بۇگىن ەلىمىزدىڭ باسىم بولىگىندە كۇن اشىق بولادى

استانادا كوشپەلى بۇلت شىعادى, جاۋىن-شاشىنسىز. جەل وڭتۇستىك-باتىستان تۇندە 2-7, كۇندىز سەكۋندىنا 7-12 مەتر. اۋا تەمپەراتۋراسى تۇندە 5-7, كۇندىز 24-26 گرادۋس جىلى.

الماتىدا كوشپەلى بۇلت شىعادى, جاۋىن-شاشىنسىز. جەل سەكۋندىنا 0-5 مەتر. اۋا تەمپەراتۋراسى تۇندە 7-9, كۇندىز 22-24 گرادۋس جىلى.

شىمكەنتتە كوشپەلى بۇلت شىعادى, جاۋىن-شاشىنسىز. شىعىستان سوعاتىن جەلدىڭ كۇشى 8-13, ەكپىنى 15-20, كۇندىز سەكۋندىنا 23 مەترگە جەتەدى. اۋا تەمپەراتۋراسى تۇندە 10-12, كۇندىز 27-29 گرادۋس جىلى.

اقمولا وبلىسىندا جاۋىن-شاشىنسىز. وڭتۇستىك-باتىستان سوعاتىن جەلدىڭ كۇشى 9-14, تاڭەرتەڭ جانە كۇندىز سولتۇستىكتە, وبلىستىڭ باتىسىندا ەكپىنى سەكۋندىنا 15-20 مەترگە جەتەدى. اۋا تەمپەراتۋراسى تۇندە 5-10, وبلىستىڭ سولتۇستىگىندە 13, كۇندىز 23-28 گرادۋس جىلى.

جەتىسۋ وبلىسىندا جاۋىن-شاشىنسىز. سولتۇستىك-شىعىستان 9-14, وبلىستىڭ سولتۇستىگىندە, شىعىسىندا ەكپىنى سەكۋندىنا 17-22 مەتر بولاتىن جەل سوعادى. اۋا تەمپەراتۋراسى تۇندە 2-7 گرادۋس جىلى, وبلىستىڭ تاۋلى ايماقتارىندا 2-7 گرادۋس اياز, كۇندىز 19-24 گرادۋس جىلى, وبلىستىڭ تاۋلى ايماقتارىندا 14 گرادۋس جىلى.

تۇركىستان وبلىسىندا جاۋىن-شاشىنسىز. وبلىستىڭ سولتۇستىگىندە قۇمدى داۋىل سوعادى. شىعىستان سوعاتىن جەلدىڭ كۇشى 8-13, سولتۇستىكتە, باتىستا, وبلىستىڭ تاۋلى جانە تاۋ بوكتەرىندەگى اۋداندارىندا 15-20, ەكپىنى سەكۋندىنا 23-28 مەتر.

باتىس قازاقستان وبلىسىنىڭ شىعىسىندا تۇندە جاڭبىر جاۋادى. سولتۇستىكتەن جەل 9-14 م/س. اۋا تەمپەراتۋراسى تۇندە 8-13, كۇندىز 18-23, وبلىستىڭ وڭتۇستىگىندە 26 جىلى.