شالعاي اۋىلداردى ارالادى

كانديداتتار پاۆلودار وبلىسى شارباقتى اۋدانىنا سوعىپ, جەرگىلىكتى سايلاۋشىلارمەن كەزدەستى. تۇرعىندار دەنساۋلىق سالاسىنا قاتىستى پروبلەمالاردى ورتاعا سالدى.

«بىزدەگى بىتپەيتىن جىرعا اينالعان سالانىڭ ءبىرى – مەديتسينا. ءدال وسى سالاعا كەلگەندە كىمنىڭ بولسا دا كوڭىلى كۇپتى. سۋىق ءتيىپ اۋىرعان بالانىڭ اۋرۋحانادان سال بوپ شىعاتىنىنا كوز ۇيرەندى. وزىنە ەسكەرتۋسىز ون ەكى مۇشەسىنىڭ بىرىنەن ايىرىلىپ جاتاتىن ەلدىڭ قاراسى كوبەيدى. ايتەۋىر, قازىر مەديتسينالىق مەكەمەلەر مەن دارىگەرلەردى سوتقا سۇيرەيتىن وقيعا وتە كوپ. ەڭ وكىنىشتىسى, ءاربىر جاعدايدىڭ ارتىندا ادام تاعدىرى تۇر. الەۋمەتتىك جەلىلەردەن ەكى كۇننىڭ بىرىندە دەرتىنە داۋا ىزدەپ, وتاندىق مەديتسينادان كوڭىلى قالعان جازبالاردى وقيتىن بولدىق. قوعام بەلسەندىلەرى مەن ساراپشىلار «بىزدەگى مەديتسينانىڭ دامۋى كەمى 30 جىلعا ارتتا قالدى» دەپ وتىر. جۇرت تەگىن ەمگە ارقا سۇيەمەيتىن بولعان. ايلاپ كەزەك كۇتكەنشە, اۋرۋىن اسقىندىرىپ الۋدان قورقىپ, سول كۇنى قابىلدايتىن اقىلى قىزمەتكە جۇگىنەدى. وسىدان كەيىن مەديتسينادان ءمان كەتتى دەۋگە ابدەن نەگىز بار. ءتىپتى, كەيبىرى كورشى مەملەكەتتەرگە بارىپ قارالۋعا ءماجبۇر.

ونىڭ ۇستىنە قازاقستاندا مەديتسينا ماماندارىنىڭ كاسىبي دايىندىعى كوڭىل كونشىتپەيدى. اسىرەسە, اۋىلدىق جەرلەردە مەديتسينالىق قىزمەتتىڭ ساپاسى تومەن. بۇركەگەن جەردەن بۇرگە شىعارىن ەسكەرسەك, الدىمەن وسى ولقىلىقتىڭ ورنىن تولتىرۋ كەرەك. دەنساۋلىق ساقتاۋ سالاسىنا قاتىستى كۇندە ءبىر جيىن ءوتىپ, ءجيى-ءجيى تالقىلاۋعا ۇشىراسا دا, بۇل سالانىڭ ماسەلەسى ازايماي وتىر. كەزىندە دەنساۋلىق ساقتاۋ سالاسى ماماندارى شەتەلدىڭ جوعارى وقۋ ورىندارىمەن بىرلەسە وتىرىپ, ەلىمىزدىڭ مەديتسينالىق ءبىلىمىن جاڭعىرتۋ شارالارى قولعا الىنعانىن ايتقان ەدى. فينليانديانىڭ تاجىريبەسى نەگىزىندە باكالاۆريات بو­يىنشا مەدبيكەلىك ءبىلىمدى جاڭعىرتۋ شارالارى دا قولعا الىنعان. الايدا وندا ءدارىس الىپ جاتقاننىڭ بارلىعى بىردەي اۋىلعا بارمايدى. سەبەبى, ولاردى مىندەتتى تۇردە اۋىلدى جەرلەرگە جىبەرۋ قاراستىرىلماعان. وسى تۇستا اۋىلعا دارىگەر تارتۋ ءۇشىن وسى باعىتتا ءبىلىم الۋشىلارمەن كەلىسىمشارتقا وتىرۋ شارالارىن دا قاراستىرىپ كورۋ كەرەك سياقتى», دەدى ا.ساعاندىقوۆا.