ەلىمىزدىڭ عىلىمي ومىرىندەگى جاعىمدى جاڭالىقتاردىڭ قاتارىنا پرەزيدەنتتىڭ ۇلتتىق عىلىم اكادەمياسىنا قاتىستى جارلىعىن قوسۋعا ابدەن بولادى. اكادەميانىڭ ابىرويىن ارتتىرعان قۇجاتتا بۇدان ءارى اكادەميا «پرەزيدەنت جانىنداعى ۇلتتىق عىلىم اكادەمياسى» مارتەبەسىن يەلەنىپ, جاڭا مەكەمە باسشىسىن ەل پرەزيدەنتىنىڭ ءوزى تاعايىندايدى ءارى قىزمەتتەن بوساتادى دەپ كورسەتىلگەن.
عىلىمي جۇرتشىلىق كوپتەن كۇتكەن ءۇمىت اقتالدى, مەملەكەت باسشىسىنىڭ «حالىق ۇنىنە قۇلاق اساتىن مەملەكەت» تۇجىرىمداماسى جەمىسىن بەردى. ارينە, ۇلتتىق عىلىم اكادەمياسىنىڭ مۇشەلەرى نەگىزگى ماقسات مەرەيلى مارتەبەگە قول جەتكىزۋدە عانا ەمەس, سونداي-اق زور جاۋاپكەرشىلىكتىڭ جۇكتەلەتىنىن دە جاقسى تۇسىنەدى. بۇعان دەيىن مەملەكەت باسشىسى ءوزى توراعالىق ەتەتىن «عىلىم جانە جاڭا تەحنولوگيالار بويىنشا» ۇلتتىق كەڭەس قۇرعان بولاتىن. الداعى ۋاقىتتا سول كەڭەستىڭ العاشقى وتىرىسى وتەدى دەپ كۇتىلىپ وتىر. سول كەزدە ەل عىلىمىن دامىتۋدىڭ باسىم باعىتتارى ايقىندالىپ, ۇلتتىق عىلىم اكادەمياسىنىڭ جاڭا مارتەبەگە سايكەس اتقارار مىندەتتەرىن ايقىنداۋ كوزدەلگەن. عالىمدار قاۋىمى ۇسىنعان عىلىمنىڭ جاڭا باعىت-باعدارى باعامدالىپ, ىسكە اسىرۋ تەتىكتەرى تياناقتالادى.
پارلامەنت پالاتالارىنىڭ بىرلەسكەن وتىرىسىندا جاڭادان سايلانعان دەپۋتاتتار الدىندا سويلەگەن سوزىندە دە قاسىم-جومارت كەمەل ۇلى ەل ەكونوميكاسى عىلىمعا نەگىزدەلۋى كەرەكتىگىن ەرەكشە اتاپ ءوتتى. «عىلىم مەن ءبىلىمدى ەكىنشى ورىنعا قويعان مەملەكەت ەشقاشان ەشبىر سالادا ءبىرىنشى ورىنعا كوتەرىلە المايدى» دەگەن قاعيدانى قاپەرىنە العان مەملەكەت باسشىسىنىڭ: «قازاقستان ەكونوميكاسى عىلىمي جەتىستىكتەردى نەگىزگە الۋى كەرەك. زەرتتەۋ جۇرگىزىپ, پاتەنت الۋ جەتكىلىكسىز. عىلىمي جاڭالىقتاردى وندىرىستە پايدالانۋ قاجەت. عىلىمدى جان-جاقتى دامىتۋ ءۇشىن جاڭا زاڭ قابىلداۋ كەرەك» دەگەنىن عىلىمي جۇرتشىلىق جىلى قابىلدادى. سونىمەن قاتار جاڭا زاڭ جوباسىن ازىرلەۋدە ۇلتتىق عىلىم اكادەمياسىنىڭ مۇشەلەرى دە بەلسەندى تۇردە اتسالىسۋعا دايىن ەكەنىن ايتقىم كەلەدى. عىلىم الەۋەتىن ارتتىرۋدا وتاندىق عالىمدار بار كۇش-جىگەرىن ايانباي جۇمسايتىنىنا سەنىمدىمىن.
كارىمبەك قۇرماناليەۆ,
ۇلتتىق قۇرىلتاي مۇشەسى, اكادەميك