شاكىرتى وزعان ۇستاز باقىتتى
ەڭبەك جولىن مەكتەپتە مۇعالىمدىكتەن باستاعان جاس مامان باقىتگۇل سۇلەيمەنوۆا قوستانايعا قونىس اۋدارعان سوڭ, جۇمىسىن تىلدەردى دامىتۋ باسقارماسىندا جالعاستىردى. دالىرەك ايتساق, تىلدەردى وقىتۋ ورتالىعىندا مەملەكەتتىك قىزمەتشىلەرگە قازاق ءتىلىن وقىتا باستادى. ارينە, ەرەسەكتەرگە ساباق جۇرگىزۋ تاجىريبەسى بىردەن قالىپتاسا قويماعانى انىق. ۇلكەندەردى ءتىل ۇيرەنۋگە قىزىقتىرۋ ءۇشىن كوپ ىزدەنۋگە تۋرا كەلدى. ب.سۇلەيمەنوۆا قازاق ءتىلىن وقىتۋدىڭ قىر-سىرىنا قانىعىپ, تاجىريبە جيناقتادى, ءتىل باسقارماسىنىڭ باس مامانى, كەيىن تىلدەردى دامىتۋ ءبولىمىنىڭ باسشىسى دەڭگەيىنە كوتەرىلدى. قىزمەت اۋقىمى كەڭەيىپ, جاۋاپكەرشىلىك جۇگى ارتا ءتۇستى.
باقىتگۇلدىڭ جاقسى مامان بولىپ قالىپتاسۋىنا ونىڭ ادامي بولمىسىنىڭ دا اسەرى بولعانىن ايتىپ وتكەن ءجون. ىسكەرلىك قابىلەت كوركەم مىنەزبەن ۇيلەسسە عانا ناتيجەسى وڭدى بولماق. ارىپتەستەرى دە, اراگىدىك قىزمەت بابىمەن جولىققان وزگە ازاماتتار دا باقىتگۇل زارلىققىزىن تابيعاتىنان بيازى, مىنەزى كوركەم, اقىرىن ءجۇرىپ, انىق باساتىن, قولعا العان قاي ءىسىن دە دابىرا ەتپەي, تياناقتى تىندىراتىن بىلىكتى مامان رەتىندە تانيدى.
باقىتگۇل وڭىردەگى مەملەكەتتىك ءتىلدى جەتىك مەڭگەرگەن وزگە ۇلت جاستارىن نازارعا الىپ, ۇنەمى قولداۋ ءبىلدىرىپ وتىردى. ولاردىڭ الەۋەتىنىڭ كەڭەيىپ, قاناتىن كەڭگە جايۋىنا جاعداي جاسادى. دميتري روماششەنكو, اللا گاۆرينا, ينديرا يۆانوۆا, ناتاليا رامازانوۆا, يگور شپاك, دەنيس سكوروحودوۆ سەكىلدى قازاق تىلىنە جەتىك وزگە ۇلت وكىلدەرىنىڭ ەلگە تانىلۋىنا جول اشتى. ول ەڭبەگىنىڭ ەش كەتپەي, جەمىسىن كورىپ جۇرگەنىن باقىتقا بالايدى. باقىت كىلتى ەڭبەكتە ەكەنىن سەزىنۋ ونى جىگەرلەندىرىپ, جاڭا ىستەرگە باستاماشى بولۋعا جەتەلەيدى. باقىتىن ەڭبەكتەن – تىلگە قىزمەت ەتۋدەن تاۋىپ, مەملەكەتتىك ءتىل ساياساتىنىڭ جۇزەگە اسۋىنا وزىندىك ۇلەس قوسىپ جۇرگەن باقىتگۇل جايلى ارىپتەستەرى دە جاقسى پىكىردە.
