ارنايى قۇرىلعان كوميسسيانىڭ قورىتىندىسى بويىنشا, قاراعاندى وبلىسىنداعى كارەردە جۇمىسشىنىڭ قازا بولۋىنا «Nova-تسينك» كاسىپورنىنىڭ باسشىلىعى كىنالى دەپ تانىلدى. بۇل تۋرالى AstanaTV ارناسى حابارلادى, دەپ جازادى Egemen.kz.
وقيعا قاڭتار ايىندا بولعان. كەندى بۇرعىلاۋ بارىسىندا 23 جاستاعى ەر ادام كەن استىندا قالىپ, تۇنشىعىپ قايتىس بولدى.
ءىستىڭ ءمان-جايىن انىقتاۋ ءۇشىن ارنايى كوميسسيا قۇرىلدى. تەرگەۋ ەكى ايعا سوزىلدى. كوميسسيا جۇمىسىنىڭ قورىتىندىسى بويىنشا, قايعىلى وقيعاعا جۇمىس بەرۋشى كىنالى دەپ تانىلدى.
«جۇمىس بەرۋشىنىڭ كىناسى 100% انىقتالدى. جۇمىس بەرۋشى قاۋىپسىز جۇمىس ءۇشىن ارنايى قۇرىلعىنى قولدانبايتىن كورىنەدى. سونىمەن قاتار جۇمىس بەرۋشى كاسىپتىك قاۋىپتەردى دە باعالاماعان. ينجەنەرلىك-تەحنيكالىق قىزمەتكەرلەر تاراپىنان باقىلاۋ السىرەگەن», دەدى قاراعاندى وبلىسى بويىنشا ەڭبەك ينسپەكتسياسى جونىندەگى دەپارتامەنتىنىڭ ءباسپاسوز حاتشىسى ايزادا جۇمابەكوۆا.