ءومىر جولى تاقتايداي تەگىس ەمەس. ۇلكەندەر «قامشىنىڭ سابىنداي قىسقا» دەپ تۇجىرىم جاساعان مىنا جالعاننىڭ سىناعىنا ەرىك-جىگەرى مەن ءتوزىمى مىقتىلار عانا شىدايدى. ارينە, ول ءۇشىن سىن ساعاتى سوققاندا ءومىر ءۇشىن ارپالىسقا تولى كۇرەسۋگە تالپىندىراتىن شىن جاناشىر جاننىڭ قولداۋى قاجەت-اق.
قازاق ەستراداسىنداعى جاس ءانشىنىڭ ءبىرى ەرنار ايدار ورىندايتىن «كۇنىم, سەن سونبەشى!» دەيتىن ءان بار. وسى انگە كليپ تۇسىرىلگەن. سول كليپتىڭ باس كەيىپكەرلەرى – اتىراۋلىق مارلەن مەن انەل. ءانشىنىڭ ولاردى تاڭداۋى تەگىن ەمەس.
ويتكەنى ەكى جاستىڭ ماحاببات حيكاياسى الەۋمەتتىك جەلى ارقىلى جۇرتشىلىققا كەڭىنەن تاراعان. سول سەبەپتەن بۇل كليپتى قازاق قوعامى جىلى قابىلدادى. وعان الدىمەن جىلىوي اۋدانىنىڭ ورتالىعى – قۇلسارى قالاسىنىڭ تۇرعىنى مارلەن نۇرعاسەنوۆتىڭ اۋىر دەرتكە شالدىققان عاشىعىن قولداپ, ونىڭ وتتەگى باللونىن كوتەرىپ جۇرگەنى اسەر ەتكەنى داۋسىز. دانا ابايدىڭ «ماحابباتسىز دۇنيە بوس» دەگەنىندەي, جاس جىگىتتىڭ عاشىعىنا دەگەن كىرشىكسىز سەزىمى, قينالعان ساتتەگى جاناشىرلىعى جۇرەك تەبىرەنتەدى.
جاس جىگىتتتىڭ جۇرەگىن باۋراعان سۇيىكتىسى انەل مۇراتوۆا 2009 جىلى اۋىر دەرتكە شالدىققان. بىراق قايسار بويجەتكەن مارلەننىڭ قولداۋىمەن قيىندىققا قارسى تۇرىپ, ءومىر سۇرۋدەن ءۇمىتىن ۇزگەن جوق. دەرتىنەن ايىعۋ ءۇشىن الدىمەن اقتوبەدەگى, ودان سوڭ ايشىلىق بولماعانىمەن, بىرنەشە كۇن جول جۇرەرلىكتەي الىستاعى الماتى مەن قاراعاندى قالالارىنداعى بىلىكتى دارىگەرلەردىڭ كەڭەسىمەن جەتى جىلعا جۋىق ەمدەلدى. ءتىپتى ءبىر وكپەسىن الدىرىپ, وتتەگى باللونىمەن جۇرۋىنە تۋرا كەلدى. ءبىر كۇندە 20-عا جۋىق ءدارى-دارمەك قابىلداعان ونىڭ اسقازانى مەن جۇرەگى سىر بەرىپ, تىنىس الۋىن, اعزاسىن ودان سايىن السىرەتتى.
وزگە ەلدەن كەلگەن پروفەسسوردىڭ «انەلدىڭ ءومىر ءسۇرۋ مۇمكىندىگى 30 پايىز. سوندىقتان وعان كۇردەلى وپەراتسيانى جاساۋدى ەشكىم جاۋاپكەرشىلىگىنە المايدى» دەگەنى بويجەتكەننىڭ جۇرەگىنە شانشۋداي قادالسا دا مويىعان جوق. كەرىسىنشە, ءومىر ءۇشىن, بولاشاعى ءۇشىن كۇرەسىپ, شار قايراقتاي شيرىقتى. ويتكەنى ونىڭ قاسىندا اۋرۋحانادا بىرگە تۇنەپ, سىرقاتى جانىنا باتقان ساتتە سوزىمەن دە, ىسىمەن دە قولداۋ بىلدىرگەن مارلەن بار. ونىڭ بۇل ارەكەتى بويجەتكەننىڭ ەرىك-جىگەرىن جانىدى. اۋىر سىرقاتىنان ايىعۋعا ءۇمىت وتىن ۇرلەي ءتۇستى.
ءبىر-بىرىنە سەنگەن جۇپ 2015 جىلى وتباسىن قۇرىپ, نەكەسىن قاراعاندى قالاسىندا قيدىرعان. سودان بەرى انەلدىڭ جاعدايى جاقساردى. ولار جاقىندا ءسابيلى بولىپ, ومىرگە كەلگەن ۇلعا دىنمۇحاممەد ەسىمىن بەردى.