وسىدان ءبىر جىلدان استام ۋاقىت بۇرىن تىلدەردى دامىتۋ باسقارماسى تاراتىلىپ, قىزمەتكەرلەرىنىڭ ءبىرشاماسى مادەنيەت باسقارماسىنىڭ قۇزىرىنا ءوتتى. تۋعان وڭىردە ءتول ءتىلىمىزدىڭ تۇلەۋىنە ءتۇرلى ىستەرىمەن ۇيىتقى بولعان كەيىپكەرىمىز بولسا, قوستاناي وبلىسى اكىمى اپپاراتىنىڭ الەۋمەتتىك-ساياسي ءبولىمىنىڭ باسشىسى بولىپ تاعايىندالدى. جاڭا قىزمەت – ونىڭ ەڭبەگىنە بەرىلگەن باعا ىسپەتتەس.
بيالاش سۇيىنكينا,
ءبىلىم بەرۋ ءىسىنىڭ قۇرمەتتى قىزمەتكەرى
قوستاناي
كوڭىلدەن شىعاتىن باعدارلامالار
سوڭعى كەزدەرى كوگىلدىر ەكراننان جان سارايىڭدى اشىپ, كوڭىلىڭنىڭ كوكجيەگىن كەڭەيتەتىن باعدارلامالار ءجيى بەرىلىپ ءجۇر. ارينە, مۇنىڭ ءوزى ءبىز سەكىلدى قارت ادامداردىڭ ءبىر مەزگىل جانىن جادىراتىپ, الدانىش-ەرمەگىنە اينالارى ءسوزسىز.
وسى ورايدا, ەڭ الدىمەن, «جىبەك جولى» تەلەارناسىنان بەرىلىپ جۇرگەن «جاقسى ادامدارىم» باعدارلاماسىن ەرەكشە ءبولىپ اتار ەدىك. ەرلى-زايىپتى تانىمال انشىلەر قىدىرالى بولمان مەن قاراقات ءابىلدينا جۇرگىزەتىن حابار ءوز كورەرمەندەرىنىڭ كوزايىمىنا اينالىپ وتىر. وسىعان دەيىن ءانشى, اقىن ءارى سازگەر قىزىمىز روزا القوجا مەن «مۋزارت» ءانسامبلى جايلى بەرىلگەن باعدارلامالارى اسەرلىلىگىمەن ەستە قالدى. « ۇلىتاۋ» توبىنىڭ مۋزىكالىق سۇيەمەلدەۋى دە قويىلىمنىڭ ءارىن اشاتىنداي.
«حابار» تەلەارناسى ارقىلى كورەرمەندەرىمەن قاۋىشىپ جۇرگەن «جۇپ-جۇبىمەن» باعدارلاماسى دا ءساتتى ويلاپ تابىلعان دۇنيە دەگەن ويدامىز. بەلگىلى ازىلكەش تۇرسىنبەك قاباتوۆ پەن ونىڭ زايىبى ءمولدىر مۇقانوۆا ەكەۋىنىڭ جاراستى جۇبى جۇرگىزۋشىلىككە ورايىمەن تاڭدالعان. ءبىرىن-ءبىرى ءىلىپ اكەتىپ, ساتىمەن ورىندى تولىقتىرىپ وتىرادى. قاتىسۋشىلاردىڭ جۇبى دا ءوزارا تاندەم قۇرىپ, جاستارعا ۇلگى بولاتىنداي-اق جاندار. مۇنى ءبىر مەن عانا ەمەس, باسقالاردىڭ دا ايتىپ جۇرگەندىگىن قۇلاعىمىز شالدى.
ونەر الەمىندەگى دارىندى جاس تاۋەكەل ءمۇسىلىم بالامىزدىڭ «نارتاۋەكەل» كوپشىلىك-تانىمدىق باعدارلاماسىن دا ۇلكەن-كىشى ءدايىم اسىعا كۇتەدى. اسىرەسە, تانىم كوكجيەگى كەڭ جاستارىمىزدىڭ كوبەيىپ كەلە جاتقاندىعى كوڭىلگە قۋانىش سەزىمىن ۇيالاتادى.
