شىن مانىندە, بيىلعى ساياسي دودا اشىق بايگە بولدى. قازاقتا ات جارىسى قالاي وتەدى؟ سايگ ۇلىك تۇلپار ءبىرىنشى قارا ءۇزىپ كەلسە, ودان كەيىن ەكىنشى, ءۇشىنشى ورىن العاندارى مارەگە جەتەدى. سول سەكىلدى حالىققا ەڭبەگى سىڭگەن, ءسوزى وتكەن پارتيالار جەڭىسكە جەتەدى. سوعان ءبىز داعدىلانۋىمىز كەرەك. باتىستا نەگىزگى تايتالاس پارتيالار اراسىندا وتەدى. ءبىز دە سوعان كەلە جاتىرمىز.
قازاق ەلىنىڭ قالىپتاسۋىنا, ىرگەسىن نىقتاپ, شاڭىراعىن بەرىك ەتۋگە الدىڭعى بۋىن اعالار از ەڭبەك ەتكەنىمىز جوق. الايدا ءبىر كۇننىڭ ىشىندە جاڭا قازاقستاندى قۇرۋ مۇمكىن ەمەس. وعان قول جەتكىزۋ ءۇشىن ءبىلىمى بار, كورگەنى كوپ, شەتەلدەن ۇيرەنگەنى مول ازامات, حالقىنىڭ تاريحىن, مادەنيەتىن, ادەت-عۇرىپ, سالت-ءداستۇرىن جەتىك بىلەتىندەر بيلىككە كەلۋى قاجەت. ايتپەسە قازاق حالقىنىڭ سالتى دا, ءداستۇرى دە تالاي جىلدان بەرى قالىپتاستى. سوندىقتان ونى بۇزباي, قازىرگى زامانمەن ۇشتاستىرا بىلگەنى ءجون.
ەندەشە, كەلەشەكتە دەپۋتاتتىق مانداتتى يەلەنەتىندەردىڭ ماقساتى – حالىقتىڭ ءال-قۋاتىن كوتەرۋ بولۋعا ءتيىس. قۇدايعا شۇكىر, قازىر قازاق ەلىنىڭ جاعدايى جاقسى. كوپ ەلدەن كوش ىلگەرىمىز. بىراق بۇعان توقمەيىلسىمەي, توقتاماي, ىلگەرىدەگى مەملەكەتتەرگە قاراپ بوي تۇزەۋىمىز كەرەك. قازاقستاننىڭ داليعان جەرىن بىرەۋ بىزگە سىيعا تارتا سالعان جوق. بۇل حاندارىمىز بەن باتىرلارىمىزدىڭ, كوسەمدەرىمىز بەن حالقىمىزدىڭ قانىمەن, جانىمەن ساقتالعان جەر. ساق, عۇنداردان باستاپ كۇلتەگىن سەكىلدى باھادۇرلەر ۇلى دالانى قورعاۋ ءۇشىن باسىن بايگەگە تىكتى. وسىنى ۇمىتپاۋىمىز قاجەت.
نوبەل سىيلىعىنىڭ يەگەرى يوحاننەس حانس دانيەل يەنسەن دەگەن عالىم «ەلدەن عالىمدار, ينجەنەرلەر, دارىگەرلەر, اقىل-وي يەلەرى كەتسە, وندا سول ەلدىڭ ءسانى بولىپ وتىرعان ينتەلليگەنت تە قۇريدى. ونداي ەلدە بيزنەسمەندەر بيلىككە كەلەدى, كوشەدەگى كىم كورىنگەن ساياساتكەر اتانادى. ال ارتىستەر مەن سپورتشىلار, بازارداعى الىپساتارلار دەپۋتات بولادى», دەپ ايتقان ەكەن. سوندىقتان حالىق كىمنىڭ كىم ەكەنىن اجىراتا بىلگەنى ابزال.
وسى ورايدا, بايگەگە ءتۇسىپ جاتقان ءىنى-قارىنداستارىما شىن جۇرەكتەن, اق تىلەكپەن, ەشقايسىسىن بولە-جارماي, الداعى سايلاۋدا وزىق شىعۋدى تىلەيمىن. حالىققا شىن كوڭىلدەن قىزمەت ەتسە دەپ ارماندايمىن. سوندىقتان حالقىمىزدى ءبارىمىز ءبىر كىسىدەي جۇمىلىپ, سايلاۋعا قاتىسۋعا شاقىرامىن. ءوز تاڭداۋىن جاساپ, ەلدىڭ ەرتەڭىنە ۇلەس قوسۋعا ۇندەيمىن.
پارتيالاردى ءبولىپ-جارمايمىن. سايلاۋعا قاتىسىپ جاتقان پارتيالاردىڭ ماقساتى – ەلدىڭ تۇرمىس-تىرشىلىگىن جاقسارتۋ, ەلدىڭ ەرتەڭى ءۇشىن ەڭبەك ەتۋ. قازاققا جاقسىلىق جاساۋ. سوندىقتان شىن جۇرەگىمنەن پارتيالاردىڭ بارىنە تابىس تىلەيمىن. جولدارى بولسىن!
مىرزاتاي جولداسبەكوۆ,
قوعام قايراتكەرى