىركۇيەگىنەن 2022 جىلدىڭ ناۋرىزىنا دەيىن 12%-دان 18%-عا دەيىن وزگەردى. الايدا 2022 جىلدىڭ ساۋىرىنەن باس­تاپ, ۋكراينادا سوعىس باستالعاننان كەيىن ەلىمىزگە اۋدا­رىم­داردىڭ جالپى كولەمىندەگى رف ۇلەسى 34,9%-عا دەيىن ءوستى جانە وتكەن جىلدىڭ سوڭىنا قاراي ول 47%-دان 73%-عا دەيىن ۇلعايدى. ناتيجەسىندە, ەگەر جالپى 2021 جىلى رەسەيدىڭ ءبىزدىڭ ەلگە اۋدا­رىمدارداعى ۇلەسى نەبارى 18,7%-دى قۇراسا, 2022 جىلى 52,6%-عا جەتتى.