قازاقستان ەلشىسى بولات يمانباەۆ ارمەنيانىڭ اۋماقتىق باسقارۋ جانە ينفراقۇرىلىم ءمينيسترى گنەل سانوسيانمەن كەزدەستى. جيىن بارىسىندا كولىك, ەنەرگەتيكا, جەر قويناۋىن پايدالانۋ جانە وڭىرارالىق سالاسىنداعى قازاقستان-ارمەنيا اراسىنداعى ىنتىماقتاستىقتى ودان ءارى دامىتۋ جونىندە ۋاعدالاستىقتارعا قول جەتكىزىلدى, دەپ حابارلايدى Egemen.kz.
ارميان تاراپى قازاقستانداعى ساياسي جانە الەۋمەتتىك-ەكونوميكالىق رەفورمالاردىڭ ىسكە اسىرىلۋ بارىسىمەن, سونداي-اق ناۋرىز ايىندا وتكەن پارلامەنتتىك سايلاۋدىڭ قورىتىندىلارىمەن ەگجەي-تەگجەيلى تانىستىرىلدى.
گ.سانوسيان قازاقستان باسشىلىعىنىڭ ساياساتىن جوعارى باعالاپ, ەرەۆان مەن استانا اراسىنداعى ءوزارا ءتيىمدى قارىم-قاتىناستاردى دامىتۋعا دايىن ەكەنىن ءبىلدىردى.
ارميان تاراپى ەكىجاقتى كولىكتىك جانە وڭىرارالىق بايلانىستاردىڭ بەلسەندى دامۋىن اتاپ, بۇعان 2022 جىلى ەكى ەل اراسىنداعى تاۋار اينالىمىنىڭ ەكى ەسەدەن استام ءوسۋى دالەل ەكەنىن ايتتى. گ.سانوسيان ساۋدا جانە ەنەرگەتيكا سەكتورلارىندا ەلەۋلى الەۋەتتىڭ بار ەكەندىگىن جانە ەۋرازيالىق ەكونوميكالىق وداق شەڭبەرىندە مۇمكىندىكتەردى پايدالانۋدىڭ ماڭىزدىلىعىن اتاپ ءوتتى.
اڭگىمەلەسۋ بارىسىندا 2023 جىلعا ارنالعان بىرلەسكەن ءىس-شارالار كەستەسى مەن بيىل 27-28 ساۋىردە ەرەۆاندا وتەتىن ەكونوميكالىق ىنتىماقتاستىق جونىندەگى قازاقستان-ارمەنيا ۇكىمەتارالىق كوميسسياسىنىڭ كەزەكتى 9-شى وتىرىسىن وتكىزۋ ماسەلەلەرى قاراستىرىلدى.