مۇعالىم بەدەلىن ارتتىرۋ, كاسىبي وسۋىنە ىقپال ەتۋ ماقساتىندا ەكىنشى جىل قاتارىنان ۇيىمداستىرىلىپ وتىرعان «Almaty ustazy» بايقاۋىنىڭ ءبىرىنشى كەزەڭىنە تىركەلۋ باستالدى.
بايقاۋعا الماتى قالاسىنىڭ مەملەكەتتىك ءبىلىم بەرۋ ۇيىمدارىنداعى نەگىزگى پاندەردەن 1-11-سىنىپتارعا ساباق بەرەتىن 36 جاسقا دەيىنگى مۇعالىمدەر قاتىسا الادى. كونكۋرس بارىسىندا مۇعالىمدەر ءوز تاجىريبەلەرى جانە پەداگوگيكالىق تۇجىرىمدارىمەن ءبولىسىپ, جەتىستىكتەرىن كورسەتە الادى. بيىلعى بايقاۋدىڭ باس جۇلدە قورى 5 ملن تەڭگە. سونىمەن قاتار بەس جەڭىمپاز فينليانديانىڭ حەلسينكي قالاسىندا تاعىلىمدامادان ءوتىپ, ءبىلىم بەرۋدىڭ تىڭ ادىستەرىن يگەرۋمەن قاتار, تاجىريبە الماسىپ, وزىق مەكتەپتەر جۇمىسىمەن تانىسىپ قايتادى.
«مەنىڭ ءبىلىم بەرۋ فيلوسوفيام» تاقىرىبىندا مۋلتيمەديالىق ماقالا ازىرلەۋ, «مۇعالىم – كاسىبي مامان» بايقاۋ ساباعىن وتكىزۋ, «مەن – مۇعالىم-كوشباسشىمىن» تاقىرىبىندا اۆتورلىق شەبەرلىك ساباقتارىن وتكىزۋ ء(وزىنىڭ پەداگوگيكالىق تاجىريبەسى جانە كاسىبي شەبەرلىگىمەن تانىستىرۋ) سياقتى ءۇش كەزەڭنەن تۇراتىن بايقاۋعا قاتىسۋشىلار almatyustazy-2023.kz پلاتفورماسىندا وسى جىلدىڭ 14 ساۋىرىنە دەيىن تىركەلدى. ال 17-26 ءساۋىر ارالىعىندا ماتەريالدار ساراپتاما كوميسسياسىنىڭ ىرىكتەۋىنەن وتەدى.
«بىلتىر باستاۋىش سىنىپ مۇعالىمدەرى بايقاۋدا بەلسەندىلىك تانىتتى. بايقاۋ قالانىڭ مەملەكەتتىك جالپى ءبىلىم بەرەتىن مەكتەپتەرىنىڭ دەڭگەيىن ارتتىرۋدى كوزدەيدى. الماتى وزىق ءبىلىم بەرۋ تەحنولوگيالارىنىڭ ورتالىعى رەتىندە دامي وتىرىپ, قازىرگى ءبىلىم بەرۋ جۇيەسىندەگى زاماناۋي وقىتۋ ادىستەرىنە باسىمدىق بەرىپ كەلەدى. وسى ورايدا جاس مۇعالىمدەر بايقاۋعا قاتىسا وتىرىپ, كاسىبي تۇرعىدا ءوسۋىن قامتاماسىز ەتىپ, تسيفرلىق ءداۋىر جاعدايىندا جۇمىستىڭ جاڭا تاسىلدەرىن يگەرۋگە قادام جاسايتىن بولادى», دەدى الماتى قالالىق ءبىلىم باسقارماسىنىڭ باسشىسى ءلاززات جىلقىباەۆا.
بايقاۋ وسى جىلدىڭ قازان ايىندا اياقتالادى.