ءال-فارابي اتىنداعى قازاق ۇلتتىق ۋنيۆەرسيتەتىندە عىلىم اپتالىعى اياسىندا «عىلىم جانە بيزنەس: قازاقستاننىڭ يننوۆاتسيالىق دامۋ جولدارى» تاقىرىبىمەن عىلىمي-يننوۆاتسيالىق كورمە ءوتتى. وندا ەلىمىزدەگى جوعارى وقۋ ورىندارى مەن عىلىمي-زەرتتەۋ ينستيتۋتتارىنىڭ عالىمدارى ازىرلەگەن كوممەرتسيالاندىرۋعا دايىن جوبالار ءىرى كومپانيا باسشىلارى مەن بيزنەس وكىلدەرىنە تانىستىرىلدى, دەپ حابارلايدى Egemen.kz.
عىلىم-ءبىلىم-ءوندىرىس اراسىندا بايلانىس ارتتىرۋ, عىلىمدى بيزنەس ارقىلى دامىتۋدى ماقسات ەتكەن اۋقىمدى شاراعا عىلىم جانە جوعارى ءبىلىم ءمينيسترى ساياسات نۇربەك, ءال-فارابي اتىنداعى قازۇۋ-دىڭ باسقارما توراعاسى-رەكتور جانسەيىت تۇيمەباەۆ, الماتى قالاسى اكىمىنىڭ ورىنباسارى الىشەر ابدىقادىروۆ, «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ءبىرىنشى ورىنباسارى ماقسات قيقىموۆ جانە ءىرى كومپانيالار وكىلدەرى, عالىمدار قاتىستى.
كورمەدە ءال-فارابي اتىنداعى قازۇۋ, ل.ن.گۋميلەۆ اتىنداعى ەۇۋ, ق.ساتباەۆ اتىنداعى قازۇتۋ, س.اسفەندياروۆ اتىنداعى قازۇمۋ, م.اۋەزوۆ اتىنداعى وقمۋ, الماتى تەحنولوگيالىق ۋنيۆەرسيتەتى, م.ايتحوجين اتىنداعى مولەكۋليارلىق بيولوگيا جانە بيوحيميا ينستيتۋتى, يادرولىق فيزيكا ينستيتۋتى جانە وزگە دە جوو مەن عىلىمي ينستيتۋت عالىمدارى ءوز جوبالارىن بولاشاق بيزنەس-ارىپتەستەر نازارىنا ۇسىنۋعا مۇمكىندىك الدى.
ءال-فارابي اتىنداعى قازۇۋ-دىڭ بيولوگيا فاكۋلتەتىنىڭ عالىمدارى ميكروبالدىرلار نەگىزىندەگى بيولوگيالىق بەلسەندى قوسپالار جوباسىن ۇسىندى. جوبا جەتەكشىسى, پروفەسسور بولاتحان زايادان جوبانىڭ باستى جاڭالىعى كوپتەگەن سالاعا قاجەتتى قاۋىپسىز بيوپرەپاراتتار دايىنداۋ ەكەنىن العا تارتتى.
عالىمنىڭ ايتۋىنشا, فوتوتروفتى ميكروورگانيزمدەر توبىنا كىرەتىن ميكروبالدىرلار مەن تسيانوباكتەريالار – كوپتەگەن قۇندى بيولوگيالىق بەلسەندى قوسىلىستاردىڭ كوزى. سونداي-اق اگرارلىق, مەديتسينالىق, كوسمەتيكالىق جانە تاعام ونەركاسىبىندە قاۋىپسىز بيوپرەپاراتتار الۋعا ۇلكەن قىزىعۋشىلىق تۋدىرادى.
سونىمەن قاتار, قازۇۋ-دىڭ جاس عالىمى اسان ءابدىراحىم قىزمەتكەرلەردىڭ شارشاۋىن بولدىرماۋعا ارنالعان «GoDays» ستارتاپى جايلى ايتتى. اناليتيكالىق قۇرال جاساندى ينتەللەكتىگە نەگىزدەلگەن.
«جوبا ەموتسيونالدىق شارشاۋدىڭ الدىن الۋعا جانە جۇمىس جۇكتەمەسى مەن كەستەسىن قىزمەتكەردىڭ ەڭ ءتيىمدى جۇمىس ۋاقىتىنا سايكەس رەتتەۋگە كومەكتەسەدى», دەيدى ىزدەنۋشى.
كورمەدەن سوڭ عىلىم مەن بيزنەستىڭ تابىستى ارىپتەستىگى ماسەلەلەرىنە ارنالعان پلەنارلىق وتىرىس ءوتتى. سونىمەن قاتار, جيىن اياسىندا «قازىرگى جاعدايداعى عىلىم مەن بيزنەس ينتەگراتسياسى» تاقىرىبىنداعى دوڭگەلەك ۇستەل ۇيىمداستىرىلدى.