قالىڭ كورەرمەنگە «ولجا سالعان» تاعى ءبىر باعدارلاما – «جۇلدىزبىسىڭ؟» بۇرىن ء«ازىل الەمى» ءازىل-سىقاق تەاترى ارقىلى جۇرتشىلىققا جاقسى تانىس ازىلكەش قايرات الىمگەرەي جۇرگىزۋشىلىك قىرىمەن دە كورىنىپ كەلە جاتقانداي اسەر قالدىرادى. ءبىر «اتتەگەن-ايى», باعدارلاماعا قاتىسىپ وتىرعان كەيبىر ونەر يەلەرىنىڭ ءوزىن كوگىلدىر ەكران الدىندا قالاي بولسا سولاي ۇستاپ, ەرسى قىلىق كورسەتۋلەرى دەر ەدىك. مۇنىسىن ولاردىڭ وزدەرى بايقامايتىن سىڭايلى.
الداعى كەزدە دە مادەني-تانىمدىق, ويىن-ساۋىق باعدارلامالارىنىڭ كوكجيەگى كەڭەيە بەرسىن دەگەن ءبىر عانا تىلەگىمىز بار.
كارىباي امزە ۇلى,
زەينەتكەر
تۇركىستان وبلىسى
دارىندى وقۋشىلار قاتارىندا
تسەلينوگراد اۋدانى اقمول اۋىلىنداعى ورتا مەكتەپتىڭ بىرنەشە وقۋشىسى «جاڭا قازاقستاننىڭ 100 دارىندى وقۋشىسى» اتتى رەسپۋبليكالىق بايقاۋعا قاتىستى. اتاپ ايتقاندا, داستان ورىنباسار, دامەلى ميران, ايلانا ىدىرىس, ءمادينا بايراق, گۇلجامال بايراق, جاناسىل ابدىعالي بايقاۋعا اپارعان ەڭبەكتەرىن كورسەتىپ, جەتكەن جەتىستىكتەرىن پاش ەتتى.
بايقاۋدى «Bilim-òrkenieti» ۇلتتىق يننوۆاتسيالىق عىلىمي-زەرتتەۋ ورتالىعى ۇيىمداستىردى. اتالعان ءىس-شارا ەلىمىزدە التى جىل قاتارىنان وتكىزىلىپ كەلەدى. ماقسات – وتانىمىزداعى دارىندى جاستار اراسىندا بايلانىس ورناتۋ, وقۋشىلاردىڭ عىلىمي الەۋەتىن كۇشەيتۋ, يننوۆاتسيالىق يدەيالارىن كەڭەيتە وتىرىپ ۇزدىكتەرىن انىقتاۋ.
اتالعان بايقاۋ اياسىندا «جاڭا قازاقستاننىڭ ۇزدىك دارىندى وقۋشىسى» دەگەن تاقىرىپتا رەسپۋبليكالىق فورۋم وتكىزىلدى. وعان مارتەبەلى مەيماندارمەن قاتار, ەلىمىزدىڭ بارلىق وڭىرىنەن كەلگەن دارىندى وقۋشىلار قاتىستى. ولار اعا بۋىننىڭ اقىل-كەڭەسىن تىڭدادى. عىلىم قۋىپ, جاڭاشىلدىققا ۇمتىلعان دارىندى وقۋشىلاردى اعا بۋىن وكىلدەرى ماراپاتتادى.
اقمول مەكتەبىنىڭ دارىندى وقۋشىلارى وسى جەتىستىكپەن شەكتەلىپ قالمايدى دەپ سەنەمىز.
ايىم شويبەكوۆا,
تاريح ءپانىنىڭ مۇعالىمى
اقمولا وبلىسى,
تسەلينوگراد اۋدانى