ورتالىق ءۇندىستاننىڭ يندۋيستىك عيباداتحاناسىندا ەدەن وپىرىلىپ ءتۇسىپ, 35 ادام مەرت بولدى, دەپ حابارلايدى Egemen.kz The Guardian باسىلىمىنا سىلتەمە جاساپ.
قايعىلى وقيعا مادحيا-پرادەش شتاتىنىڭ يندور قالاسىندا بولعان. ەدەن وپىرىلىپ ءتۇسىپ, عيباداتحانا ىشىندەگى ادامدار ساتىلى قۇدىققا ءتۇسىپ كەتكەن.
ساتىلى قۇدىقتى جاۋىپ تۇرعان ەدەن تەك مەتالل تورعا قۇيىلعان پليتكادان عانا تۇراتىنى انىقتالدى.
مادحيا-پرادەش شتاتىنىڭ ىشكى ىستەر ءمينيسترى ناروتتام ميشرا قايعىلى وقيعانى تەرگەۋ باستالعانى, ال قازا تاپقانداردىڭ وتباسىنا وتەماقى تولەنەتىنىن مالىمدەدى.
عيباداتحانادا بەيسەنبى كۇنى بولعان رام ناۆامي يندۋيستىك فەستيۆالىنە كوبىندە ايەلدەر مەن بالالار قاتىسقان.
پوليتسيا ءالسىز ەدەن ادامداردىڭ سالماعىن كوتەرە الماي وپىرىلىپ تۇسكەنىن مالىمدەدى. ولار قۇلاعان ساتتە قۇدىقتا شامامەن 25 فۋت (7,6 مەتر) سۋ بولعان.
جەرگىلىكتى جەدەل قىزمەت جۇمىسشىلارى قۇدىققا ءتۇسىپ كەتكەندەرگە جەتۋ ءۇشىن ارقان مەن باسپالداقتاردى پايدالانعان.
وقيعا بولعان ساتتە عيباداتحانادا بولعان ايەلدەردىڭ ءبىرىنىڭ سوزىنشە, كەي دىنشىلدەر قۇدىققا قول جايىپ, دۇعا قىلعان كۇيى قۇلاعان, ولار نە ىستەرىن بىلمەگەن. ءوزى بۇرىشتا تۇرعاندىقتان امان قالعان.
بيلىك وكىلدەرى قۇتقارۋ جۇمىسى جالعاسىپ جاتقانىن ايتتى. قازىرگى ۋاقىتتا 18 ادام قۇتقارىلدى, ولاردىڭ ءبارى اۋرۋحانادا جاتىر.
The Times of India حابارلاۋىنشا, يندورا قالاسى بيلىگى عيباداتحاناداعى ەدەندى قاڭتاردا الىپ تاستاماق بولعانىن دالەلدەيتىن قۇجات بار. سەبەبى ول كەلۋشىلەرگە قاۋىپ توندىرگەن.
وكىنىشكە قاراي, ولار جەرگىلىكتى يندۋيستەردىڭ نارازىلىعى سالدارىنان جوسپارىنان باس تارتقان.
وسىعان ۇقساس قايعىلى جاعداي بىلتىر قاراشادا ءۇندىستاننىڭ باتىسىنداعى گۋدجارات شتاتىندا بولدى. ول كەزدە موربي وزەنىندە 135 ادام قايتىس بولعان ەدى.