استانا قالاسىنىڭ 73 جاستاعى تۇرعىنى پوليتسياعا ارىزدانعان, دەپ حابارلادى Egemen.kz.
Polisia.kz حابارلاعانداي, استانا قالاسى الماتى اۋداندىق پب پوليتسيا قىزمەتكەرلەرى جەدەل-ىزدەستىرۋ ءىس-شارالارىن جۇرگىزۋ كەزىندە 22 جاستاعى ەلوردا تۇرعىنىن انىقتادى. تەرگەۋ بارىسىندا قىزدىڭ ەگدە جاستاعى ايەل ادامنىڭ ۇيىندە كۇتۋشى بولىپ جۇمىس ىستەگەنى بەلگىلى بولدى.
كۇدىكتى بانكتىڭ ءموبيلدى قوسىمشاسىنا زەينەتكەردىڭ اتىنان كىرىپ, كوممۋنالدىق تولەمدەردى جۇزەگە اسىرۋ سىلتاۋىمەن شوتتا جينالعان قاراجاتتان 2,5 ملن تەڭگەگە جۋىق اقشانى ۇرلاپ العان.
اتالعان فاكتى بويىنشا سوتقا دەيىنگى تەرگەۋ امالدارى جۇرگىزىلىپ, ۇستالعان كۇدىكتىنىڭ ەلوردا اۋماعىندا جاسالعان باسقا دا وسىعان ۇقساس قىلمىسقا قاتىسى بار-جوعى تەكسەرىلىپ جاتىر.