اقان سەرىنىڭ اماناتى

اقان سەرى قورامسا ۇلىنىڭ 180 جىلدىعىنا وراي ۇيىمداستىرىلعان رەسپۋبليكالىق ءداستۇرلى انشىلەر بايقاۋىنا قازاق دالاسىنىڭ بار قيىرىنان دامەلى انشىلەر جينالدى. ولار جاس ەرەكشەلىگىنە قاراي ءۇش توپقا ءبولىندى. ءار توپتىڭ ۇزدىكتەرى ارنايى ماراپاتتارعا يە بولسا, سونىمەن بىرگە, «قۇلاگەر», «ماڭماڭگەر», «مايدا قوڭىر», «بالقاديشا» سىندى ارنايى جۇلدەلەر تاعايىندالدى.

وبلىستىق مادەنيەت جانە ءبىلىم باسقارمالارىنىڭ دەمەۋىمەن وتكەن رەسپۋبليكالىق ءان دوداسى ءداس­تۇرلى ءان ونەرىن دامىتۋدى, ارى­داعى ارۋاقتى اتالارىمىزدىڭ ۇلتتىق ونەرىمىزگە قوسقان ولشەۋسىز ەڭبەگىن ناسيحاتتاۋدى مۇرات تۇتقاندىعىن ءسوز اراسىندا سىنالاپ ايتا كەتكەن ءجون. ارينە, جاۋاپتى جۇمىستىڭ تۇپقازىعىن ۇستاعان اقان سەرى اتىن­داعى جوعارى مادەنيەت كوللەدجى. جيناقتاپ ايتقاندا, اقان سەرىنىڭ ەسىمى بەرىلگەن وقۋ ورنى مەن ىبىراي التىنسارين اتىنداعى توسبەلگىنىڭ يەگەرى, كوللەدج ديرەكتورى قۇرالاي ىدىرىسوۆانىڭ ەڭبەگى زور.

– ەلىمىزدىڭ تۇس-تۇسىنان اقان­نىڭ ءانىن اۋەلەتىپ جەتكەن ورىمدەي جاستار كوڭىلگە قۋانىش سىيلاپ, ولمەس ءاننىڭ ەرتەڭىن ەلەستەتتى. ون ەكىگە ەندى تولعان جاس انشىلەردىڭ بالعىن داۋىستارى بابىنا جەتكەن جيىرما بەستەگى انشىلەردىڭ زالدى كەرنەگەن داۋىستارىمەن بىرتىندەپ باۋراپ الدى. ارينە, ارقانىڭ اسقاق ءانىن, ءيىرىمى مول, مىڭ قۇبىلعان اقاننىڭ ءانىن شەبەر ورىنداۋ جاس ءانشى ءۇشىن وڭاي ەمەس. دەگەنمەن, بايقاۋعا تۇسكەن قىرىق شاقتى ءان­شى­نىڭ ىشىنەن وزىپ شىعىپ, گالا-كون­تسەرتكە قاتىسقان ورىمدەي ورەندەردىڭ تالابى تاۋداي ەكەن, – دەدى زەردەلى كورەرمەننىڭ ءبىرى مارال جاقىپوۆا. – سەرىنىڭ ءانىن مايتالمان كاسىبي انشىلەردىڭ ورىنداۋىندا قۇلاق قۇرىشىن قاندىرا تىڭداپ ۇيرەنگەن كورەرمەن رەتىندە مەنى كەشەگى جاستاردىڭ سالعان ءانى سول اققۋ سازدى, گاككۋ نازدى اۋەندەردىڭ ۇزىلمەگەنىمەن, جاسامپازدىعىمەن قۋانتتى.

ءان بايقاۋى ايرىقشا تارتىس­تى ءوتتى. ەڭ باستىسى, ونەر يەلەرىنە, كيەلى سوقپاققا تۇسكەن جاستارعا قيا­نات جاسالعان جوق. بارىنشا ءادىل باعا بەرىلدى. سوندىقتان دا وك­­پەلەگەن ەشكىم بولمادى. بۇل دا ۇل­كەن جەتىستىك. انشەيىندە ونەرلى ورتا­دا اراگىدىك كەزدەسىپ قالاتىن جات كورى­نىس ورىن المادى.

12-15 جاستاعى تالاپكەرلەر ارا­سىندا باس جۇلدەگە استانا قالا­سىنداعى قازاق ۇلتتىق ونەر ۋني­ۆەر­سيتەتى جانىنداعى كوللەدجدىڭ ءبىلىم الۋشىسى ىڭكار نۇپتەكە يە بولدى. ءبىرىنشى ورىن استانا قالاسىنداعى روزا باعلانوۆا اتىنداعى №2 ءبىلىم وشاعىنىڭ وقۋشىسى توميريس راما­زانعا بۇيىردى. 16-19 جاستاعى جاس­وسپىرىمدەر اراسىنداعى دودادا باس جۇلدەنى استانا قالاسىن­دا­عى قازاق ۇلتتىق ونەر ۋنيۆەرسي­تەتى جانىنداعى كوللەدجدىڭ ءبىلىم الۋشىسى مادەتحان ايدىن الدى. ءبىرىنشى ورىنعا اقان سەرى اتىنداعى جوعارى مادەنيەت كوللەدجىنىڭ وكىلى ءالبوسىن تاڭنۇر كوتەرىلدى.

كەلەسى توپتا باس جۇلدەگە قارا­عاندى وبلىسىنىڭ بۇقار جىراۋ اۋدانىنان كەلگەن جاس ءانشى قۋان­دىق توكەنوۆ لايىقتى دەپ تانىلدى. «ماڭماڭگەر» اتالىمىنا الما­تى قالاسىنداعى پ.ي.چايكوۆسكي اتىنداعى مۋزىكالىق كوللەدجدىڭ ءبىلىم الۋشىسى دانيار نۇرمولداەۆ, «بالقاديشا» اتالىمىنا استانا قالاسىنداعى قازاق ۇلتتىق ونەر ۋنيۆەرسيتەتى جانىنداعى كوللەدج­دىڭ ءبىلىم الۋشىسى گاۋحار حالىق, «مايدا قوڭىر» اتالىمىنا ۇلى­تاۋ وبلىسىنىڭ جەزقازعان مۋزىكا­لىق كوللەدجىنىڭ ءبىلىم الۋشىسى ازامات نۇرعالي ۇلى, «ماقپال» اتالىمىنا پاۆلودار وبلىسى ەكىباس­تۇز قالاسىنداعى ەستاي اتىنداعى بالالار مۋزىكالىق مەكتەبىنىڭ وكىلى اگيليا تاۆلەتەەۆا, «قۇلاگەر» اتا­لىمى بويىنشا سولتۇستىك قازاق­ستان وبلىسىنداعى ەرمەك سەركەباەۆ اتىنداعى ونەر كوللەدجىنىڭ ءبىلىم الۋشىسى مۇرات قاجكەن يە بولدى.

كوكشەتاۋ