مەدەۋ شاتقالىنداعى اكتسيا

پارلامەنت ماجىلىسىنە كانديداتتار اينۇر ءسابيتوۆا مەن ۆلاديمير مارتەل جاستارمەن بىرگە دەنساۋلىق باسپالداعىمەن كوتەرىلىپ, «بايتاق» پارتياسىنىڭ تۋىن كوككە كوتەردى. اكتسيا اياسىندا وتكىزىلگەن ءىس-شارالار ەكولوگيالىق مادەنيەتتى, سپورتتى دامىتۋعا جانە سالاماتتى ءومىر سالتىن ۇستانۋعا بايلانىستى بولدى.

اينۇر ءسابيتوۆا بۇگىنگى جاستار وتە بەلسەندى جانە ءپوزيتيۆتى ەكەنىن اتاپ ءوتتى. «قازىرگى ۇرپاق بولاشاققا ۇمىتپەن قاراپ, ۇلكەن وزگەرىستەردى كۇتىپ وتىر. مۇنداي ساتتەردە ەكولوگيالىق جاۋاپتى ادامداردىڭ ءبىرتۇتاس قوعامىن قۇرۋ تاسىلدەرىن دۇرىس قالىپتاستىرۋ جانە ءتۇسىنۋ وتە ماڭىزدى. مۇنداي قوعام ءوز كەزەگىندە اۋانىڭ, سۋدىڭ, تابيعاتتىڭ تازالىعى سياقتى ماسەلەلەرمەن كۇرەسەتىن بولادى», دەدى ول.

ۆلاديمير مارتەل ءوز كەزەگىندە مەدەۋ تاۋ شاتقالىندا وتكىزىلەتىن بارلىق ءىس-شارالار ەكولوگيالىق مادەنيەتپەن جانە تابيعاتقا ۇقىپتى قاراۋمەن بايلانىستى ەكەنىن ايتتى. «بۇگىنگى تاڭدا سالاماتتى ءومىر سالتىن ۇستانۋ جانە ونى دامىتۋ باعىتىنداعى ءىس-شارالار وتە ماڭىزدى», دەپ اتاپ ءوتتى كانديدات.

«بايتاق» جاسىلدار پارتياسىنىڭ وكىلدەرى دارىگەرلەرمەن دە كەزدەستى. ساياسي ۇيىم توراعاسى ەلورداداعى كوپسالالى الەۋمەتتىك-مەديتسينالىق مەكەمەلەردىڭ بىرىندە سايلاۋالدى باعدارلا­ما­نى تانىستىرىپ, ساۋالدارعا جاۋاپ بەردى. اق حالاتتى ابزال جاندار قوعامداعى تۇيتكىلدى ماسەلەلەردى كوتەرىپ, ولاردى شەشۋ جولدارى بويىنشا ۇسىنىستارىن ايتتى. اتالعان مەكەمەدە 60-قا جۋىق مامان ەڭبەك ەتەدى. جۇزدەسۋ بارىسىندا پارتيا بەلسەندىلەرى ەلدە جۇرگىزىلىپ جاتقان ساياسي رەفورما توڭىرەگىندە وي ءبولىسىپ, پىكىر الماستى. ۇگىت-ناسيحات جۇمىستارىنىڭ اياقتالۋىنا از ۋاقىت قالدى. بۇل رەتتە كەستەگە ساي ءىس-شارالار قىزا ءتۇستى. ايتا كەتەيىك, بايتاق­تىقتار قازىر ءۇش جارىم مىڭنان استام كەزدەسۋ ۇيىمداستىردى. الداعى كۇندەرى رەسپۋب­ليكالىق شتاب وكىلدەرى وڭتۇستىك وڭىرلەردى ارالاۋدى جوسپارلاپ وتىر.

«رەسپۋبليكالىق شتاب پەن بارلىق ايماقتاعى شتابتاردىڭ جۇمىسى باقىلاۋدا. حالىقتىڭ سايلاۋعا دەگەن ىنتاسى جوعارى. سايلاۋدان ۇلكەن ءۇمىت كۇتىپ وتىر», دەدى پارتيا توراعاسى ازاماتحان امىرتاەۆ.