«اللانىڭ قۇدىرەتىندە شەك جوق قوي. ءبىزدى اكە, انا اتانادى دەپ كىم ويلاعان؟ ەندى مىنە, اللانىڭ قالاۋىمەن اكە, انا باقىتىن سەزىندىك. كوپ جىل كۇتكەن بالاپانىمىز امان-ەسەن دۇنيەگە كەلىپ, ءومىرىمىزدى 360 گرادۋسقا وزگەرتتى», دەپ جازدى انەل الەۋمەتتىك جەلىدەگى پاراقشاسىندا.
ەرگە ءتان ەرلىككە پارا-پار ءىس قازاق قىزىنىڭ دا قولىنان كەلەدى. سونىڭ مىسالىنداي, جول اپاتىنان كەيىن ارباعا تاڭىلۋعا ءماجبۇر بولعان داۋرەن جاردەموۆكە قولداۋ بىلدىرگەن ءدىلناز داۋلەتباەۆانىڭ جاناشىرلىعى جۇرتشىلىقتىڭ ىقىلاسىنا بولەندى. اكەسىن جۇمىسقا الىپ بارا جاتقان جاس جىگىت ەكى جىل بۇرىن كولىگى اۋدارىلىپ, اۋىر جاراقات العان.
جول اپاتىنان كەيىن وعان اتىراۋ, الماتى جانە ىستامبۇل قالالارىنداعى اۋرۋحانالاردا وپەراتسيا جاسالعان. قينالعانىن بىلدىرگىسى كەلمەسە دە, وعان وڭاي بولماعانى انىق. سونداي ساتتە اتا-اناسى, دوستارى مەن سۇيىكتىسى قولداۋ بىلدىرگەن. اسىرەسە, ءدىلناز داۋلەتباەۆانىڭ قولداۋىنا جەتەر ەشتەڭە جوق.
ەكەۋى كەزدەيسوق تانىسقان. داۋرەن قالادا تۇراتىن اعاسىنىڭ ۇيىنە ءجيى كەلىپ جۇرگەندە ءدىلنازدى كورگەنىن ايتادى. ويتكەنى مەديتسينا كوللەدجىندە وقيتىن بويجەتكەننىڭ اتا-اناسى اعاسىنىڭ وتباسى مەكەن ەتكەن كوپقاباتتى ۇيدە تۇرادى ەكەن. ءبىر پودەزدەن كىرىپ-شىعىپ جۇرگەن يناباتتى بويجەتكەندى ۇناتقانىمەن, جۇرەك قىلىن شەرتەتىن سەزىمىن بىلدىرمەگەن. ولار جول اپاتىنان كەيىن ءبىر-بىرىمەن جاقىن ارالاسىپ, سىرلاسا باستاعان.
– ءبىز ءبىر جىلدان اسا بىرگە سەرۋەندەپ, سىرىمىزدى ايتىپ, سويلەسىپ جۇردىك. ءدىلنازدىڭ قينالعان كەزدە تەرىس اينالماي, قولداۋ تانىتقان ادامگەرشىلىگىنە ريزا بولدىم. ەكەۋمىز بۇگىنگى قيىندىقتى بىرگە جەڭۋگە ءسوز بايلاستىق. سودان كەيىن قۇدا ءتۇسۋ, قىز ۇزاتۋ, كەلىن ءتۇسىرۋ سالتىمەن تويىمىز ءوتتى. اۋىلدا اتا-انامىزدىڭ جانىندا بولعىمىز كەلگەن. بىراق اۋىلدا قولاربامەن ءجۇرۋ قيىن عوي. سول سەبەپتەن قالادا تۇرۋعا شەشىم قابىلدادىق, – دەيدى داۋرەن.
جاسى ءالى وتىزعا تولماعان جىگىتتىڭ اياعىنان تۇرارىنا سەنىمى مول. ويتكەنى ونىڭ قاسىندا ايتار ءسوزىن قاس-قاباعىنان ۇعاتىن, ادامگەرشىلىگى مول جارى ءدىلناز بار. وعان جىلى سوزىمەن قۋات بەرگەن دارىگەردىڭ ءبىرى سپورتپەن شۇعىلدانۋدىڭ پايداسى تيەرىنە كەڭەس بەرگەن. دارىگەردىڭ بۇل كەڭەسى جاس جىگىتتى جىگەرلەندىرىپ, ءۇمىتىن وياتتى, سەنىمىن نىعايتتى.
– ءبارى مۇمكىن عوي. ەڭ باستىسى, ءۇمىت ۇزبەۋ, سەنىمدى قادام باسۋ ءۇشىن كۇرەستى توقتاتپاۋ كەرەك. بۇل قيىندىقتى جەڭەتىنىمىزگە سەنەمىن, – دەيدى ول.
ارينە, كەز كەلگەن ادام جاناشىر بولا المايدى. اسىرەسە تاعدىردىڭ سىناعىنا تاپ بولعان ساتتە ءار پەندەنىڭ بەت-پەردەسى دە, ادامدىق ايناسى دا انىق اڭعارىلادى. دەگەنمەن ونەگەلى وتباسىدان تاربيە العاندار عانا انەلىن ايالاعان مارلەندەي مەيىرىمدىلىگىن, داۋرەنىنە دەم بەرگەن ءدىلنازداي يناباتتىلىعىن جوعالتپايتىنى داۋسىز.
اتىراۋ وبلىسى