ەرتەڭ بىرقاتار وڭىردە قار جاۋادى

«قازگيدرومەت» رمك ۇسىنعان اقپاراتقا قاراعاندا, قازاقستاننىڭ اۋا رايىنا قارا تەڭىز جاقتان كەلە جاتقان بەلسەندى تسيكلون اسەر ەتەدى.

مامانداردىڭ بولجاۋىنشا, سولتۇستىكتە, سولتۇستىك-باتىستا, ورتالىقتا جاڭبىر سوڭى قارعا ۇلاسادى. سولتۇستىكتە, سولتۇستىك-باتىستا كوكتايعاق, جاياۋ بۇرقاسىن كۇتىلەدى, وڭتۇستىكتە شاڭدى داۋىل تۇرىپ, نايزاعاي وينايدى, باتىستا, ورتالىقتا نايزاعاي ويناپ, بۇرشاق جاۋادى.

سونداي-اق رەسپۋبليكا بويىنشا جەلدىڭ كۇشەيۋى مەن تۇمان بولجانادى.

«اقمولا وبلىسىنىڭ سولتۇستىك-باتىسىندا, وڭتۇستىگىندە, قوستاناي وبلىسىنىڭ ورتالىعىندا, وڭتۇستىگىندە, شىعىسىندا, كۇندىز باتىستا, اقتوبە وبلىسىنىڭ سولتۇستىگىندە قاتتى جاۋىن-شاشىن (جاڭبىر, قار) بولجانادى. كۇندىز باتىس قازاقستان وبلىسىنىڭ سولتۇستىگىندە, شىعىسىندا, اتىراۋ وبلىسىنىڭ سولتۇستىگىندە قاتتى جاڭبىر جاۋادى», دەلىنگەن «قازگيدرومەت» رمك حابارلاماسىندا.

استانادا كوشپەلى بۇل شىعادى, جاڭبىر, كەشكە قاراي قاتتى جاڭبىر قارعا ۇلاسىپ, كوكتايعاق بولادى. سولتۇستىك-شىعىسقا اۋىساتىن وڭتۇستىك-باتىس جەلدىڭ كۇشى 9-14, كۇندىز ەكپىنى 17-22 م/س بولادى. اۋا تەمپەراتۋراسى تۇندە جانە كۇندىز +5 + 7°س, كۇندىز ودان ءارى تومەندەيدى.

الماتىدا كوشپەلى بۇلت شىعادى, دەسە دە كۇن جاۋىن-شاشىنسىز وتەدى. تۇندە اۋا تەمپەراتۋراسى +11+13°س, كۇندىز +26+28°س.

شىمكەنتتە دە كوشپەلى بۇلت شىعادى, جاۋىن-شاشىن بولمايدى. وڭتۇستىكەن, وڭتۇستىك-باتىستان سوعاتىن جەلدىڭ ەكپىنى 8-13, كۇندىز 15-20 م/س بولادى. اۋا تەمپەراتۋراسى تۇندە + 13 + 15°س, كۇندىز + 31+33°س.