استانا. 30 ماۋسىم. استانا اكىمى جىل سايىن ءداستۇرلى تۇردە وتكىزىلىپ كەلە جاتقان «استانا تاڭداۋى-2014» جالپىقالالىق بايقاۋىنىڭ جەڭىمپازدارىن ارنايى ماراپاتتادى. بۇل تۋرالى astana.kz حابارلادى.
بيىل قاتارىنان ءۇشىنشى جىل ۇيىمداستىرىلىپ وتىرعان ءداستۇرلى «استانا تاڭداۋى» بايقاۋىنا بايلانىستى قابىلدانعان انكەتالار مەن وتىنىمدەر astana.gov.kz سايتىنا ورنالاستىرىلدى. وندا سايتقا كىرگەن ءاربىر ادام ءبىر رەت داۋىس بەرۋگە مۇمكىندىك الدى.
بايقاۋعا 195 اتالىم بويىنشا 250 ءوتىنىم كەلىپ تۇسكەن. بۇلاردىڭ اراسىندا «ۇزدىك مۇعالىم» – «استانا دارىنى» عىلىمي-تاجىريبەلىك ورتالىعىنىڭ ديرەكتورى مايرا قۇرمانباەۆا, «ۇزدىك دارىگەر» – №1 قالالىق اۋرۋحانانىڭ جوعارى دارەجەلى دارىگەر-ۋرولوگى كيريلل چيچەروۆ, «ۇزدىك جول جوندەۋشى» – «پروگرەسس KZ» جاۋاپكەرشىلىگى شەكتەۋلى سەرىكتەستىگىنىڭ ينجەنەرى بەكزات مۇسەەۆ, «ۇزدىك ۋچاسكەلىك ينسپەكتور» – استانا قالاسى ىشكى ىستەر دەپارتامەنتى الماتى اۋداندىق ۋچاسكەلىك ينسپەكتورى باۋىرجان تاۋماحانوۆ, «ۇزدىك ەنەرگەتيك» – «استانا قالاسى ەنەرگەتيكا باسقارماسى» مەملەكەتتىك مەكەمەسى ەنەرگيامەن قامتۋ ءبولىمىنىڭ باسشىسى ولجاس يششانوۆ, «ۇزدىك قۇرىلىسشى – «باي-تان كومپانياسى» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ەركىن وماروۆ, «ۇزدىك جۇرگىزۋشى» – «№1 اۆتوبۋس پاركى» اكتسيونەرلىك قوعامىنىڭ جۇرگىزۋشىسى سەرىك اداەۆ بايقاۋ جەڭىمپازى اتاندى.
استانا اكىمى يمانعالي تاسماعامبەتوۆ: «ءبىز بايقاۋ جەڭىمپازدارىن مەملەكەتتىك ناگرادالارعا ۇسىندىق. مەملەكەتتىك بايقاۋ كوميسسياسى دۇرىس شەشىم قابىلداپ, ناگرادا ءوز يەسىن تابادى دەپ ويلايمىن», – دەدى.
ەسكە سالا كەتەيىك, «استانا تاڭداۋى» العاش رەت ەلوردا اكىمى يمانعالي تاسماعامبەتوۆتىڭ باستاماسىمەن 2012 جىلى وتكىزىلگەن بولاتىن.
جولدىباي بازار.
دەرەككوز: astana.kz.
فوتو: astana.kz.