كادر ماسەلەسى قاشاندا وزەكتى

كەزدەسۋلەردىڭ بىرىندە كادر ماسەلەسى ءسوز بولدى. ماسەلەن, «قازازوت» كاسىپورنى قىزمەتكەرلەرى حيميا ماماندىعىن بىتىرۋشىلەر وندىرىسكە از كەلەتىنىن ايتتى. «حيميك بولۋ ءۇشىن ۇبت-دا فيزيكا مەن حيميا پاندەرىن تاڭداۋ كەرەك. ال بۇل پاندەردى تۇلەكتەردىڭ شامامەن 1%-ى عانا تاڭدايدى. ءبىز مۇنى وزگەرتۋىمىز كەرەك. سوندىقتان ءبىز كاسىپتىك باعدار بەرۋگە ۇلكەن كوڭىل بولەمىز. جاستار قايدا باراتىنىن, قاي سالادا سۇرانىسقا يە بولاتىنىن ءبىلۋى ءۇشىن جۇمىس بەرۋشىلەردىڭ ناقتى ماماندارعا سۇرانىسى تۋرالى حالىقتى ۇنەمى حاباردار ەتىپ وتىرۋ قاجەت», دەدى پارتيا اپپاراتىنىڭ جەتەكشىسى, ءماجىلىس دەپۋتاتتىعىنا كانديدات ولجاس قۇسپەكوۆ.

پسيحولوگيا ماماندىعى بويىنشا ءبىلىمى بار, ەرەكشە بالالارمەن جۇمىس ىستەيتىن كاسىپورىن قىزمەتكەرلەرىنىڭ ءبىرى دتسپ جانە داۋن سيندرومىنا شالدىققان بالالاردىڭ جيىلەپ كەتكەنى تۋرالى ماسەلە كوتەردى. اتاپ ايتقاندا, 2015 جىلدان بەرى وبلىستا كامەلەتكە تولماعاندار اراسىنداعى مۇنداي دەرت 5 ەسەگە وسكەن. الايدا ولارعا ارنالعان مەكتەپتەر مەن وڭالتۋ ورتالىقتارى جەتكىلىكسىز.

«مەن سەرتيفيكاتى بار كلينيكالىق پسيحولوگپىن. مەن ءسىزدىڭ نە تۋرالى ايتىپ تۇرعانىڭىزدى تۇسىنەمىن. بۇل جاعدايدا ەكى نەگىزگى ماسەلە بار: ءبىرىنشىسى اۋرۋمەن تۋعان بالالاردى نە ىستەۋ كەرەك, ەكىنشىسى بولاشاقتا اۋرۋشاڭدىقتىڭ ارتۋىنا جول بەرمەۋ ءۇشىن نە ىستەۋ كەرەك؟ ءبىزدىڭ پارتيا ينتەگراتسيالىق جانە پروفيلاكتيكالىق مەديتسينانى دامىتۋعا باعىتتالعان باستامالاردى قولعا الىپ جاتىر. كوپ جاعدايدا وتاندىق دەنساۋلىق ساقتاۋ سالاسىنا بۇرىننان بار اۋرۋلاردىڭ سالدارىمەن كۇرەسۋگە تۋرا كەلەدى. ءبىز اۋرۋدىڭ سالدارىن بولدىرماۋدى عانا ەمەس, سونىمەن قاتار اۋرۋدىڭ ءوزىن دە بولدىرماۋدى باستى مىندەت دەپ سانايمىز», دەدى «Respublica» پارتياسىنىڭ تەڭ توراعاسى, ءماجىلىس دەپۋتاتتىعىنا كانديدات قۋانىش شونباي.

ماڭعىستاۋ وبلىسى بويىنشا سايلاۋالدى تۋرى اياسىندا «Respublica» پارتياسىنىڭ مۇشەلەرى قالا اقساقالدارىمەن كەزدەسۋ وتكىزىپ, اداي اتا كەسەنەسىنە بارىپ, مادەني ءىس-شارالارعا قاتىستى.